ތުރުކީގެ ވެރިރަށް އިސްތަންބޫލްގައި މިދިޔަ ހޯމަ ދުވަހު ދިން ބޮމުގެ ހަމަލާއަށް ފަހު، އެ ގައުމުގައި ތިބި ދިވެހިންގެ ހާލު ވަރަށް ގާތުން ބަލަމުން އަންނަ ކަމަށް ފޮރިން މިނިސްޓްރީން ބުނެފި އެވެ.
ފޮރިން މިނިސްޓްރީގެ އޮފިޝަލަކު މިއަދު "މިހާރު" އަށް ވިދާޅުވީ ތުރުކީގައި ބޮމުގެ ހަމަލާ ދިނުމާ އެކު އެ ގައުމުގައި ތިބި ދިވެހިންގެ ރައްކާތެރިކަން ކަށަވަރުކުރުމުގެ ގޮތުން އެ މީހުންގެ ހާލަތު ބެލުމުގެ މަސައްކަތް ފަށާފައިވާ ކަމަށެވެ.
ތުރުކީ އަކީ މިހާރު ވަރަށް ގިނައިން ދިވެހިން ޗުއްޓީ ހޭދަކޮށްލުމަށް ދަތުރުކުރާ މަގުބޫލު މަންޒިލެކެވެ.
އެއްވެސް އެހީތެރިކަމެއް ބޭނުންވާ ނަމަ، ތުރުކީގެ ކޮންސިއުލޭޓްގެ ނަންބަރު 7983400 އަށް ގުޅުމަށް ފޮރިން މިނިސްޓްރީން ވަނީ އެދިފަ އެވެ.
ބައެއް ގައުމުތަކުން މިހާރު ވަނީ ތުރުކީ އަށް ދަތުރުކުރާއިރު ސަމާލުވުމަށް އެދި ޓްރެވަލް އެޑްވައިސަރީ ވެސް ނެރެފަ އެވެ.
އިސްތަންބޫލްގެ ގަވަރުނަރު އަލީ ޔެރްލިކަޔާ ވިދާޅުވެފައިވާ ގޮތުގައި އެ ސަހަރުގެ މެދުތެރޭގައި އޮންނަ ތަކްސިމް މައިދާނު ސަރަހައްދުގެ މަގެއްގައި ބޮމެއް ކަމަށް ބެލެވޭ އެއްޗެއް ގޮއްވައިލީ އަންހެނެއް ކަމަށް ތުހުމަތުކުރެވެ އެވެ. ގިނަ އަދަދެއްގެ ފިހާރަތައް ހުންނަ އެ މަގު (އިސްތިގްލާލް ސްޓްރީޓް)ގައި ބޮން ގޮއްވައިލި ވަގުތު ވެސް އެ މަގުގައި ގިނަ އަދަދެއްގެ ބަޔަކު ފައިމަގުގައި އުޅުނެވެ.
އެ ހަމަލާއަށް ފަހު ތުރުކީގެ ރައީސް ރަޖަބު ތައްޔިބު އުރުދުޣާން ވިދާޅުވެފައި ވަނީ އިސްތަންބޫލުގައި ދިން ޓެރަރިސްޓް ހަމަލާގެ ފަހަތުގައި ތިބި ބަޔަކު ހޯއްދަވައި އެމީހުންނަށް ހައްގު އަދަބު ދެއްވާނެ ކަމަށެވެ.
އެ ހަމަލާގައި ހަ މީހަކު މަރުވެ، ގިނަ ބަޔަކު ޒަހަމްވި އެވެ.