އެމްއެންޔޫގެ ސްކޮލަޝިޕް ސްކީމްގެ ދަށުން 2022 ވަނަ އަހަރުގެ ދެވަނަ ޓާމަށް ހުޅުވާލި ސްކޮލަޝިޕަށް ހޮވުނު ދަރިވަރުންނަށް ސްކޮލާޝިޕް އެވޯޑުކޮށްފި އެވެ.
ސްކޮލާޝިޕް ލިބުނު ދަރިވަރުންނަށް ސްކޮލާޝިޕް އެވޯޑު ކޮށްދެއްވީ އެމްއެންޔޫގެ ޗާންސެލާ ޑރ. ހަސަން ހަމީދެވެ. ޔުނިވާސިޓީއިން ސްކޮލަޝިޕް ދީފައި ވަނީ، އެ ފުރުސަތަށް އެދި ހުށަހެޅި ދަރިވަރުންގެ ތެރެއިން އެންމެ މަތީ ނަތީޖާ ހޯދާފައިވާ ނުވަ ދަރިވަރަކަށެވެ.
އެމްއެެންޔޫއިން ބުނީ، ޔުނިވާސިޓީގެ ދަރިވަރުންގެ ސްކޮލާޝިޕަކީ ޔުނިވާސިޓީ ކައުންސިލުން ތައާރަފުކޮށްފައިވާ ސްކޮލާޝިޕެއް ކަމަށެވެ. އަދި އެ ސްކޮލާޝިޕުގެ އަމާޒަކީ، ތައުލީމީ މަަތީފާސް ހޯދާ ދަރިވަރުންގެ ތެރެއިން، މަތީ ފެންވަރަށް ކިޔެވުމަށް ދަތިވާ ފަރާތްތަކަށް އެހީތެރިވުމުގެ ގޮތުން ދޭ ސްކޮލާޝިޕެއް ކަމަށް އެމްއެންޔޫއިން ބުނެއެވެ.
އެމްއެންޔޫގެ ސްކޮލާޝިޕް ސްކީމުތައް ބަހާލައިފައި ވަނީ ތިން ގިންތި އަކަށެވެ. އެއީ، ޔުނިވާސިޓީ އަށް ދަރިވަރުން ދައްކަން ޖެހޭ ފީ އިސްތިސްނާކޮށްދޭ އަންޑަގްރެޖުއެޓް އަދި ޕޯސްޓްގްރެޖުއެޓް ޕްރޮގްރާމުތަކަށް އަމާޒުކޮށް ޓިއުޝަން ފީ ހިލޭ ކޮށްދޭ ސްކޮލާޝިޕާއި، ދަރިވަރުން ހަދާ ކޯސް އެއްކޮށް ނިމެންދެން ފައިސާގެ އެލަވަންސެއް ދޭ އަންޑަގްރެޖުއޭޓް ފުލް ސްކޮލަޝިޕަކާއި، ދަރިވަރުން ހަދާ ކޯސް އެއްކޮށް ނިމެންދެން ފައިސާގެ އެލަވަންސެއް ދޭ ޕޯސްޓު ގްރެޖުއެޓް ފުލް ސްކޮލާޝިޕެވެ.
އެމްޔޫއިން ބުނީ އެ ސްކީމުގެ އިތުރުން އެ ޔުނިވާސިޓީއިން ދޭ "ޝަހީދު އެވޯޑު"ގެ ދަށުން ވެސް ސްކޮލާޝިޕުގެ ފުރުސަތަށް ދަރިވަރުންނަށް ހުޅުވާލި ކަމަށެވެ.
އެމްއެންޔޫއިން ބުނީ މި ފަހަރު ހުޅުވާލި ޓިއުޝަން ފީ ހިލޭ ދޭ ސްކޮލަޝިޕްގެ 20 ފުރުސަތަށް 75 ދަރިވަރުން ކުރިމަތިލި ކަމަށެވެ. އަދި އަންޑަގްރެޖުއޭޓް ސްކޮލަޝިޕުގެ ދެ ފުރުސަތަށް 41 ދަރިވަރުން ކުރިމަތިލާފައިވާއިރު ޕޯސްޓް ގްރެޖުއޭޓް ސްކޮލަޝިޕްގެ ދެ ފުރުސަތަށް 33 ދަރިވަރުން ކުރިމަތިލާފައިވާ ކަމަށް ބުންޏެވެ. އަދި ޝަހީދު އެވޯޑުގެ ދަށުން ހުޅުވާލި ފުރުސަތަށް އެދި ހަ ދަރިވަރަކު ހުށަހަޅާފައިވާ ކަމަށް ވެސް އެމްއެންޔޫއިން ބުންޏެވެ.
ސްކޮލަޝިޕް ސްކީމުތަކަށް ދަރިވަރުން ހޮވުނު އަދަދު
- އަންޑަގްރެޖުއޭޓް ފުލް ސްކޮލަޝިޕް- ދެ ދަރިވަރެއް
- ޕޯސްޓްގްރެޖުއޭޓް ފުލް ސްކޮލަޝިޕް- ދެ ދަރިވަރެއް
- އަންޑަގްރެޖުއޭޓް ޓިއުޝަން ފީ ފްރީ ސްކޮލަޝިޕް- އެއް ދަރިވަރަކު
- ޕޯސްޓް ގްރެޖުއޭޓް ޓިއުޝަން ފީ ފްރީ ސްކޮލަޝިޕް- ދެ ދަރިވަރެއް
- ޝަހީދު އެވޯޑު- ދެ ދަރިވަރުން
އެމްއެންޔޫއިން މި ފަހަރު ހުޅުވާލި 24 ސްކޮލަޝިޕުގެ ފުރުސަތަށް 149 ދަރިވަރުން ކުރިމަތިލިއެވެ. އޭގެ ތެރެއިން ސްކޮލާޝިޕު ދީފައިވަނީ ޝަރުތު ހަމަވާ ދަރިވަރުންނަށް ކަމަށް އެމްއެންޔޫއިން ބުނެއެވެ.