މި ސަރުކާރުން ހއ. ދިއްދޫގައި އިމާރާތްކުރާ 75 ފްލެޓްގެ ބިންގާ މިއަދު އަޅައިފި އެވެ.
އެ ރަށުގައި ހެނދުނު ބޭއްވި ރަސްމިއްޔާތެއްގައި ބިންގާ އަޅައިދެއްވީ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާއި ހއ. އަތޮޅު ކައުންސިލްގެ ރައީސް މޫސާ ޝަފީގާއި ދިއްދޫ ކައުންސިލުގެ މެމްބަރުންނާއި އަދި އެ ޕްރޮޖެކްޓްގެ ކޮންޓްރެކްޓަރުގެ ހާއްސަ މަންދޫބުންނެވެ.
ދިއްދޫގައި ފްލެޓް އެޅުމުގެ މަސައްކަތް، މިދިޔަ އޮގަސްޓް މަހު 10 ގައި ހަވާލުކުރީ އެސްޖޭ ކޮންސްޓްރަކްޝަން ކުންފުންޏާ އެވެ. އެއީ ދައުލަތުގެ ބަޖެޓުން 120 މިލިއަން ރުފިޔާ ހަރަދުކޮށްގެން ހިންގާ މަޝްރޫއެކެވެ.
އެ މަޝްރޫއު ހަވާލުކުރީ އެއް އަހަރު ދުވަހުގެ ތެރޭގައި ނިންމަން ޖެހޭ ގޮތަށެވެ.
މަޝްރޫއުގެ ތަފުސީލު
• 700 އަކަފޫޓުގެ، ދެ ފަންގިފިލާގެ 75 ފްލެޓް.
• ކޮންމެ ފްލެޓެއްގައި 3 ކޮޓަރި، 3 ފާހާނާ، ސިޓިން ރޫމް، ބަދިގެ، ކާގެ، ލޯންޑަރީ އަދި ސްޓޯރޫމެއް.
• ފްލެޓްތަކުގެ ވަށައިގެން އަލިކޮށް، ޕާކެއް ހަދާ އަދި ވެހިކަލް ޕާކް ކުރާނެ ޖާގަ.
ކުރީގެ ރައީސް މުހައްމަދު ނަޝީދުގެ ވެރިކަމުގައި ވެސް ދިއްދޫގައި ހައުސިން މަޝްރޫއެއް ހިންގި އެވެ. އެ މަޝްރޫއުގެ ދަށުން އިމާރާތްކުރި 250 ފްލެޓްތަކުގައި 2017 ވަނަ އަހަރުން ފެށިގެން މީހުން އަންނަނީ ދިރިއުޅެމުންނެވެ.
މި ސަރުކާރުން މާލެ ސަރަހައްދުގައި މިހާރު ވެސް 6،000 އަށް ވުރެ ގިނަ ފްލެޓް އެޅުމުގެ މަސައްކަތް އަންނަނީ ކުރަމުންނެވެ. އޭގެ ތެރެއިން ބައެއް ފްލެޓްތަކުގެ މަސައްކަތް އަންނަ އަހަރު މެއި މަހަށް ނިމޭނެ ކަމަށް ބުނެފައިވެ އެވެ.