ވޯލްޑް ކަޕްގެ ފުރަތަމަ މެޗުގައި މިރޭ، މުބާރާތް ބާއްވާ ގައުމުގެ މައްޗަށް އިކުއެޑޯގެ މެޗުގެ ނަތީޖާ ލަފާ ކުރުމަށް ހުޅުވާލުމުން ގިނަ ދިވެހިން ބުރަ ވަނީ އިކުއެޑޯ މޮޅުވާނެ ކަމަށެވެ.
ވޯލްޑް ކަޕަށް ހާއްސަކޮށް "މިހާރު" އިން އެކުލަވާލި ވޯލްޑް ކަޕް ޕްރިޑިކްޝަން ކޮމްޕްޓީޝަންގައި ވޯޓް ދިން މީހުންގެ ތެރެއިން 42 ޕަސެންޓް މީހުން ލަފާ ކޮށްފައި ވަނީ އިކުއެޑޯ މޮޅުވާނެ ކަމަށެވެ. ގަތަރު މޮޅުވާނެ ކަމަށް ލަފާ ކޮށްފައި ވަނީ 37 ޕަސެންޓް މީހުންނެވެ.
"މިހާރު" ގެ ސްކޯ ޕްރިޑިކްޓާ އަކީ ސްކޯ ދިމާ ކުރުމަށް އެކި ކުންފުނިތަކުން ހަދައިފައިވާ ގްރޫޕުތަކެއް ހިމެނޭ ޕްލެޓްފޯމެކެވެ. އެ ގްރޫޕުތަކުގައި ކޮންމެ ކުންފުންޏަކުން ވެސް ވަކި އިނާމުތަކެއް ހުށަހަޅާފައިވެ އެވެ.
ސްކޯ ޕްރިޑިކްޓާގައި ރަޖިސްޓްރީ ވާ މެންބަރުންނަށް، ގުރޫޕްތަކަށް ވަދެ ސްކޯ ޕްރިޑިކްޝަންގައި ބައިވެރި ވެވޭނެ އެވެ.
ސްކޯ ޕްރިޑިކްޓާ އަށް ވަދެ، ސްކޯ ދިމާކުރާ ކޮންމެ ބައިވެރިޔަކަށް ވެސް ގިނަ އިނާމުތަކެއް ހޯދުމުގެ ފުރުސަތު ލިބޭނެ އެވެ. މި ޕްލެޓްފޯމުގައި ބައިވެރިވެފައިވާ ކުންފުނިތަކުން ކަނޑައަޅާފައި ވަނީ ވޯލްޑްކަޕް ނިމޭއިރު އެންމެ ގިނަ ސްކޯ ދިމާކުރާ ފަރާތްތަކަށް އިނާމު ދިނުމަށެވެ. ބައެއް ކުންފުނިތަކުން، އެންމެ ގިނަ ސްކޯ ދިމާކުރި އެއް ބައިވެރިޔާ ހޮވުމަށް ނިންމާފައި ވާއިރު، އެހެން ބައެއް ކުންފުނިތަކުން ވަނީ އެންމެ ގިނަ ސްކޯ ދިމާކުރާ އެންމެ ގަދަ ތިން ބައިވެރިން ހޮވުމަށް ނިންމައިފަ އެވެ. އަދި އިތުރު ފަސް ބައިވެރިން ވެސް ހޮވުމަށް ހަމަޖެހިފައި ވެއެވެ. ގަތަރާއި އިކުއެޑޯ ބައްދަލަ ކުރާ މެޗުގެ ސްކޮ ދިމާ ކުރުމުގެ ފުރުސަތު މެޗު ފަށަން ދެން ވަނީ ހުޅުވައިލައިފަ އެވެ.