ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އިން ހުޅުމާލޭގައި އަޅައިދިން މިސްކިތް، ރައީސް އިބްރާހިމް މުހައްމަދު ސޯލިހް މިރޭ ހުޅުއްވައި ދެއްވައި، އެ މިސްކިތުގައި ޖަމާއަތުގައި ނަމާދުކުރަން ފަށައިފި އެވެ.
އާރުސީސީން ހިލޭ ބިނާކޮށްދިން "މަސްޖިދުއް ރަޝީދު" މިރޭ ހުޅުއްވައިދެއްވުމަށް ފަހު ރައީސް ވަނީ އިޝާ ނަމާދުގެ ޖަމާއަތުގެ ބައިވެރިވެ ވަޑައިގެންފަ އެވެ. މި ރަސްމިއްޔާތުގައި ނައިބު ރައީސް ފައިސަލް ނަސީމާއި އިސްލާމިކް މިނިސްޓަރު އަހުމަދު ޒާހިރު އަލީ ވެސް ބައިވެރިވެ ވަޑައިގަތެވެ.
މަސްޖިދުއް ރަޝީދަކީ 1،200 މީހުންގެ ޖާގައިގެ މިސްކިތެކެވެ. އެ މިސްކިތުގައި އަންހެނުން ވަކިން ނަމާދުކުރާ ބައެއް ވެސް ހުރެ އެވެ.
ހުޅުމާލޭ އަމިން އެވެނިއު ކައިރީގައި އިމާރާތްކުރި މި މިސްކިތް ހުޅުވުމާ އެކު، އެ ސަރަހައްދުގައި ހުރި ވަގުތީ މިސްކިތް މަސްޖިދުލް ފިތުޔާ ގައި ނަމާދުކުރުން ހުއްޓާލާނެ އެވެ. އެއީ މަސްޖިދުއް ރަޝީދަކީ ގިނަ މީހުންނަށް އެއްފަހަރާ ނަމާދުކުރެވޭ މިސްކިތަކަށް ވާތީ އާއި ކައިރި ކައިރީގައި ދެ މިސްކިތް ހުރުމުންނެވެ.
