އިންޑިއާގެ އެހީގައި އައްޑޫގައި ހަދާފައިވާ ޕޮލިސް އެކެޑަމީ ނުވަތަ "އިންސްޓިޓިއުޓް އޮފް ސެކިއުރިޓީ އެންޑް ލޯ އެންފޯސްމަންޓް ސްޓަޑީޒް" މިއަދު ހުޅުވައިފި އެވެ.
އެ ތަމްރީން މަރުކަޒު ހުޅުއްވައިދެއްވީ ރައީސް އިބްރާހިމް މުހައްމަދު ސޯލިހާއި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރެވެ.
މިއީ އިންޑިއާ ސަރުކާރުން 18 މިލިއަން ޑޮލަރު ހޭދަކޮށްގެން ހަދާފައިވާ ތަނެކެވެ. މި ތަނުގައި ފުލުހުންގެ ޓްރޭނިން އެކެޑަމީއެއްގައި ހުންނާނެ ހުރިހާ ވަސީލަތްތަކެއް ހިމެނޭ ގޮތަށް، މި ސަރަހައްދުގައި ވެސް ގާއިމުކުރާ އެންމެ ފެންވަރު ރަނގަޅު ޕޮލިސް އެކެޑެމީއަށް ވާނެ ކަމަށް ދިވެހި ފުލުހުން ބުނެފައިވެ އެވެ.
އެކެޑަމީގައި ހިމެނޭ ވަސީލަތްތައް:
- ފެންވަރު ރަނގަޅު އެކޮމަޑޭޝަން ބްލޮކްތައް/ ކްލިނިކެއް.
- ޕީޓީ ގްރައުންޑާއި ހެލިޕޭޑާއި ޓްރެއިނިން ސެންޓަރެއް.
- 800 މީހުންގެ ޖާގައިގެ ޖިމަކާއި ފުޓްބޯޅަ ދަނޑަކާއި ބާސްކެޓް ކޯޓަކާއި ޓެނިސް ކޯޓެއް
- 400 މީޓަރުގެ ޓްރެކާއި 340 މީހުންގެ އޮޑިޓޯރިއަމެއް
- 40 މީހުންގެ ޖާގަ ހިމެނޭ ގޮތަށް 320 މީހުންނަށް ކިޔަވައިދެވޭ ކްލާސްރޫމް
ޕޮލިސް އެކެޑަމީގެ ކޮންޓްރެކްޓަރަކީ އިންޑިއާގެ ސްރީ އަވަންތިކާ ކޮންޓްރެކްޓާސް ލިމިޓެޑެވެ. އެ ކުންފުނިން އެތަނުގެ މަސައްކަތް ފެށީ 2017 ގަ އެވެ.
އިންޑިއާ ސަރުކާރުގެ ހިލޭ އެހީގައި ޕޮލިސް އެކެޑަމީ ހެދި ނަމަވެސް އެތަން ހިންގުމުގެ ހުރިހާ ބާރަކާއި އެތަނާ ގުޅުން ހުރި ހުރިހާ ކަމެއް ހިންގާނީ ދިވެހި ފުލުހުންނެވެ.
އެތަން ހުޅުވުމުގެ ރަސްމިއްޔާތުގައި ކޮމިޝަނާ އޮފް ޕޮލިސް މުހައްމަދު ހަމީދު ވަނީ އިންޑިއާ އިން ފަންޑުކޮށްގެން ރާއްޖޭގައި އެންމެ ޒަމާނީ ފެންވަރުގެ އެކަޑަމީއެއް ތަރައްގީކޮށްދެއްވުމުން އެކަމަށް ޝުކުރު އަދާކުރައްވައިފަ އެވެ.
އިންޑިއާ އާއި ރާއްޖޭ ގުޅުން ފާހަގަކުރައްވަމުން ސީޕީ ހަމީދު ވިދާޅުވީ އެ މަރުކަޒުގެ ސަބަބުން ދިވެހި ފުލުހުންގެ ހުނަރުތައް އިތުރަށް ތަރައްގީވުމަށް މަގުފަހިވެގެންދާނެ ކަމަށެވެ. އަދި ފުލުހުންގެ ތަހުގީގީ މަސައްކަތްތަކުގައި ކުރިން އެތައް ދައްޗެއް ހުރި ނަމަވެސް އެ މަރުކަޒާ އެކު އެކަހަލަ ދަތިތަކަށް ވެސް ހައްލެއް ލިބިގެންދާނެ ކަމަށް އޭނާ ވިދާޅުވި އެވެ.
"ވަރަށް އުފާވޭ މި ދުވަސް ދެކެން. އަޅުގަނޑަކީ ފުލުހުންގެ ހިދުމަތުގައި އެތައް ދުވަސްތަކެއްވީ މީހަކަށްވާއިރު ފުލުހުންގެ ހިދުމަތަށް އަންނަ ބަދަލުތައް ގާތުން ދެކެފިން. ކުރިން އެތައް ދަތިތަކެއް ކުރިމަތިވޭ ތަހުގީގުތައް ކުރުމުގައި،" ހަމީދު ވިދާޅުވި އެވެ.
ފުލުހުންނާއި ރާއްޖޭގެ އެހެން އެންފޯސްމަންޓް އިދާރާތައް ގުޅިގެން އެތަނުގައި ރަނގަޅު ޓްރޭނިންތަަކެއް ބާއްވާނެ ކަމުގެ އުއްމީދުކުރައްވާ ކަމަށް ހަމީދު ވިދާޅުވި އެވެ.
ހޯމް އެެފެއާޒްގެ ދަށަށް ފުލުހުންގެ ހިދުމަތް ބަދަލުކޮށް މަސައްކަތް ފެށިއިރު 300 ފުލުހުން މަސައްކަތްކުރަމުން އައި ނަމަވެސް މިހާރު އޭގެ ދިހަ ގުނަ އިތުރު އަދަދަކަށް އެ މުއައްސަސާގައި ފުލުހުން އެބަ ތިއްބެވެ.
އެންމެ ފުރަތަމަ ފުލުހުންގެ ޓްރެއިނިންތައް ކ. ގިރިފުށީގައި އަދި ހިންމަފުއްޓާ އެކި ތަންތަނުގައި ބާއްވަމުން އައި ނަމަވެސް އެ އެކަޑަމީއާ އެކު ފުލުހުންގެ ޓްރެއިނިންތައް ބާއްވާނީ އެ މަރުކަޒުގަ އެވެ.
