އެހެން ގައުމުތަކުގައި ވެސް ހުންނަ ފަދަ "ހައިޕަމާކެޓް" ގޮތަށް ވިޔަފާރި ބައްޓަންކޮށް، މުޅިން އާ ކޮންސެޕްޓަކާއެކު އެސްޓީއޯ ޕީޕަލްސް ޗޮއިސް ރޭ ހުޅުވައިފި އެވެ.
އެސްޓީއޯ ޓްރޭޑް ސެންޓަރުގައި ބޭއްވި ހާއްސަ ރަސްމިއްޔާތެއްގައި އެ ފިހާރަ ހުޅުވައިދެއްވީ ނައިބު ރައީސް ފައިސަލް ނަސީމާއި އެސްޓީއޯގެ މެނޭޖިން ޑިރެކްޓަރު ހުސައިން އަމްރު އަދި އެ ފިހާރައިގައި މުދާ ވިއްކާ ކުންފުނިތަކުގެ އިސްބޭފުޅުންނެވެ.
ސުޕަމާޓް ބަދަލުކޮށް، ޕީޕަލްސް ޗޮއިސް އަލުން ހުޅުވީ ކުރިއަށް ވުރެ ތިން ގުނަ ޖާގަ ބޮޑު ކުރުމަށް ފަހު އެވެ. އެ ތަން ބޮޑުކުރީ އެސްޓީއޯއިން ވިއްކާ މުދަލުގެ އިތުރުން އަމިއްލަ ވިޔަފާރިތަކަށް ވެސް މުދާ ވިއްކުމުގެ ފުރުސަތު ދިނުމަށެވެ.
ހައިޕަމާކެޓް ކޮންސެޕްޓްގައި އެއް ފުރާޅެއްގެ ދަށުން ގިނަ މުދާތަކެއް ލިބެން ހުންނާނެ އެވެ. މި ކޮންސެޕްޓާއެކު އެސްޓީއޯއިން ވަނީ އަމިއްލަ ވިޔަފާރިވެރިންނަށް ޕީޕަލްސް ޗޮއިސްގައި ތަކެތި ވިއްކުމަށް ޖާގަ ދީފަ އެވެ.
ރޭގެ ރަސްމިއްޔާތުގައި ނައިބު ރައީސް ފައިސަލް ވިދާޅުވީ، ރާއްޖޭގެ އިގްތިސާދު ކުރިއަރާނީ އަމިއްލަ ވިޔަފާރިތައް ކުރިއަރުވަން ފުރުސަތު ދީގެން ކަމަށް ވާއިރު، އެސްޓީއޯ އިން ކުރަނީ ވަރަށް މުހިންމު މަސައްކަތެއް ކަމަށެވެ. އޭގެ ސަބަބުން އަމިއްލަ ވިޔަފާރިތައް ފުޅާކުރުމުގެ ފުރުސަތު ލިބި، އެސްޓީއޯ އަށް ވިޔަފާރި ކުރަންދާ މީހުންނަށް ވެސް ފަސޭހަ ވާނެ ކަމަށް އެ މަނިކުފާނު ވިދާޅުވި އެވެ.
"އެހެނިހެން ވިޔަފާރިތަކަށް އެސްޓީއޯއާ ގުޅިގެން ޕާޓްނާޝިޕް ހަދައިގެން ކުރިއަށް ދެވޭނެ ފުރުސަތު ފަހިވެގެން މި ދަނީ. އަޅުގަނޑަށް ހީވަނީ މިއީ ވަރަށް މުހިންމު ކަމެއް ހެން. ޕްރައިވެޓް ސެކްޓާ ވަރުގަދަ ކުރުމަށް އަޅުގަނޑުމެން ހުރިހާ ގޮތަކުން ވެސް މަސައްކަތް ކުރަން ޖެހޭ،" ނައިބު ރައީސް ވިދާޅުވި އެވެ.
"ގައުމުގެ އިގްތިސާދު ކުރިއަރައިގެން މި ދަނީ ޕްރައިވެޓް ސެކްޓާއާ ގުޅިގެން މަސައްކަތް ކޮށްގެން."
އެސްޓީއޯގެ މެނޭޖިން ޑިރެކްޓަރު އަމްރު ވިދާޅުވިގޮތުގައި، އެ ކުންފުނިން މަސައްކަތް ކުރަނީ ސަރުކާރުގެ އަމާޒާ އެއްގޮތަށް އަމިއްލަ ވިޔަފާރިތައް ފުރުސަތުތައް ފަހިކޮށްދިނުމަަށެވެ. އެސްޓީއޯ ޕީޕަލްސް ޗޮއިސްގައި މިވަގުތު 8 ވިޔަފާރިއަކުން މުދާ ވިއްކި ނަމަވެސް ކުރިމަގުގައި އިތުރު ވިޔަފާރިތަކަށް ވެސް އެ ފުރުސަތު ލިބޭނެ ކަމަށް އޭނާ ވިދާޅުވި އެވެ.
"ސަރުކާރުގެ ސިޔާސަތަކީ އާ ވިޔަފާރިތަކަށް ފުރުސަތުތައް ފޯރުކޮށްދީ، ސަރުކާރުން ކުރާ ވިޔަފާރިތައް މަދުކުރުން. އެހެންވެ، އަޅުގަނޑަށް ލިބޭ ހިތްހަމަ ޖެހުމަކީ ޕީޕަލްސް ޗޮއިސްގައި އާއްމު ވިޔަފާރިތަކުން އަޅުގަނޑުމެންނާ ގުޅޭކަން. މިކަމުގެ ބައިވެރިވާން އިތުރު ވިޔަފާރިތަކުން ވެސް އަޅުގަނޑުމެންނަށް ކޯލުތައް އެނބަ އާދޭ،" އަމްރު ވިދާޅުވި އެވެ.
އެތައް ދުވަހެއްގެ އުއްމީދު ނިމުމަކަށް
އެސްޓީއޯ ޕީޕަލްސް ޗޮއިސްއަކީ މާލޭގެ ގިނަ ބަޔަކު ވިޔަފާރި ކުރާ ފިހާރައަކަށް ވުމުން އެ ތަނުގައި މުދާ ވިއްކަން ގިނަ އަދަދެއްގެ އަމިއްލަ ވިޔަފާރިތަކުން ބޭނުންވެ އެވެ. މިހާރު 8 ވިޔަފާރިއަކަށް އެ ތަނުގައި މުދާ ވިއްކަން ޖާގަ ދީފައިވާއިރު، އެ ވިޔަފާރިތަކުން ދެކެނީ އެއީ ލިބުނު ރަނުގެ ފުރުސަތެއްގެ ގޮތުގަ އެވެ.
އެސްޓީއޯ ޕީޕަލްސް ޗޮއިސްގައި މިހާރު ހުޅުވާފައިވާ އަމިއްލަ ވިޔަފާރިތަކުގެ ތެރޭގައި ސިޓީ ބޭކަރީ އާއި ނޯޓް ކޮސްމެޓިކްސް އާއި ޕީކަބޫ އާއި މެކްސްކޮމް ޓެކްނޮލޮޖީސް އާއި ދަ މެރެތޮން ޝޮޕާއި އަސްރަފީ އާއި ޕޮއިސް އަދި މަޑިހާ ހިމެނެ އެވެ.
އެސްޓީއޯ ސުޕަމާޓާއި ހޯމް އިމްޕްރޫވްމަންޓާއި ބޭސް ފިހާރައިގެ ހިދުމަތް ވެސް ޕީޕަލްސް ޗޮއިސް އިން މިހާރު ލިބޭނެ އެވެ.
ޕީޕަލްސް ޗޮއިސްގައި މޭކަޕް ވިއްކަން ޖާގަ ލިބުނު ނޯޓް ކޮސްމެޓިކްސްގެ ކަންޓްރީ މެނޭޖަރު އިސްމާއިލް އަޒްމީ އަދުނާން ވިދާޅުވީ، އެސްޓީއޯ އިން ގެނައި ބަދަލު ރާއްޖޭގެ ވިޔަފާރިތަކުން ފެނުމަށް އުއްމީދު ކުރައްވާތާ 10 އަހަރަށް ވުރެ ގިނަ ދުވަސް ވެދާނެ ކަމަށެވެ. އެއީ ވިޔަފާރިތަކަށް ވަރަށް ބޭނުންތެރި ބަދަލެއް ކަމަށާއި އޭގެ ސަބަބުން ކުދި ވިޔަފާރިތަކާއި ބްރޭންޑުތައް އަދި އަމިއްލަ ވިޔަފާރިތައް ވަރަށް ބޮޑަށް ކުރިއަރާނެ ކަމަށް އޭނާ ވިދާޅުވި އެވެ.
"އިންޓަނޭޝަނަލް ބައިވަރު ސްޓޯތަކުގައި މި ގޮތަށް މޮނޯ ސްޓޯތައް ހުރޭ. މިއީ އަޅުގަނޑުމެން ކުރިން ފެށިގެން ވެސް ވަރަށް ބޭނުން ވެފައި އޮތް ކަމެއް. މީގެ ސަބަބުން އެތައް ބަޔަކަށް އަޅުގަނޑުމެންގެ ބްރޭންޑް އިޝްތިހާރުވެ، ކަސްޓަމަރުންނަށް މޭކަޕް ޓެސްޓް ކޮށްލުމުގެ ފުރުސަތު ވެސް ލިބިގެން އެބަދޭ،" އަޒްމީ ވިދާޅުވި އެވެ.
ސިޓީ ބޭކަރީ ހިންގާ ސިޓީ އިންވެސްޓްމަންޓުގެ އޮޕަރޭޝަންސް މެނޭޖަރު އަބްދުﷲ ޒުހައިރު ވިދާޅުވިގޮތުގައި، އެ ބޭކަރީގެ ތަނެއް އެސްޓީއޯ ޕީޕަލްސް ޗޮއިސްގައި ހުޅުވުމުގެ ސަބަބުން ވިޔަފާރި ކުރިއަރާނެ ކަމަށް ލަފާ ކުރެވޭ ކަމަށެވެ.
"އަޅުގަނޑުމެންނަކީި މާލެ އަށް ބަލާއިރު އެންމެ ބޮޑު އެއް ބޭކަރީ. މިއީ އަޅުގަނޑުމެންނަށް ލިބުނު ވަރަށް ބޮޑު އޮޕޯޗުނިޓީއެއް. އަޅުގަނޑަށް އެނގިފައި އޮތް ގޮތުން ވިއްޔާ ގާތްގަނޑަކަށް 2،000 މީހުން މި ތަނަށް ވަދޭ. އެއީ ވިޔަފާރި އަށް ލިބޭނެ ވަރަށް ބޮޑު ކުރިއެރުމެއް،" އޭނާ ވިދާޅުވި އެވެ.
އެސްޓީއޯ އިން ގެނައި މި ބަދަލުގެ ސަބަބުން އަމިއްލަ ވިޔަފާރިތަކުން ވަކި ފިހާރައެއް ހުޅުވުމަށާއި އެ ތަން ޒީނަތްތެރި ކުރަން ކުރަންޖެހޭ ހަރަދު ވެސް ވަރަށް ބޮޑުތަނުން ކުޑަވާނެ އެވެ.