ދޯހާ (ނޮވެމްބަރު 20) - ބައިބައިވުން އެއްފަރާތް ކުރުމުގެ ރީތިކަން، ވޯލްޑް ކަޕްގެ ހުޅުވުމުގެ ރަސްމިއްޔާތުން ފެނިގެން ހިނގައްޖެ ކަމަށް ގަތަރުގެ އަމީރު ޝައިޚް ތަމީމް ބިން ހަމަދު އަލް ޘާނީ ވިދާޅުވެއްޖެ އެވެ.
ވޯލްޑް ކަޕް ހުޅުވުމަށް ބޭއްވި ކުލަ ގަދަ ރަސްމިއްޔާތުގައި ވަނީ ދުނިޔޭގެ އެކި ސަގާފަތްތަކުގެ ރަމްޒުތައް ހާމާވާ ކުލަތަކާއި ކެރެކްޓާތައް އަލް ބައިތޮއްޔާ ދަނޑުން ފެނިގެން ގޮސްފަ އެވެ.
ސޯޝަލް މީޑީއާގެ ނެޓްވޯކް ތަކުންނާއި ދުނިޔޭގެ ޓީވީ ޗެނަލްތަކުން ވަގުތުން ދައްކަމުން ދިޔަ ހުޅުވުމުގެ ރަސްމިއްޔާތުގައި ބައިވެރިވެ ވަޑައިގެން އަމީރު ޝައިހް ތަމީމް ވިދާޅުވީ ބައިބައިވުން އެއެފްރާތް ކުރުމަކީ ކިހާ ރީތި ކަމެއްކަން، މުޅިން ދުނިޔެ އަށް ފެނިގެން ހިނގައްޖެ ކަމަށެވެ.
"މީހުންގެ ތަފާތުތައް ހުންާނާނެ. އެކަމަކު މީހުން ބައިބައިވާ ކަންތައްތައް އެއްފަރާތް ކުރުމަކީ ކިހާ ރީތި ކަމެއް،" އަމީރު ވިދާޅުވި އެވެ.
“މި މުބާރާތަކީ އުއްމީދުގެ ހިތްވަރު ހޯދުމުގެ ދުވަސްތަކަކަށް ވެގެން ދާނެ.
"ހެޔޮ ނިޔަތުގައި 28 ދުވަހުގެ މުއްދަތަށް އަޅުގަނޑުމެން މުބާރާތާއިގެން ކުރިއަށް ދާނީ ދުނިޔޭގެ އެހެން ގައުމުތަކާ ވެސް ގުޅިގެން، އެއް ފުރާޅެއްގެ ދަށުގައި. މި ފުރާޅުގެ ދަށުގައި އެންމެން އެކަތިގަނޑަކަށް ވެ، ތަފާތު ގަބޫލުކުރުންތަކާއި ސަގާފަތަށް އިހުތިރާމް ކުރާނެ. އުންމީދު ކުރަނީ ދުނިޔޭގެ ހުރިހާ ކަންކޮޅުތަކަކުން ވެސް ބައްލަވާ ފަރާތްތަކަށް މި ރަސްމިއްޔާތު ކަމުގޮސް، އަގުވަޒަން ކުރާނެ ކަމަށް. މުޅި ދުނިޔެއަށް ވެސް މަރުހަބާ!"
ޖުމްލަ 60،000 ސަޕޯޓަރުންގެ ޖާގައިގެ އަލް ބަޔަތު ސްޓޭޑިއަމްގައި ހުޅުވުމުގެ ރަސްމިއްޔާތު ފެށީ އެމެރިކާގެ މަޝްހޫރު އެކްޓަރު، 85 އަހަރުގެ މޯގަން ފްރީމަންގެ ހުށަހެޅުމަކާ އެކު އެވެ. މޯގަން ފްރީމަންގެ ހުށަހެޅުމުގައި ވެސް އަލިއަޅުވާލީ އެއްބައިވަންތަ ކަމަށެވެ.
"މިތާނގައި އަޅުގަނޑުމެން ބައިބައިވުމަށް ދެވޭ ޖާގައަށް ވުރެ، އެއްބައިވަންތަކަމަށް މާ ބޮޑު ޖާގައެއް އެބަ އޮތް،" މޯގަން ފްރީމަންގެ ހުށަހެޅުން ފަށަމުން ކިޔައިދިނެވެ.
އެއަށް ފަހު އޮތް ހުށަހެޅުމުގައި ހަނަފަސް ސަހަރާތަކާއި، ޖަމަލު ފަދަ ސަވާރީތަކާ އެކު ގަތަރުގެ ސަގާފަތް ދައްކާލި އެވެ. އަދި ކޮންމެ އަހަރަކު ގަތަރަށް އަންނަ ވޭލް ޝާކް މޫސުން ރަމްޒު ކޮށްދޭން ބޮޑު ވޭލް ޝާކެއް ވެސް ރަސްމިއްޔާތު ފަށަމުން ދައްކާލި އެވެ.
މީގެ އިތުރުން މިއަހަރުގެ ވޯލްޑް ކަޕްގެ ރަސްމީ މެސްކޮޓް، 'ލައީބް' ދައްކާލުމުގެ ކުރިން ވަނީ މީގެ ކުރީ ވޯލްޑް ކަޕް ތަކުގައި ބޭނުންކުރި މެސްކޮޓްތަކާއި، މަޝްހޫރުކަން ހޯދި ބައެއް ލަވަތައް ވެސް ހުށަހެޅުންތަކުގައި ބޭނުން ކުރި އެވެ.
އެންމެ ފަހުން މި އަހަރުގެ ވޯލްޑް ކަޕްގެ ރަސްމީ ލަވަ، "ޑްރީމާސް" ހުށަހަޅައިދިނީ ދެކުނު ކޮރެއާގެ ބީޓީއެސް ލަވަކިޔުންތެރިޔާ ޖަންގް ކުކް އެވެ.
ހުޅުވުމުގެ ރަސްމިއްޔާތު ކުރިއަށް ދިޔަ އިރު ވެސް ހުޅަނގުގެ މީޑިއާތަކުން ދިޔައީ ހުޅުވުމުގެ ރަސްމިއްޔާތަށް ވެސް ފާޑު ކިއުމުންނެވެ. ގަތަރުގެ އަމީރު އަރަބި ބަހުން ވާހަކަ ދެއްކުމުން ވެސް އިނގިރޭސި ވިލާތުގެ ދި ގާޑިއަންގައި ފާޑު ކިޔުންތައް ހުއްޓެވެ.
