އޭނާއަކީ ސިޔާސީ މަސައްކަތް ކުރައްވައިގެން ރާއްޖޭގެ ވެރިކަން ހޯދަން ބޭނުން ބޭފުޅެއް ނަމަ މިއަދު ހުންނަވާނީ އެ މަގާމުގައި ކަމަށާއި ނަމަވެސް ބޭނުން ވަނީ އިސްލާހީ މަސައްކަތްތަކުގައި ދެމިހުންނަވަން ކަމަށް ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެމްބަރު ގާސިމް އިބްރާހިމް މިއަދު ވިދާޅުވެއްޖެ އެވެ.
ރާއްޖެ ޓީވީގެ "ފަށާއިރު" ޕްރޮގްރާމަށް ދެއްވި ހާއްސަ އިންޓަވިއުއެއްގައި، އަންނަ އަހަރުގެ ރިޔާސީ އިންތިހާބުގައި ޖުމްހޫރީ ޕާޓީން އޭނާ ނޫން އެހެން ބޭފުޅަކު ފެނިދާނެތޯ ޕްރެޒެންޓަރު ސުވާލު ކުރުމުން ވިދާޅުވީ، އެކަމަށް އެއްގޮތަކަށް ވެސް ޖަވާބު ދެއްވަން އެނގިވަޑައި ނުގަންނަވާ ކަމަށެވެ.
އޭނާއަކީ ސިޔާސީ ބޭފުޅެއް ނޫން ކަމަށާއި ސިޔާސީ ގޮތުން ކުރި ހޯއްދަވައިގެން ވަޑައިގަންނަވަން ބޭނުން ނުވާ އެތައް ސަބަބެއް ހުރި ކަމަށް ގާސިމް ވިދާޅުވި އެވެ. ނަމަވެސް އެ ސަބަބުތައް މި ވަގުތު ވިދާޅުވާން އޭނާ ބޭނުމެއް ނުވި އެވެ. އެހެންވެ، "ފަހަތަށް ޖެހިގެން" ހުންނަވަނީ ކަމަށް ވިދާޅުވި އެވެ.
"އަޅުގަނޑަކީ ސިޔާސީ މީހެއް ނޫން. އަޅުގަނޑަަކީ އިސްލާހަށް މަސައްކަތް ކުރާ މީހެއް. މިހާރު ވެސް މި ކުރަނީ އިސްލާހަށް ކުރާ މަސައްކަތް. އަޅުގަނޑަކީ ސިޔާސީ މީހެއް ނަމަ މިހާރު ވެސް ހުންނާނީ ވެރިކަމުގައި، މިއަދު ވެސް އިއްޔެ ވެސް،" ގާސިމް ވިދާޅުވި އެވެ.
އަޅުގަނޑުގެ ލެގަސީއެއް ނޫން ކޮންމެ ގޮތެއް ހަދައިގެން ވެސް ވެރިކަން ހޯދުމަކީ، ރައީސްޖުމްހޫރިއްޔާގެ މަގާމް ހޯދުމަކީ. އެއީ ކޮންމެހެން ބޭނުންވާ ކަމަކަށް ނުވާތީ އެކަން ނުކުރަނީ -- ގާސިމް
ގާސިމް ވިދާޅުވިގޮތުގައި، ރާއްޖޭގައި އިސްލާހީ މަސައްކަތް ކުރުމަށް އަޅުއްވަން ޖެހުނު ކޮންމެ ފިޔަވަޅެއް އޭނާ އަޅުއްވާނެ އެވެ. ހޯއްދަވަން ޖެހުނު މަގާމުތަކެއް ހޯއްދަވާނެ ކަމަށް ވިދާޅުވި އެވެ. ރައްޔިތުންގެ މަޖިލީހުގެ މެމްބަރުކަން ވެސް ހޯއްދަވަނީ އެ ބޭނުމަށް ކަމަށާއި މަޖިލީހުގައި ހުންނަވަން ޖެހޭ އެ ނޫން ސަބަބެއް ނެތް ކަމަށް ގާސިމް ވިދާޅުވި އެވެ.
"އަޅުގަނޑުގެ ލެގަސީއެއް ނޫން ކޮންމެ ގޮތެއް ހަދައިގެން ވެސް ވެރިކަން ހޯދުމަކީ. ރައީސުލްޖުމްހޫރިއްޔާގެ މަގާމު ހޯދުމަކީ. އެއީ ކޮންމެހެން ބޭނުންވާ ކަމަކަށް ނުވާތީ އެކަން ނުކުރަނީ،" ގާސިމް ވިދާޅުވި އެވެ.
މިހާރު އުމުރުން 73 އަހަރު ވާން އުޅޭ އިރު ގައުމަށް ގިނަ މަސައްކަތްތަކެއް ކޮށްދެވިއްޖެ ކަމަށް ގާސިމް ވިދާޅުވި އެވެ.
ގާސިމް ވިދާޅުވިގޮތުގައި އޭނާ އަށް މިހާތަނަށް ލިބުނު އާމްދަނީގެ 60 ޕަސެންޓު ހަރަދު ކުރީ ގައުމަށާއި ދިވެހި ދަރިވަރުންނަށް ކިޔަވައި ދިނުމަށާއި ﷲ ގެ މަގުގަ އެވެ. ބާކީ 40 ޕަސެންޓަކީ އިންވެސްޓްމަންޓުތައް ކަމަށް ގާސިމް ވިދާޅުވި އެވެ.
"އަޅުގަނޑު ކުރި މަސައްކަތުން މިއަދާ ހަމައަށް އަޅުގަނޑު ވަރަށް ކާމިޔާބު، ވަރަށް އުފަލުގައި މިހުރީ. ރިގްރެޓެއް ނުކުރަން ހިތާމައެއް ނުކުރަން،" ގާސިމް ވިދާޅުވި އެވެ.
ޖުމްހޫރީ ޕާޓީން ވަނީ ކުރިޔަށް އޮތް 2023 ގެ ރިޔާސީ އިންތިހާބަށް އެ ޕާޓީން ކެނޑިޑޭޓަކު ނެރޭނެ ކަމަށް ބުނެފަ އެވެ.
މިދިޔަ ރިޔާސީ އިންތިހާބު ފިޔަވައި 2008 ގެ ފަހުން ބޭއްވި ހުރިހާ ރިޔާސީ އިންތިހާބެއްގައި ގާސިމް ވާދަކުރެއްވި އެވެ. ނަމަވެސް އެކަށީގެންވާ އަދަދަށް ވޯޓު ނުލިބުމާ ގުޅިގެން އެހެން ޕާޓީތަކާ އެކު ދެވަނަ ބުރުގައި އަބަދުވެސް ކޯލިޝަން ހައްދަވަ އެވެ. އެހެންވެ، މިހާތަނަށް ކޮންމެ ބަޔަކަށް ވެސް ވެރިކަން ލިބެނީ ގާސިމްގެ ބާރުގަ އެވެ.