ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު، ގާނޫނީ ވަކީލު ނާޒިމް ސައްތާރަށް ތުހުމަތުކުރާ އެއް ޖިންސުން ގުޅުން ހިންގާ ވީޑިއޯ އާންމުވެ، ފުލުހުން ހިންގާ ތަހުގީގާ ގުޅިގެން އޭނާގެ ޕާސްޕޯޓް މިއަދު ހިފަހައްޓައިފި އެވެ.
ފުލުހުން ބުނީ އެ އިދާރާ އިން ބަލަމުން އަންނަ މައްސަލައަކާ ގުޅިގެން ނާޒިމްގެ ޕާސްޕޯޓް ހިފަހައްޓާފައިވާ ކަމަށެވެ.
ނާޒިމާއި ބިދޭސީ ފިރިހެނަކު ކަމަށް ބެލެވޭ މީހަކު އެއް ޖިންސުން ގުޅުން ހިންގާ ވީޑިއޯއެއް އިއްޔެ ސޯޝަލް މީޑިއާގައި އާންމުވި އެވެ.
އެ ވީޑިއޯ އާންމުވުމާ އެކު، ނޫސްވެރިން ސުވާލުކުރަން ފެށުމުން ފުލުހުން ބުނީ، އެ ވީޑިއޯގެ މައްސަލަ އާއި އެފަދަ ވީޑިއޯތަކެއް ބޭނުންކޮށްގެން ގިނަ ބަޔަކަށް ބްލެކްމެއިލް ކުރާ މައްސަލަ ތަހުގީގުކުރަމުން އަންނަ ކަމަށެވެ.
ނާޒިމް ފުލުހުންގެ އިދާރާ އަށް އިއްޔެ ހާޒިރުކޮށް ސުވާލުކުރިޔަސް، އެކަމާ ގުޅޭ ގޮތުން ފުލުހުން އަދި މީޑިއާއާ ވާހަކައެއް ނުދައްކަ އެވެ. އެހެންވެ، އޭނާއާ ސުވާލުކުރީ އެއް ޖިންސުން ގުޅުން ހިންގި މައްސަލައިގައި ކަމެއް ނުވަތަ ބަޔަކު އެ ވީޑިއޯ އާންމުކޮށް ނާޒިމް ބްލެކްމެއިލްވި މައްސަލައިގައި ކަމެއް ވެސް އަދި ސާފެއްނުވެ އެވެ.
އެ ވީޑިއޯއާ ގުޅިގެން ނާޒިމް ކުރެއްވި ޓުވީޓެއްގައި ވަނީ ވީޑިއޯގައި ފެންނަނީ އޭނާ ކަމަށް އިންކާރުކުރައްވައިފަ އެވެ. އަދި ފުލުސް އޮފީހަށް ރޭ ހާޒިރުކޮށްފައި ވަނިކޮށް މިއަދު ވަނީ އޭނާގެ ޓުވިޓާ އެކައުންޓް ޑީއެކްޓިވޭޓްކޮށްފަ އެވެ.
ވީޑީއޯ އިން ފެންނަނީ އޭނާ ކަމަށް ނާޒިމް އިންކާރުކުރިޔަސް އެތައް ބަޔަކު ދަނީ އޭނާ ހައްޔަރުކުރަން ގޮވައިލަމުންނެެވެ. ސިޔާސީ ނުފޫޒު ހުރި މީހުންނާ ޖެހުމުން ސަރުކާރުން އެފަދަ މައްސަލަތަކާ އަޅައިނުލާ ކަމަށް ބުނެ ވެސް ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.
ފުލުހުން ބުނީ އެ ވީޑިއޯގައި ހިމެނޭ ދެ މީހުންގެ މައްސަލަ ތަހުގީގުކުރަމުން އަންނަ ކަމަށާއި ތަހުގީގުގެ ތެރެއިން އަޅަން ޖެހޭ ފިޔަވަޅެއް އަޅާނެ ކަމަށެވެ.