ރިޔާސީ އިންތިހާބަށް ކެންޑިޑޭޓަކު ނެރޭނަން: ގާސިމް

އަންނަ އަހަރު ބާއްވާ ރިޔާސީ އިންތިހާބަށް ޖުމްހޫރީ ޕާޓީގެ ފަރާތުން ކެންޑިޑޭޓަކު ނެރޭނެ ކަމަށް އެ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް މިރޭ ވިދާޅުވެއްޖެ އެވެ.

ސިޔާސީ ހަރަކާތްތައް ހުއްޓާލައިގެން ގިނަ ދުވަސްތަކެއް ވަންދެން ތިބުމަށް ފަހު ޖޭޕީން ބޭއްވި ޖަލްސާގައި ގާސިމް ވިދާޅުވީ އެ ޕާޓީ އާ ނުލައި އެއްވެސް ބަޔަކަށް ވެރިކަމަށް މިހާތަނަށް އާދެވިފައި ނުވާ ކަމަށާއި އެކަނި އެއްވެސް ޕާޓީއަކަށް ރިޔާސީ އިންތިހާބު ކާމިޔާބު ނުކުރެވޭނެ ކަމަށް ރައީސް އިބްރާހިމް މުހައްމަދު ސޯލިހު ވެސް ވިދާޅުވެފައިވާ ކަމަށެވެ.

މާޒީގައި ކަން ހިނގާފައިވާ އެ ގޮތްތައް ކުރިޔަށް އޮތްތަނުގައި ބަދަލުވުމުގެ ފުރުސަތު ވެސް އެބައޮތް ކަމަށާއި ކޮންމެ ޕާޓީއެއް ވެސް ވަކި ބަޔަކަށް ބަރޯސާ ނުވެ އަމިއްލަ ފައިމައްޗަށް ތެދުވަން ވިސްނާނެ ކަމަށް ގާސިމް ވިދާޅުވި އެވެ.

ގާސިމް ވިދާޅުވީ ޖޭޕީގެ އަސާސީ ގަވައިދުގައިވާ ގޮތުގެ މަތިން އަންނަ އަހަރު ރިޔާސީ ކެންޑިޑޭޓަކު ނެރޭނެ ކަމަށެވެ. ޕްރައިމަރީއެއް ބާއްވާނެތޯ ނުވަތަ ނުބާއްވާނެތޯ ވެސް ކަނޑައަޅާނެ ކަމަށް ވިދާޅުވި އެވެ.

މިދިޔަ އަހަރުގެ ރިޔާސީ އިންތިހާބު ފިޔަވައި އެހެން ހުރިހާ އިންތިހާބެއްގައި ޖޭޕީގެ ފަރާތުން ނެރޭ ރިޔާސީ ކެންޑިޑޭޓަކީ ގާސިމް އެވެ. އެ ޕާޓީގެ އަސަސީ ގަވައިދުގައި އޮންނަ ގޮތުން ރިޔާސީ ކެންޑިޑޭޓަކީ އޭރަކު ޕާޓީގެ ލީޑަރެވެ.

"އެންމެ ފަހުން ބޭއްވި ބައްދަލުވުންތަކުގައި ނިންމާފައި އޮތީ ރިޔާސީ ކެނޑިޑޭޓަކު ޖޭޕީން ނެރޭނެ. އެ ނިންމުމަށް ބަދަލެއް އަންނާނެތޯ ނުވަތަ ނާންނާނެތޯ އެނގޭނީ ކޮންގަރެސް އާ ކައުންސިލް ހޮވީމަ. ހަމަގައިމުވެސް އަޅުގަނޑުމެން ބާކީ ވެގެން ނުދާނެ،" ގާސިމް ވިދާޅުވި އެވެ.

ޖޭޕީން އެހެން ޕާޓީތަކާ އެކު ކޯލިޝަން ހެދުމާ ގުޅޭ ގޮތުން ވެސް ގޮތެއް ނިންމާނީ ކޮންގްރެސް އިން ކަމަށް ގާސިމް ވިދާޅުވި އެވެ.

ނަމަވެސް ގާސިމް ވަނީ ކޯލިޝަން ހެދުމުގެ ކުރިން އެ ޕާޓީއާއެކު އެއްބަސްވުންތަކެއް އެހެން ޕާޓީތަކުން ހަދާ ކަމަށާއި ނަމަވެސް އެ އެއްބަސްވުންތަކަށް ފުރިހަމަ އަށް އިހުތިރާމް ނުކުރާ ކަން ފާހަގަ ކުރައްވައިފަ އެވެ.

"އެއީ ހިތާމަ ހުރި ކަމެއް. ކަމަކަށް ވައުދުވާއިރު އެގޮތަށް ކަންކަން ކުރަން ވާނެ ކަން ހަނދާން ކުރަން ޖެހޭނެ،" ގާސިމް ވިދާޅުވި އެވެ.

ކުރިޔަށް އޮތް ރިޔާސީ އިންތިހާބަށް ވާދަ ކުރުމުގެ ޝައުގުވެރިކަން ރައީސް އިބްރާހިމް މުހައްމަދު ސޯލިހު ވެސް ވަނީ ފާޅު ކުރައްވައިފަ އެވެ. އެމަނިކުފާނުގެ ވިސްނުންފުޅަކީ ޖުމްހޫރީ ޕާޓީ އާއި އަދާލަތު ޕާޓީއާއެކު ކޯލިޝަނެއް ހަދައިގެން 2023 ކާމިޔާބު ކުރެއްވުމަށެވެ.

އެކަން އިއުލާން ކުރެއްވުމަށް ފަހު އެމަނިކުފާނު ވަނީ ގާސިމް އާއި ޖޭޕީގެ ލީޑާޝިޕް އާއެކު އެމަނިކުފާނުގެ ރަށް، އދ. މާމިގިއްޔަށް ވެސް ވަޑައިގަންނަވާފަ އެވެ.

ގާސިމް މިއަދު ވަނީ ރައީސް ކޮވިޑް-19 މެނޭޖު ކުރެއްވި ގޮތާއި އެމަނިކުފާނު ވެރިކަން ހިންގަވާ ގޮތަށް ތައުރީފް ކުރައްވައިފަ އެވެ.