ދޯހާ (ނޮވެމްބަރު 20) - ވޯލްޑް ކަޕް ފުރަތަމަ މެޗުގައި، މިރޭ އިކުއެޑޯ އާ ދެކޮޅަށް ގަތަރުން ކުޅޭ މެޗު ގަންނަން އިކުއެޑޯ ކުޅުންތެރިންނަށް ފައިސާގެ ހުށަހަޅަން ގަތަރުން މަސައްކަތް ކުރާ ކަމަށް ދެކެވޭ ވާހަކަތައް ގަތަރުގެ ކޯޗު ފެލިކްސް ސަންޗޭޒް ރައްދު ދީފި އެވެ.
ވޯލްޑް ކަޕްގެ ބޭއްވި ގައުމުތަކުގެ ތެރެއިން ފުރަތަމަ ބުރުން ކަޓައިގެން ދާ ދެ ވަނަ ގައުމަކަށް ނުވުމުކީ ގަތަރުގެ އުއްމީދެކެވެ. ވޯލްޑް ކަޕް ބޭއްވި ގައުމުތަކުގެ ތެރެއިން މުބާރާތުގެ ފުރަތަމަ ބުރުން މިހާތަނަށް ކެޓި ހަމައެކަނި ގައުމަކީ 2010 ވަނަ އަހަރު ދެކުނު އެފްރިކާ އެވެ.
އެ ލިސްޓަށް ގަތަރުގެ ނަން އެރިޔަ ނުދިނުމަށް، އެ ގައުމުން އިކުއެޑޯގެ އަށް ކުޅުންތެރިޔަކަށް 7.4 މިލިއަން ޑޮލަރު ހުށަހެޅި ކަމަށް ސައުދީ އަރަބިއާގައި ހުންނަ ބްރިޓީޝް ސެންޓަރުގެ ޕޮލިޓިކަލް އެފެއާޒްގެ މަގާމުގައި މަސައްކަތް ކުރާ ތޯހާ އަމްޖަދު ވަނީ ތުހުމަތުކޮށްފަ އެވެ.
އޭނާ ކުރި ޓްވީޓްގައި ބުނެފައި ވަނީ އޭނާ އަށް މައުލޫމާތު ލިބިފައި ވަނީ ގަތަރު ޓީމުގެ އެންމެ އެތެރެއިން ކަމަށެވެ. އެގޮތުން ދެ ވަނަ ހާފްގައި ޖަހާ ލަނޑުން 1-0 ން ގަތަރު މޮޅުވާނެ ގޮތަށް ފައިސާގެ ބާރުގައި ކަންކަން ރާވަފައިވާ ކަމަށް އޭނާ ތުހުމަތު ކުރެ އެވެ.
އިންޓަނެޓްގައި ދައުރު ވަމުންދާ މި ވާހަކަތަކާ ގުޅިގެން ސްޕެއިން އަށް ނިސްބަތްވާ ސަންޗޭޒް ބުނީ އިންޓަނެޓްގައި ކޮންމެ ވާހަކަ އެއް ކޮންމެ ފަދަ ގޮތަކަށް ވެސް އެނބުރި ދާނެ ކަމަށެވެ.
"ތެދު ނޫން ވަރަށް ގިނަ ވާހަކަތަކެއް އެނބުރޭ. އިންޓަނެޓަކީ ވަރަށް ބޮޑު ވަސީލަތެއް. އަދި އެއީ އެހާމެ ނުރައްކާ ވެސް އެއްޗެއް،" 2019 ގެ އޭޝިއަން ކަޕް ގަތަރަށް ކާމިޔާބު ކޮށްދިން ކޯޗު ބުންޏެވެ.
"ވަރަށް ގިނަ އަހަރުތަކެއް ވަންދެން އަހަރެމެން އައީ މި ކަމަށް ތައްޔާރު ވަމުން. އަހަރެމެން އެއްތަނެއްގައި ތިބެ ވަރަށް ދިގު މުއްދަތަކަށް އެކުގައި މަސައްކަތް ކުރިން. އަހަރެމެން މިތިބީ ވަރަށް ބަދަހިކޮށް ފަތުރަމުންދާ ވާހަކަ އަކަުން އަހަރެމެންގެ ޓީމަށް އަސަރެއް ނުކުރާނެ.
"އަހަރެމެން މިތިބީ ހިތްހަމަޖެހިގެން. އުފަލުން އަހަރެމެންގެ ފުރަތަމަ ވޯލްޑް ކަޕް ކުޅެން ލިބޭތީ. އަހަރެމެން ސަމާލުކަން ދީގެން މިތިބީ މެޗަށް ތައްޔާރު ވާނެ ގޮތާ މެދު. އިންޓަނެޓްގައި ދެކެވޭ އެއްވެސް ވާހަކަ އަކަށް އަހަރެމެން ސަމާލުކަމެއް ނުދެން. ފުޓްބޯޅަ ޓީމަކަށް ކުރެވޭނެ ކަމަކީ ދެކެވެމުންދާ އެއްވެސް ވާހަކަ އަކަށް ސަމާލުކަން ނުދީ ހަމަޖެހިގެން ތިބުން.
ގަތަރާއި އިކުއެޑޯގެ އިތުން ދެން އެ ގުރޫޕްގައި ހިމެނެނީ އެފްރިކާގެ ޗެމްޕިއަން ސެނެގާލް އާއި ނެދަލެންޑްސް އެވެ. ގަތަރާއި އިކުއެޑޯ ކުޅޭ މެޗު ފަށާނީ ރާއްޖޭ ގަޑިން މިރޭ 9 ޖަހާއިރު އެވެ.