ލަންޑަން (ޖުލައި 6) - އިނގިރޭސި ޕްރިމިއާ ލީގުގައި ރޭ ލިވަޕޫލުން 2-0 އިން އެސްޓަން ވިލާ ބަލިކޮށް އަމިއްލަ ދަނޑުގައި މޮޅުވުމުގެ ރެކޯޑް ދެމެހެއްޓިއިރު، ރަށުންބޭރުގައި ސައުތެމްޓަނާ ދެކޮޅަށް ކުޅުނު މެޗުން މެންޗެސްޓާ ސިޓީ 1-0 އިން ބަލިވެއްޖެ އެވެ.
ލީގު ޗެމްޕިއަންކަން ކަށަވަރުކުރި ފަހުން ކުޅުނު ފުރަތަމަ މެޗުގައި ބުރާސްފަތި ދުވަހުގެރޭ ލިވަޕޫލް ވަނީ 4-0 އިން ސިޓީ އަތުން ބަލިވެފަ އެވެ. ރޭގެ މެޗުން މޮޅުވެ ލިވަޕޫލުން ވަނީ މި ފަހަރު ލީގުގައި އަމިއްލަ ދަނޑުގައި ކުޅޭ މެޗުތަކުން މޮޅުވެ ސައްތަ އިން ސައްތަ ރެކޯޑް ދަމަހައްޓައިފަ އެވެ. ލިވަޕޫލް ވަނީ މި ސީޒަނުގައި އަމިއްލަ ދަނޑުގައި ލީގުގައި ކުޅުނު 17 މެޗުން މޮޅުވެފަ އެވެ. ލީގުގެ އެއް ސީޒަނެއްގައި އަމިއްލަ ދަނޑު ކުޅުނު ހުރިހާ މެޗަކުން މޮޅުވުމުގެ ރެކޯޑް އޮތީ ސަންޑަލެންޑް އަތުގަ އެވެ. އެ ރެކޯޑަށް ވަނީ 128 އަހަރުވެފަ އެވެ.
ލިވަޕޫލްގެ ކޯޗު ޔާގެން ކްލޮޕް ބުނީ އޭނާ ވިސްނަނީ ކޮންމެ މެޗަކުން ވެސް މޮޅުވާން ކަމަށާއި އަދިވެސް ވިސްނަނީ އެހެން ކަމަށެވެ.
"އަހަރެމެން ކޮންމެ މެޗަކަށް ނުކުތަސް ވިސްނުމަކީ މޮޅުވުން. މެޗަށް އަންނަނީ ރެކޯޑެއް ހެދުމުގެ ވިސްނުމުގައެއް ނޫން. ލީގު ޗެމްޕިއަންކަން ކަށަވަރުވިޔަސް އަދިވެސް އަހަރެމެން މި ބޭނުންވަނީ މޮޅުވާން. ރެކޯޑާއި ދެން ހުރި ނަމްބަރުތަކަށް ބަލަން ބޭނުމީ ސީޒަން ނިމުނީމަ،" ކްލޮޕް ބުންޏެވެ.
އެސްޓަން ވިލާ އިން ވަނީ ރޭގެ މެޗު ފަށައިގެން ލިވަޕޫލް ހިފެހެއްޓުމުގައި ރަނގަޅު ކުޅުމެއް ދައްކައިފަ އެވެ. ފުރަތަމަ ހާފުގައި ލިވަޕޫލްގެ މުހައްމަދު ސަލާހު ފޮނުވާލި ބޯޅައެއް އެސްޓަން ވިލާގެ ކީޕަރު ޕެޕޭ ރެއިނާ ވަނީ ފަސޭހަކަމާ އެކު އަތަށް ނަގައިފަ އެވެ. ލިވަޕޫލުން ދެ ގޯލު ޖެހީ ވެސް ދެ ވަނަ ހާފުގަ އެވެ. ފުރަތަމަ ގޯލު ޖެހީ 71 ވަނަ މިނިޓްގައި ނަބީ ކެއިޓާ ދިން ބޯޅަ އަކުން ސަޑިއޯ މާނޭ އެވެ. މެޗު ނިމެން މިނިޓަކަށް ވެފައި ވަނިކޮށް ލިވަޕޫލްގެ ދެ ވަނަ ގޯލު ޖެހީ ޒުވާން ކުޅުންތެރިޔާ ކާޓިސް ޖޯންސް އެވެ.
އެސްޓަން ވިލާ އަށް ލަނޑެއް ޖަހައިދޭން ކެޕްޓަން ޖެކް ގްރީލިޝް ޖެހި ބޯޅަ ލިވަޕޫލްގެ ކީޕަރު އެލިސަން ބެކާ ވަނީ މަތަކޮށްފަ އެވެ.
ރޭގެ މޮޅާ އެކު ލިވަޕޫލް އެއް ވަނައިގައި އޮތީ 33 މެޗުން 89 ޕޮއިންޓާ އެކު އެވެ. ސިޓީ ދެ ވަނައިގައި އޮތީ 33 މެޗުން 66 ޕޮއިންޓާ އެކު އެވެ. ރޭގެ މެޗަކީ މި ފަހަރު ލީގުގައި ސިޓީ ބަލިވި ނުވަ ވަނަ މެޗެވެ. އަދި ގާޑިއޯލާގެ ކޯޗިން ކެރިއަރުގައި އެއް ސީޒަނެއްގައި ލީގުގައި މި އަދަދަށް ބަލިވި ފުރަތަމަ ފަހަރެވެ.
ސައުތެމްޓަން ރޭގެ މެޗުން މޮޅުކޮށްދޭން ޖެހި ހަމައެކަނި ލަނޑު ކާމިޔާބުކޮށްދިނީ ޗޭ އެޑަމްސް އެވެ. އުމުރުން 23 އަހަރުގެ އެޑަމްސް ޖެހި މި ގޯލަކީ ލީގުގައި އޭނާ ކާމިޔާބުކުރި ފުރަތަމަ ގޯލެވެ. އެޑަމްސް އަށް ފުރަތަމަ ގޯލު ކާމިޔާބުކުރެވުނީ 30 މެޗުން ކަމުގައި ވިޔަސް މިއީ އޭނާ އަދި ކްލަބަށް ވެސް ވަރަށް މުހިއްމު ގޯލެއް ކަމަށް ސައުތެމްޓަންގެ ކޯޗު ރަލްފް ހޭޒަންހަޓަލް ވަނީ ބުނެފަ އެވެ.
ބަދަލުތަކާ އެކު ރޭގެ މެޗަށް ނުކުތް ސިޓީ އަށް ވެސް ވަނީ ލަނޑު ޖަހާނެ ފުރުސަތުތަކެއް ލިބި ބޭކާރުވެފަ އެވެ. ސިޓީގެ ހަމަލާތަށް ދިފާއުކުރުމުގައި ސައުތެމްޓަންގެ ކީޕަރު އަލެކްސް މެކާތީ ވަނީ މޮޅު ކުޅުމެއް ދައްކައިފަ އެވެ.
ރަށުން ބޭރުގައި ޖެހިޖެހިގެން ތިން މެޗުން ބަލިވިއިރު، ރޭގެ މެޗަށް ފަހު ގާޑިއޯލާ ބުނީ އާންމުކޮށް މެޗުތަކުން މޮޅުވާން ސިޓީން ދައްކާ ކުޅުމާ އެއްވަރުގެ ކުޅުމެއް މި މެޗުގައި ވެސް ދެއްކި ކަމަށާއި އެކަމަކު އިދިކޮޅުގައި އޮތް ސައުތެމްޓަންގެ ރޫހު ފެނުނީ އެ އަށް ވުރެން ވަރުގަދަކޮށް ކަމަށެވެ.
