ހުޅުމާލޭ ދެވަަނަ ފިޔަވަހީގައި އިމާރާތްކުރަމުން އަންނަ "ވިނަރެސް" އެޕާޓްމަންޓްތައް ގަތުމަށް މިހާތަނަށް ހުޅުވާލި ކެޓަގަރީތަކުން 288 މީހަކު އެތަނުން ފްލެޓް ގަންނަން ހުށަހަޅާފައިވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ބުނެފި އެވެ.
އެ ތަންތަން އާންމުންނަށް ވިއްކަން ހުޅުވާލުވުމުގެ ކުރިން ސީލައިފް ގްލޯބަލް އިން ހުޅުމާލޭގައި ހަދަން ނިންމި އެޕާޓްމަންޓްތައް ގަތުމަށް ފައިސާ ދެއްކި މީހުންނާއި ހިޔާ އިން ފްލެޓް ލިބުނު މީހުންގެ ތެރެއިން ފްލެޓް ދޫކޮށްލައި، "ވިނަރެސް" ފްލެޓަށް ބަދަލުވާން ބޭނުންވާ މީހުން، އަދި ގުޅިފަޅުން ފްލެޓް ގަތް މީހުންނަށް "ވިނަރެސް" ގަތުމުގެ ފުރުސަތު އެޗްޑީސީން ހުޅުވާލި އެވެ.
އެ ކުންފުނިން، "މިިހާރު" އަށް ބުނީ ހިޔާ ފްލެޓު ދޫކޮށްލުމަށް ފަހު ވިނަރެސް އަށް ބަދަލުވާން 79 މީހަކު ހުށަހެޅި ކަމަށެވެ. އެކަމަކު އޭގެ ތެރެއިން ހަތަރު މީހަކު އެޕްލިކޭޝަން ކެންސަލުކުރި އެވެ. އަދި ގުޅީފަޅުން ފްލެޓް ގަތް 96 މީހަކު ވެސް އެތަނުން ފްލެޓް ގަތުމަށް ހުށަހެޅި އެވެ.
ވިނަރެސް ފްލެޓްތައް:
- 13 ބުރީގެ 10 ޓަވަރުގައި ތިން ކޮޓަރީގެ 1،344 އެޕާޓްމަންޓް
- އެޕާޓްމަންޓެއް ބޮޑުމިނަކީ 902-883 އަކަފޫޓު
- އަގު: 2.5-2.7 މިލިއަން ރުފިޔާ
- އިންސްޓޯލްމަންޓް އުސޫލުން 20-25 އަހަރުން ފައިސާ ދައްކާ ނަމަ އަގު ދެ ގުނަ ވޭ.
އެޗްޑީސީން ބުނި ގޮތުގައި ސީލައިފް އިން ފްލެޓް ގަތް މީހުންގެ ތެރެއިން ފައިސާ ދެއްކި ކަމުގެ ލިޔުން އޮތްތޯ ބެލިއިރު 344 މީހެއްގެ އަތުގައި އެ ލިޔުން އޮތް ނަމަވެސް ފްލެޓް ގަތުމަށް އޭގެ ތެރެއިން ހުށަހެޅީ 177 މީހެއް ކަމަށެވެ.
ވިނަރެސް ފްލެޓް ގަތުމަށް 288 މީހަކު ހުށަހެޅިޔަސް އޭގެ ތެރެއިން ފްލެޓް ލިބޭ މީހުން ކަނޑައަޅާނީ އެޗްޑީސީން ބަލާ މިންގަނޑުތައް ފުރިހަމަވާ ނަމަ އެވެ.
އަންނަ ޖުލައި މަހުގެ ތެރޭގައި ނިންމުމަށް އަމާޒު ހިފާފައި ހުރި ވިނަރެސް ފްލެޓްތައް އާންމުންނަށް ވިއްކަން ހުޅުވާލާނެ އިރެއް އަދި ނޭނގެ އެވެ.
"ވިނަރެސް" މަޝްރޫއުގެ ދަށުން އެޕާޓްމަންޓް ގަތުމަށް ސީލައިފް މީހުންގެ ތެރެއިން 177 މީހަކު ކުރިމަތިލިއިރު އެ މީހުންގެ ކަންބޮޑުވުމަކީ ސެޓްލްމަންޓް އެއްބަސްވުމާ ހިލާފަށް އެ ތަންތަން ވިއްކާތީ އެވެ.
ހުޅުމާލޭގައި 3،000 ހައުސިން ޔުނިޓް އަޅަން މާޗު 13، 2014 ގައި ސީލައިފްއާ ހަވާލުކުރުމުން، އެ ތަންތަން ވިއްކުމުގެ ނަމުގައި އެތައް ސަތޭކަ ބައެއްގެ އަތުން ބުކިން ފީ ނެގި މައްސަލަ ފެންމަތިވުމުން އެކަން ތަހުގީގު ކުރުމަށް ކަމާބެހޭ ފަރާތްތަކަށް ހުށަހެޅި އެވެ. އަދި ގެއްލުމުގެ ބަދަލު ހޯދަން ކޯޓަށް ވެސް ހުށަހެޅި އެވެ.
އެ މައްސަލައިގައި އޭރު ސެޓްލްމަންޓް އެއްބަސްވުން ހެދީ ސީލައިފްގެ ސަބަބުން ގެއްލުންވި މީހުންގެ ތެރެއިން 203 މީހަކު ދައުލަތާ ދެކޮޅަށް ދައުވާ ކުރުމުންނެވެ. ދައުވާކުރި މީހުންނަށް 45 މިލިއަން ރުފިޔާގެ ބަދަލެއް ކަނޑައަޅައި އަދި ބޯހިޔާވަހިކަމުގެ މަޝްރޫއަކުން ފްލެޓް ގަތުމަށް އެ މީހުންނަށް ފުރުސަތު ދޭ ގޮތަށް އެއްބަސްވުން ހަދައި އެޗްޑީސީން ކޯޓުން ބޭރުގައި މައްސަލަ ނިންމި އެވެ.
އޭގެ ފަހުން އެޗްޑީސީން ވަނީ ސީލައިފްގެ ފްލެޓަށް ފައިސާ ދެއްކި މީހުންނަށް ހުޅުމާލޭގެ ދެ ވަނަ ފިޔަވަހީގައި އިމާރަތްކޮށްފައިވާ "ވިނަރެސް" ފްލެޓަށް ކުރިމަތިލާން ފުރުސަތުދީފައި ނަމަވެސް އެ މީހުންގެ ކަންބޮޑުވުމަކީ، ސީ ލައިފްގެ ފްލެޓަށް ވުރެ ވިނަރެސްގެ ފްލެޓުގެ އަގު ބޮޑުވުމެވެ. އެކަމުގެ ކަންބޮޑުވުންތައް ފާޅުކޮށް 122 މީހުން ސޮއިކޮށް ރަައީސް އިބްރާހީމް މުހައްމަދު ސޯލިހަށް ޕެޓިޝަނެއް ވެސް ހުށަހެޅި އެވެ.
