ހުޅުމާލޭގައި ހިންގި ޑްރަގު އޮޕަރޭޝަނެއްގައި ބައި ކިލޯގެ ޑްރަގާ އެކު ޒުވާނަކު ހައްޔަރުކޮށްފި އެވެ.
ފުލުހުން މިއަދު ބުނީ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން މިދިޔަ ހޯމަ ދުވަހު ހިންގި އެ އޮޕަރޭޝަނުގައި ހައްޔަރުކުރީ ސިފްކޯހިޔާ، އިބްރާހިމް އަމްރު ތައުފީގު ކަމަށެވެ.
ފުލުހުން ބުނި ގޮތުގައި އުމުރުން 22 އަހަރުގެ އެ މީހާ ހައްޔަރުކުރީ "އޮޕަރޭޝަން އަލިމަގު" ގެ ދަށުންނެވެ.
އަމްރުގެ މައްޗަށް ފުލުހުން ކުރާ ތުހުމަތަކީ މަސްތުވާތަކެތި ގެންގުޅެ، އޭގެ ބޭނުންކޮށް އަދި އެ ތަކެތީގެ ވިޔަފާރިކުރުމެވެ.
އޭނާ ހައްޔަރުކޮށް ބަލައިފާސްކުރުމުގެ ތެރެއިން 500 ގްރާމުގެ މަސްތުވާތަކެތި ފެނުނު ކަމަށް ފުލުހުން ބުންޏެވެެ.
އެ މައްސަލާގައި އަމްރުގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ވަނީ ފަސް ދުވަހަށް ބަންދުކުރަން އަމުރުކޮށްފަ އެވެ.