އަނބިމީހާ ގަޔަށް ވަޅިހެރި މީހާ ބުނީ އަމިއްލަ ބަނޑަށް ވަޅި ހެރީ ބިރުން ކަމަށް

މިއަދު މާލޭގައި އަނބިމީހާ ގަޔަށް ވަޅިހެރި އިންޑިއާ މީހާ އަމިއްލަ ބަނޑަށް ވެސް ވަޅި ހެރި ކަމަށާއި އެހެން ހެދީ ފުލުހުން ދިއުމުން ބިރުން ކަމަށް ކޯޓުގައި ބުނެފި އެވެ.

ގޭތެރޭގައި އަނބިމީހާގެ ފަލަމަސްގަނޑަށް ވަޅި ހަރައި ޒަހަމްކޮށްލި މައްސަލާގައި ހައްޔަރުކޮށްފައިވާ އޭނާގެ ފިރިމީހާ ސްރިނިވަސަން ސުބްރަމަނި، 27، ކްރިމިނަލް ކޯޓަށް ހާޒިރުކޮށް ބަންދުގެ މުއްދަތު އިތުރުކުރި މަޖިލީޙުގައި ބުނީ އަނބިމީހާ ގަޔަށް "ވަޅި ހެރުނީ" ކުރި ޒުވާބެއްގެ ތެރެއިން ކަމަށެވެ.

އަނބިމީހާ ގަޔަށް ވަޅި ހެރުމަށް ފަހު އަމިއްލަ ބަނޑަށް ވެސް ވަޅި ހަރާފައި ވާއިރު ސްރިނިވަސަން ބުނީ އެކަން އެގޮތަށް ކުރީ އަނބިމީހާ އަށް ހަމަލާދީގެން އުޅޭ ތަނަށް ފުލުހުން ދިއުމުން އެކަމާ ބިރުން ކަމަށެވެ.

ސްރިނިވަސަން ބަންދުގައި ބަހައްޓައިދޭން އެދި ފުލުހުން ކޯޓުގައި މިއަދު ދިން ބަޔާނުގައި ބުނީ ހާދިސާ ހިނގައިގެން އުޅުނު ތަނަށް ދިޔައިރު އެތަނުގައި ގިނަ އަދަދަކަށް ލޭ ހުރި ކަމަށާއި ގޭތެރެއިން ދެ ވަޅި ފެނުނު ކަމަށެވެ. އަދި އޭގެ ތެރެއިން އެއް ވަޅީގެ ތިލަ ނެތް ކަމަށް ވެސް ބުނެފައިވެ އެވެ.

"މިހާރު" އަށް އެނގިފައިވާ ގޮތުގައި އަންހެން މީހާ ހޮސްޕިޓަލަށް ގެންދިޔައިރު ހެރިފައި އިން ވަޅީގެ މުއްގަނޑެއް ނެތެވެ. ހެރިފައި އިނީ ތިލަ އެވެ. އެހެންވެ ބެލެވޭ ގޮތުން، ގޭތެރެއިން ފެނުނު ތިލަ ނެތް ވަޅި އަކީ އެއީ އެވެ.

ފުލުހުން ކޯޓުގައި ބުނި ގޮތުގައި އަންހެން މީހާ ހޮސްޕިޓަލަށް ގެންގޮސް ބެލި އިރު ފައިގެ ފަލަމަސްގަނޑުގައި ދެ ޒަހަމެއް ހުއްޓެވެ. އަދި ފަލަމަސްގަނޑު ތެރޭ ވަޅިއެއްގެ ތިލަ އޮތްތަން އެކްސްރޭ އިން ފެނެ އެވެ. ފިރިހެން މީހާ އަމިއްލަ ބަނޑަށް ހެރީ ފުލުހުން ސީނަށް ދިޔައިރު ވެސް ފިރިހެން މިހާ އަތުގައި އޮތް ވަޅިން ކަމަށް ވެސް ފުލުހުން ބުނެފައިވެ އެވެ.

ކޯޓުން ވަނީ މުޖުތަމައުގެ ސަލާމަތާއި ރައްކަލަށްޓަކައި ސްރިނިވަސަން ތަހުގީގަށް 15 ދުވަހު ބަންދުގައި ބަހައްޓަން އަމުރުކޮށްފަ އެވެ.

އަނބިމީހާ ޒަހަމްކޮށްލި މައްސަލަ ފުލުހުންނަށް ހުށަހަޅާފައި ވަނީ މިއަދު ހެނދުނު 6:20 ހާއިރު އެވެ. ފުލުހުން ގޮސް އަންހެން މީހާ ގެއިން ނެރެގެން ގެންދިޔަ މަންޒަރު ފެންނަ ވީޑިއޯގައި، އަންހެން މީހާގެ ހެދުމުގެ ތިރި އޮތީ ލެއިން ތަތްތެޅިފަ އެވެ. ހަނި ލަކުޑި ސިޑިއަކުން ތިރިއަށް ބާލައިގެން އޭނާ ގެންދިޔައިރު ރޮއެ ގިސްލާ އަޑު ވެސް އިވެ އެވެ.