ޅ. ނައިފަރުން ދޫކުރި 100 ފްލެޓަށް ޝަރުތު ހަމަވުމަކީ، ވޭތުވެދިޔަ 15 އަހަރުގެ ތެރޭގައި ވެސް ލިބުނު އަހްމަދު މުހައްމަދަށް [އަސްލު ނަމެއް ނޫން] ލިބުނު އެންމެ ބޮޑު އުފަލެވެ. ދެ ކުދިންނާ އެކު ދަތި ދިރިއުޅުމުން އަރައިގަނެވުނީ ކަމުގެ އިހްސާސެކެވެ. އެ ރަށުގެ 800 މީހުން ކުރިމަތިލައި ދާއިމީ ލިސްޓުގައި ނަން އިއުލާންކޮށް ފްލެޓްތައް ހަވާލުކުރަން ފެށުމާ އެކު ވީ އުފަލުން ރިސޯޓުން ޗުއްޓީ ވެސް ނެގީ އެވެ. އެއްބަސްވުމުގައި ސޮއިކޮށް އަނބިދަރިން އެތަނަަށް ވައްދައި ރޯދައަށް ކަންކަން ހަމަޖެއްސުމަށް ފަހު އެނބުރި ރިސޯޓަށް ފުރާށެވެ.
"ލޯންޗުގައި އިންދައި ސިޓީ ލިބެނީ އެއްބަސްވުމުގައި ސޮއިކުރުން މަޑުޖައްސައިފީމޭ. އޭގެ ފަހުން މަހެއްވި އިރު ވެސް ފްލެޓް ވީ ވާނުވާގައި،" އޭނާ ކިޔައިދިނެވެ.
"ތިން އަހަރު ކުލި ދައްކަމުން އުޅުނު ތަނަށް މި މަހު ނުކުންނަން ނޯޓިސް ވެސް ދީގެން މިއުޅުނީ. ފާޑަކަށް މަގުމަތިވެފައި މިހުރީ."
އަހްމަދާ އެކު 10-12 އާއިލާގެ ފްލެޓެއް އަދި ހަވާލެއް ނުކުރެ އެވެ. އެއްބަސްވުމުގައި ސޮއިކުރުން އޮތީ މަޑު ޖައްސާލައިފަ އެވެ. ވެގެން އުޅޭ ގޮތެއް ކައުންސިލުން ސާފުކޮށް ނުދީ، އެދެނީ ހައުސިން މިނިސްޓްރީއަށް ގުޅާށެވެ.
އަހްމަދު ބުނި ގޮތުގައި ހައުސިންއަށް އޭނާ ލިއުނު ސިޓީއަކަށް މިހާތަނަށް ޖަވާބެއް ނުލިބެ އެވެ.
"އެކި ގޮތްގޮތުން އޮޅުންފިލުވިއިރު އަހަރެންނަށް މި ދިމާވާ މައްސަލައަކީ މާމަގެ ގޯތިން ހިބައިން ތަންކޮޅެއް ދޭނެ ކަމަށް ބުނާތީ. އެކަމަކު މާމަ ކޯޓުގައި ވެސް ބުނެފި ހިބައިން ދީފައެއް ނޯންނާނެ ކަމަަށް. އެހެންވީމަ ފްލެޓް ހަވާލުނުކޮށް ލަސްވާން ޖެހޭ ސަބަބެއް ނެތް،" އޭނާ ވިދާޅުވި އެވެ.
މި ހުރިހާ ކަމެއް ބަލަން ޖެހޭނީ އޭނާ ބުނި ގޮތުގައި ދިރިއުޅުމުގެ ހާލަތު ބަލައި ލިސްޓް އާއްމުކުރުމުގެ ކުރިންނެވެ.
"މިހެންވީމަ ދެން ނަފްސާނީ ގޮތުންނާއި މާލީ ގޮތުން ވެސް ގެއްލުންތަކެއް މިވަނީ. އަޅުގަނޑު ކުއްޔާއި ބިލްތަކާ އެކު މަހަކަށް 9،000 ހަރަދުކޮށްގެން މިއުޅެނީ. މިއަށް ވުރެން ދަތި ހާލުގައި އުޅޭ އާއިލާތައް ފްލެޓް ހަވާލުނުކޮށް ލަސްވާ މީހުންގެ ތެރޭގައި އެބަތިބި،" އޭނާ ބުންޏެވެ.
ޕީޕީއެމްގެ މެޖޯރިޓީ އޮންނަ ކައުންސިލުން ބުނީ ފްލެޓްތަކެއްގެ އެއްބަސްވުމުގައި ސޮއިކުރުން މަޑުޖެހިފައި އޮތް ސަބަބު އެނގޭނީ ހައުސިން މިނިސްޓްރީއަށް ކަމަށެވެ.
މިނިސްޓްރީން މަސައްކަތް ކުރަނީ ރޯދައިގެ ކުރިން ހަވާލުކުރަން
ސްޓޭޓް މިނިސްޓަރު އަކްރަމް ކަމާލުއްދީން މިއަދު ވިދާޅުވީ ނައިފަރު ފްލެޓްތަކުގެ ދާއިމީ ލިސްޓުތައް އިއުލާންކުރި ފަހުން އިދާރީ ބައެއް ކަންކަން ފާހަގަވެގެން ބަލަމުން އަންނަ ކަމަށެވެ. މިނިސްޓްރީން އެކަމާ ހަވާލުވީ ކައުންސިލްގައި ކެޕޭސިޓީ ނެތިގެން ކަމަށާއި އެކަން ލަސްވީ މިނިސްޓްރީން ބުނާ ގޮތުގައި ކައުންސިލްގެ ވެސް ބައެއް ކަންކަމާ ހެދި އެވެ.
"އަޅުގަނޑުމެން ލީގަލް ޕްރޮސެސް މި ކުރިއަށް ގެންދަނީ. އިދާރީ ކުށްތަކެއް ހުރީ އޭގައި. އެކަންކަން ރަނގަޅުވިހާ އަވަހަކަށް ދޫކުރާނެ،" އަކްރަމް ވިދާޅުވި އެވެ.
އޭނާ ވިދާޅުވި ގޮތުގައި ރޯދައިގެ ކުރިން ފްލެޓްތަކުގެ އެއްބަސްވުންތަކުގައި ސޮއިކުރެވޭތޯ ބަލާނެ އެވެ.
ނައިފަރު ކައުންސިލުން ބުނީ ބައެއް އާއިލާތަކުން އަންނަނީ ފްލެޓްތަކުގައި ދިރިއުޅުމުގެ ތައްޔާރީތައް ވަމުން ކަމަށެވެ. އުއްމީދަކީ ރޯދަ އަށް އެތަނުގައި ދިރިއުޅެން ފެށުމެވެ. އެ ފްލެޓުތަކާ އެކު އެ ރަށުގެ 600 އަށް ވުރެ ގިނަ މީހުންގެ ދިރިއުޅުން އެތަނަށް ބަދަލުވެގެންދާނެ އެވެ.
މި ފުލެޓުތަކަށް މަހު ކުލީގެ ގޮތުގައި 5،000ރ. ދައްކަން ޖެހެ އެވެ. އެއީ 20 އަހަރަށް ބަހާލައިގެން ޖުމްލަ 1.2 މިލިއަން ރުފިޔާ އެވެ.