މީޑިއާ ކައުންސިލުން ރާއްޖޭގެ ނޫސްވެރިންނަށް ކޮންމެ އަހަރަކު ދެމުންދާ އެވޯޑުގައި އެކި ދާއިރާތަކުން އެންމެ މޮޅު ނޫސްވެރިން މިރޭ ހޮވައިފި އެވެ. އެ އެވޯޑުގައި މިދިޔަ އަހަރުގެ އެންމެ މޮޅު ނޫސްވެރިއަކަށް ހޮވުނީ "ދައުރު" ނޫހުގެ ނޫސްވެރިޔާ، އައިމިނަތު ޝިފްލީން އެވެ.
ޝިފްލީނަކީ "ހަވީރު" އާއި "މިހާރު" ނޫހުގައި ވެސް މަސައްކަތްކޮށްފައިވާ ކުޅަދާނަ ނޫސްވެރިއެކެވެ. އޭނާއަށް ވަނީ 2017 ވަނަ އަހަރުގެ އެންމެ މޮޅު ނޫސްވެރިޔާގެ އެވޯޑު ވެސް ހޯދައިފަ އެވެ.
މިރޭގެ ޖަލްސާގައި ވަނީ ޕްރިންޓް އަދި އޮންލައިން ޖާނަލިޒަމް ދާއިރާއިން ނުވަ ކެޓަގަރީއަކުން އެވޯޑު ލިބުނު ނޫސްވެރިންނާ އެކު އެންމެ އުއްމީދީ ނޫސްވެރިޔާ އާއި އެންމެ މޮޅު ނޫސްވެރިޔާ ވެސް ހޮވައިފަ އެވެ. އެ ޖަލްސާގައި ބްރޯޑްކާސްޓިން ދާއިރާ އިން އެކި ދާއިރާތަކުން އެވޯޑު ދީފައި ނުވަނީ އެކަށީގެންވާ ރަނގަޅު ލިޔުންތަކެއް ހުށަހަޅާފައި ނުވާތީ އެވެ.
މީޑިއާ ކައުންސިލުން 2013 ވަނަ އަހަރުން ފެށިގެން ދެމުން އަންނަ ނޫސްވެރިކަމުގެ އެވޯޑް މިފަހަރު ލިބުނު ނޫސްވެރިން )އަދި މިހާރު މަސައްކަތް ކުރާ އޮފީސް(:
- އިޖުތިމާއީ ދާއިރާ - މުހައްމަދު ހަމްދޫން (މިހާރު)
- ސިޔާސީ ދާއިރާ - ފަޒީނާ އަހުމަދު (މިހާރު)
- ޝަރުއީ ދާއިރާ - ޝަފްނާ ހުސެއިން (ދައުރު)
- ވިޔަފާރީގެ ދާއިރާ - އަހުމަދު ނާއިފް (ދައުރު)
- ކުޅިވަރުގެ ދާއިރާ - މުހައްމަދު އައްޒާމް (އަދަދު)
- ވީޑިއޯ ޖާނަލިޒަމް - އަހުމަދު އަލީ
- ފޮޓޯ ޖާނަލިޒަމް - ނިޝާން އަލީ (މިހާރު)
- ގްރެފިކްސް އެންޑް އިލަސްޓްރޭޝަންސް ދާއިރާ - އަބްދުﷲ ޝަފީއު (އަދަދު)
- ފީޗާ ލިޔުމުގެ ދާއިރާ - ނަޖާހް މަސްއޫދު (މިހާރު)
މިދިޔަ އަހަރުގެ އެންމެ އުއްމީދީ ނޫސްވެރިޔާގެ އެވޯޑް ހޯދާފައި ވަނީ ސަން އޮންލައިންގައި މަސައްކަތްކުރި އާލިމް އަބްދުއްލަތީފެވެ. އޭނާއަކީ މިހާރު، "މިހާރު" އޮންލައިންގެ ނޫސްވެރިއެކެވެ.
އެ ހަފްލާގައި ދިގު މުއްދަތަކަށް ނޫސްވެރިކަން ކޮށްފައިވާ ފަރާތްތަކުގެ އަގު ވަޒަންކުރުމުގެ ގޮތުން ވެސް އެވޯޑް ދީފައިވެ އެވެ. "ހަޔާތީ އަރުތަ" ގެ ނަމުގައި އެ އެވޯޑް ދީފައި ވަނީ ދިގު މުއްދަތަކަށް ނޫސްވެރިކަމުގައި ހިދުމަތްކުރި ޑރ. އަލީ ރަފީގާއި މަޑުލު މުހައްމަދު ވަހީދަށެވެ.