ރާއްޖެ އެތެރެކުރި 29 ކިލޯގެ މަސްތުވާތަކެތި އަތުލައިގެންފި

ޕާކިސްތާނުން ރާއްޖެ ގެނައި ކަމަށް ބެލެވޭ 29 ކިލޯގެ މަސްތުވާތަކެތި އަތުލައިގެނެ ހަތަރު މީހަކު ހައްޔަރުކޮށްފި އެވެ.

މިއީ ފުލުހުން ހިންގި އޮޕަރޭޝަނެއްގައި މިހާތަނަށް އެންމެ ގިނައިން އަތުލައިގަތް މަސްތުވާތަކެތި ކަމަށް މޯލްޑިވްސް ޕޮލިސް ސާވިސް އިން ބުނެ އެވެ. ފުލުހުން ހިންގި އޮޕަރޭޝަނެއްގައި މީގެ ކުރިން 24 ކިލޯގެ މަސްތުވާތަކެތި އަތުލައިގެންފައިވެ އެވެ. އެހެން ނަމަވެސް ކަނޑު އަޑިއަށް ފައްތާފައި ވަނިކޮށް، އާންމުންގެ ބަޔަކު ކުރި ރިޕޯޓަކާ ގުޅިގެން ކުރިން ވަނީ އެއް ޓަނުގެ މަސްތުވާތަކެތި ހޯދައިފަ އެވެ.

އެންމެ ފަހުން މީގެ 4-5 ދުވަސް ކުރިން ފުލުހުން ހިންގި އޮޕަރޭޝަނެއްގައި، ގާތްގަނޑަކަށް 145 މިލިއަން ރުފިޔާގެ އަގު ހުރި މި މަސްތުވާތަކެތި އަތުލައިގެންފައި ވަނީ ދޯންޏެއްގައި ރާއްޖޭގެ ސަރަހައްދުން ނިކުމެ، މަސްތުވާތަކެތި ހިފައިގެން ރާއްޖެ ސަރަހައްދަށް ވަދެގެން އަންނަނިކޮށެވެ. އޭރު ދޯނި އޮތީ އދ. އަތޮޅާ ދިމާލު ބޭރުގަ އެވެ.

މައްސަލައިގައި ހައްޔަރުކުރީ މ.ރަތްކޮކާގެ އަހުމަދު ސަދޫހު ހުސެއިން އާއި ލ.މާމެންދޫ އާސްތާނާ މުހައްމަދު ނިއުޝާދާއި އިތުރު ދެ މީހެކެވެ. ސަދޫހާއި ނިއުޝާދަކީ އާއިލީ ގުޅުމެއް އޮންނަ ދެ މީހުންނެވެ. މި މައްސަލައިގައި ހައްޔަރުކުރި އަނެއް ދެ މީހުންގެ ނަމެއް ފުލުހުން ހާމައެއް ނުކުރެ އެވެ.

އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމުގައި އެސިސްޓަންޓް ކޮމިޝަނާ އޮފް ޕޮލިސް އަބްދުﷲ ނަވާޒް ވިދާޅުވި ގޮތުގައި ސަދޫހު މަސްތުވާތަކެތި އެތެރެ ކުރަން އުޅުނީ ނިއުޝާދު ދުއްވާ ދޯންޏެއްގަ އެވެ. އަދި ނިއުޝާދަށް ފައިސާގެ ބޮޑެތި އަދަދުތަކެއް ހުށަހެޅި ކަމަށް ނަވާޒް ވިދާޅުވި އެވެ.

"މިއީ ރާއްޖޭގެ ކަނޑުގެ ސަރަހައްދުން ބޭރުން ނެގުނު އެއްޗެއް ކަމަށް މައުލޫމާތު ލިބުނީ. އެ (މަސްތުވާތަކެތި) ލައިގެން ދޯނި ހިފެހެއްޓީ ރާއްޖޭގެ ކަނޑުގެ ސަރަހައްދުން،" ނަވާޒް ވިދާޅުވި އެވެ.

ޑްރަގް އެންފޯސްމަންޓް ޑިޕާޓްމަންޓްގެ ހެޑް މޫސާ އަލީ ވިދާޅުވީ ދޯނި ހިފެހެއްޓުމަށް ފަހު ބަލައި ފާސްކުރުމަށް ގެންދިޔައީ ދޫނިދޫ އަށް ކަމަށެވެ.

ދޯނި ބަލައި ފާސް ކުރިއިރު ގޭސް ސިލިންޑަރެއްގެ ތެރެއިން މަސްތުވާތަކެތި ފެނުނު ކަމަށާއި އެތަކެތި ޓެސްޓް ކުރިއިރު، ހިރޮއިން އަށް ޕޮޒިޓިވް ވެފައިވާ ކަމަށް އޭނާ ވިދާޅުވި އެވެ.

ނަވާޒް ވިދާޅުވި ގޮތުގައި ސަދޫހާއި ނިއުޝާދަކީ ވައްކަމާއި ފޭރުމާއި މާރާމާރީ އާއި މަސްތުވާތަކެތި ގެންގުޅުމުގެ ރިކޯޑު އޮންނަ ބައެކެވެ. އަދި ސަދޫހަކީ ބަރޮސް މޯލްޑިވްސް އަށް އަރައި އެ ތަނުގެ ތިޖޫރި ވަގަށް ނެގި މައްސަލައިގައި ހައްޔަރު ކުރި މީހެއް ކަމަށް އޭނާ ވިދާޅުވި އެވެ.

މިއީ ޕާކިސްތާނު މަގުން ރާއްޖެ ގެނައި މަސްތުވާތަކެތި ކަމަށް ބެލެވޭ ކަމަށާއި މިކަމުގައި އިތުރު ބަޔަކު ޝާމިލްވާ ނަމަ، އިންސާފުގެ ކުރިމައްޗަށް ގެނައުމުގެ މަސައްކަތް ކުރާނެ ކަމަށް ނަވާޒް ވިދާޅުވި އެވެ.

މީގެ އިތުރުން ނަވާޒް ވިދާޅުވީ ދޯނީގައި ތިބި މީހުންގެ މައްޗަށް ކުށް ސާބިތު ކުރަން ބޭނުންވާ ވަރަށް ހެކި ލިބިފައިވާ ކަމަށް ގަބޫލުކުރައްވާ ކަމަށެވެ.

ނަވާޒްގެ ވިދާޅުވީ މި އޮޕަރޭޝަން ހިންގުމުގައި ފުލުހުންގެ އެކި ޑިޕާޓްމަންޓާއި އެމްއެންޑީއެފް ކޯސްޓްގާޑު ބައިވެރިވެ ކަނޑުމަތީގައި 48 ގަޑިއިރު ހޭދަކޮށްފައިވާ ކަމަށެވެ.