ރާއްޖޭގެ ގައުމީ ޔުނިވާސިޓީ (އެމްއެންޔޫ) އިން މި އަހަރުގެ ފުރަތަމަ ޓާމުގައި ކިޔަވާ 12 ދަރިވަރަކަށް ސްކޮލަޝިޕް މިއަދު ދީފި އެވެ.
އެމްއެންޔޫގައި ބޭއްވި ރަސްމިއްޔާތެއްގައި ދަރިވަރުންނާ ސްކޮލަޝިޕްތައް ހަވާލު ކޮށްދެއްވީ ވައިސް ޗާންސެލާ ޑރ. މުހައްމަދު ޝަރީފެވެ. އެ ރަސްމިއްޔާތުގައި ޔުނިވާސިިޓީގެ އިސް ބޭފުޅުން ބައިވެރިވެވަޑައިގެންނެވި އެވެ.
އަލަށް ކޯސްތަކަށް ވަންނަ ދަރިވަރުންގެ ތެރެއިން އެމްއެންޔޫއިން ސްކޮލަޝިޕް ދެނީ ކިޔެވުމަށް މޮޅު ނަމަވެސް މަތީ ފެންވަރަށް ކިޔަވަން ދަތިވާ ދަރިވަރުންނަށެވެ. ކޮންމެ ޓާމެއްގައި ވެސް އެ ފުރުސަތު އެމްއެންޔޫއިން ހުޅުވާލަ އެވެ.
މި އަހަރުގެ ފުރަތަމަ ޓާމުގައި އެ ޔުނިވާސިޓީން ތިން ސްކޮލާޝިޕަކަށް 24 ފުރުސަތު ހުޅުވާލި އެވެ. އެއީ ޓިއުޝަން ފީ ހިލޭ ކޮށްދޭ ސްކޮލަޝިޕާއި އަންޑަ ގްރެޖުއޭޓް އަދި ޕޯސްޓް ގްރެޖުއޭޓް ފުލް ސްކޮލަޝިޕްތަކެވެ.
ޔުނިވާސިޓީން ޓިއުޝަން ފީ ހިލޭ ކޮށްދޭ ސްކޮލަޝިޕްގެ ދަށުން 20 ފުރުސަތު ހުޅުވާލި އިިރު 111 ދަރިވަރުން ކުރިމަތި ލި އެވެ. އަންޑަ ގްރެޖުއޭޓްގެ ދެ ފުރުސަތަށް 73 ދަރިވަރުން އަދި ޕޯސްޓް ގްރެޖުއޭޓްގެ ދެ ފުރުސަތަށް 38 ދަރިވަރުން ކުރިމަތިލި އެވެ.
އެ ފުރުސަތުގެ ދަށުން ކުރިމަތިލި ދަރިވަރުންގެ ތެރެއިން ސްކޮލަޝިޕް ދިނީ 12 ދަރިވަރަކަށެވެ. އެއީ އަންޑަ ގްރެޖުއޭޓްގެ ދެ ސްކޮލަޝިޕާއި ޕޯސްޓް ގްރެޖުއޭޓްގެ ދެ ސްކޮލަޝިޕާއި ޓިއުޝަން ފީ ހިލޭ ކޮށްދޭ އަށް ސްކޮލަޝިޕެވެ.