ސައުތުހެމްޓަން (މެއި 18) - ސައުތުހެމްޓަންގެ މައްޗަށް ފަހަތުން އަރައި 2-1 ލިވަޕޫލް މޮޅުވުމުން، ޕްރިމިއަ ލީގުގެ ޗެމްޕިއަންކަން ކަށަވަރުކުރަން އެންމެފަހު މެޗަށް އިންތިޒާރުކުރަން ޖެހިއްޖެ އެވެ.
އެއްވަނައިގައި އޮތް މެންޗެސްޓާ ސިޓީ އާއި ލިވަޕޫލާ ދެމެދު ހުރީ ޕޮއިންޓެއްގެ ފަރަގެވެ. ލީގުގެ އެންމެ ފަހު މެޗުގައި އަމިއްލަ ދަނޑުގައި އެސްޓަން ވިލާއާ ދެކޮޅަށް ސިޓީ އަށް މޮޅު ނުވެވި، ވުލްވުސްއާ ދެކޮޅަށް ލިވަޕޫލް ކުޅޭ މެޗުން މޮޅުވެއްޖެނަމަ ލީގު ޗެމްޕިއަންކަން ލިބިގެންދާނީ ލިވަޕޫލަށެވެ. ފަހު މެޗުތައް އޮންނާނީ އަންނަ އާދިއްތަދުވަހުގެ ރޭ ރާއްޖޭ ގަޑިން 10 ޖަހާއިރު އެވެ.
ރޭގެ މެޗަށް، ލިވަޕޫލްގެ ކޯޗު ޔާގަން ކްލޮޕް ވަނީ ގިނަ ބަދަލުތަކެއް ގެނެސްފަ އެވެ. ހޮނިހިރު ދުވަހު ކުޅުނު އެފްއޭ ކަޕް ފައިނަލްގައި ޗެލްސީއާ ދެކޮޅަށް ކުޅުނު ޓީމުގެ ފުރަތަމަ 11 ގައި ހިމެނުނު ކުޅުންތެރިންގެ ތެރެއިން ރޭ ގެ މެޗުގެ ފުރަތަމަ 11 އިން ފުރުސަތު ދިނީ ގޯލް ކީޕަރު އަލިސަން ރެމްސީސް ބެކާ އާއި އިބްރާހިމާ ކޮނާނޭޓޭ އަށެވެ.
ސައުތުހެމްޓަންގެ ސެއިންޓް މެރީ ސްޓޭޑިއަމްގައި ކުޅުނު މެޗުގައި އެޓީމަށް ފުރުތަމަ ލީޑް ނަގައިދިނީ ނަތަން ރެޑްމޮންޑް އެވެ. އެކަމަކު އޭގެ 15 މިނެޓް ފަހުން ޓަކުމީ މިނާމިނޯ ލިވަޕޫލަށް ނަތީޖާ ހަމަހަމަކޮށްދިނެވެ. މެޗުގެ ނަތީޖާ ލިވަޕޫލް ކޮޅަށް އަނބުރާލީ ދެވަނަ ހާފުގައި ޖޮއެލް މާޓިޕް އެވެ.
މެޗަށް ފަހު ވާހަކަ ދައްކަމުން ކްލޮޕް ބުނީ، ލިވަޕޫލަށް ތަފާތު ދެއްކުނީ ގިނަ ބަދަލުތަކެއް ގެނެސްފައި ވުމުން ކަމަށެވެ.
"ފައިނަލް މެޗުގައި 120 މިނެޓް ކުޅުނު ގިނަ ކުޅުންތެރިން އަހަރެން މި މެޗުގައި ހިމެނިނަމަ ވަރަށް ބޮޑު އުނދަގުލަކަށްވީސް،" މިއަހަރު ހަތަރު ތަށި ހޯދުމުގެ އަމާޒުގައި ހުރި ކޯޗު ބުންޏެވެ. "އެކަމަކު ނުވަ ކުޅުންތެރިން ބަދަލުކޮށް މެޗަށް ނެރެ މިފެނުނު ކުޅުމާމެދު އަހަރެން ވަރަށް ހިތްހަމަޖެހޭ."