ދޯހާ (ނޮވެމްބަރު 20) - އިކުއެޑޯގެ ކޯޗު ގުސްޓާވޯ އަލްފާރޯ، އޭނާގެ ޒުވާން ދުވަސްވަރު ކިޔެވީ ކެމިކަލް އިންޖިނިއަރިންގެ ދާއިރާއިންނެވެ. ފުޓްބޯޅަ ކުޅުންތެރިޔެއްގެ ގޮތުގައި އޭނާގެ އުފަން ގައުމު އާޖެންޓީނާގައި ދެވަނަ ޑިވިޝަނަށް ވުރެ މައްޗަކަށް އޭނާ އަކަށް ނޭރުނެވެ. އޭނާގެ އުފަށް ރަށަށް ނިސްބަތްވާ އެތުލެޓިކޯ ޑި ރަފައެލާގެ ކެޕްޓަންކަން ކުރުން ފިޔަވައި ކުޅުންތެރިޔެއްގެ ގޮތުގަައި މާ ބޮޑު ކަމެއް އޭނާ އަށް ހާސިލު ނުކުރެވުނެވެ.
މިހާރު އުމުރުން 60 އަހަރުގައި، އޭނާ ކުރިމަތިލަނީ އޭނާގެ ފުރަތަމަ ވޯލްޑް ކަޕަށެވެ. ވޯލްޑް ކަޕްގައި އަލަށް ކޯޗުކޮށްދޭ ހަ ކޯޗުންގެ ތެރޭގައި އުމުރުން އެންމެ ދުވަސްވީ ކޯޗަކީ އޭނާ އެވެ.
"އަހަރެންގެ އަންހެނުންނާއި އަންހެން ދަރިފުޅު ކައިރީ އަހަރެން ވައުދުވިން އުމުރުން 60 އަހަރުގައި އަހަރެން ރިޓަޔާ ކުރާނަމޭ. އޯގަސްޓްގައި އަހަންނަށް 60 އަހަރު ފުރިއްޖެ. ވޯލްޑް ކަޕް ނިމުނީމަ އަހަރެންގެ ސަމާނުތައް ހިފައިގެން އަހަރެން ދާނަން. އަހަރެން ބޭނުމެއް ނޫން ރިޓަޔާ ކުރުމާ ބެހޭގޮތުން މިވަގުތު ވީސްނާކަށް. އަހަރެން ވިސްނަނީ ވޯލްޑް ކަޕާ މެދު. އުޅެނީ އެކަމުގެ ތެރޭގައި،" އާޖެންޓީނާގެ ބޮކާ ޖޫނިއާސް އަށް ކޯޗު ކޮށްދިން އަލްފާރޯ ބުންޏެވެ.
ކޯޗިން ކެރިއާގެ 26 އަހަރުގައި އަލްފާރޯ ވަނީ އާޖެންޓީނާގެ 10 ކްލްބަކަށް ކޯޗުކޮށް ދީފަ އެވެ. އޭނާ ފެށީ އޭނާ ކެޕްޓަންކަން ކުރި ކްލަބް ރަފައެލާއިންނެވެ. އެންމެ ފަހުން ބޮކާ ޖޫނިއާސް އަށެވެ.
އިކުއެޑޯގެ ކޯޗުކަން އަލްފާރޯ އަށް ހުށަހެޅީ ބޮކާ ޖޫނިއާސްގެ ކޯޗުކަން ދޫކޮށްލިތާ 10 މަސް ފަހުންނެވެ. އޭރު އޮތީ ކޮވިޑް-19 ގެ ވިލާގަނޑު މުޅި ދުނިޔެ ބައްދައިލައިފަ އެވެ.
"ބޮކާ އަކީ ވަރަށް ބޮޑު ކްލަބެއް އެ ކްލަބްގައި އަހަރެން މަސައްކަތް ކުރީމަ އަހަންނަށް އިހްސާސް ކުރެވުނު ދެން އަހަރެން ނަގަން ޖެހޭ ފިޔަވަޅަކީ ގައުމީ ޓީމެއް މެނޭޖުކުރުންކަން. އަހަރެން ހުރީ ގައުމީ ޓީމަކަށް ފުންމާލަން ބޭނުން ވެފަ،" އިކުއެޑޯގެ ކޯޗުކަމާ ހަވާލުވާން ނިންމި ނިންމުމާ ބެހޭގޮތުން އަލްފާރޯ ވާހަކަ ދެއްކި އެވެ.
އެކަމަކު އިކުއެޑޯގެ ވަޒީފާގައި އަލްފާރޯ އަށް ކުރިމަތިވީ ފަސޭހަ މަސައްކަތެއް ނޫނެވެ. މެޗެއްގައި ކޯޗުކޮށް ދިނުމުގެ ކުރިން އޭނާ އަށް ޖެހުނީ މުޅިން އާ ޓީމެއް އެކުލަވާލާށެވެ. ކޮޕާ އެމެރިކާ 2019 ގެ މުބާރާތުގައި ގުރޫޕުގެ ފުލަށް އިކުއެޑޯ ވެއްޓުމުން އެ ޓީމުގެ ގިނަ ކުޅުންތެރިން ރިޓަޔާ ކުރި އެވެ. އޭނާގެ ކުރިން ގައުމީ ޓީމުގެ ކޯޗުކަން ކުރި ހަތަރު ކޯޗަށް ވެސް އަހަރަކަށް ވުރެ ގިނަ ދުވަހު މަގާމުގައި ހިފަހައްޓައެއް ނުލެވުނެވެ. އެ ކޯޗުންގެ ތެރޭގައި މަޝްހޫރު ޔޯހާން ކްރައިފްގެ ދަރިފުޅު ޖޯޑީ ކްރައިފް ވެސް ހިމެނުނެވެ.
"އަހަންނަށް އެނގުނު ގިނަ ކުޅުންތެރިން އަލުން ގައުމީ ޓީމަށް ކުޅެން އަންނަން ބޭނުން ނުވާކަން. ގައުމީ ޓީމަށް ކުޅުމަކީ ފަހުރެއް ކަމުގެ އިހްސާސެއް އެ ކުޅުންތެރިންނަކަށް ނުކުރެވޭ،" އަލްފާރޯ ބުންޏެވެ.
"އެހެންވީމަ އަހަންނަށް ފުރަތަމަ ކުރަން ޖެހުނު ކަމަކީ ކުޅުންތެރިންގެ ގުރޫޕެއް އުފައްދާފަ ގައުމީ ޓީމަށް ކުޅުމަކީ ކިހާ ވަރެއްގެ ފަހުރެއްކަން ކިޔައިދޭން. އެއީ ހަމައެކަނި ޖޯޒީއެއް ލައިގެން ކުޅޭ އިންޓަނޭޝަނަލް ފުޓްބޯޅަ މެޗެއް ނޫންކަން ކިޔައި ދޭން. އެމީހުން އެ ކުޅެނީ މުޅި ގައުމަށްޓަކައި ކަން. ޓީމެއް ބިނާ ކުރަން އަހަރެން ވިސްނީ އެކަން ކުޅުންތެރިންނަށް ވިސްނައި ދިނުމަށް ކުރި މަސައްކަތް ކާމިޔާބު ވުމުން."
ހުސްވަގުތެއް ލިބިއްޖެނަމަ ފުޓްބޯޅަ އާ ދުރުގައި ވަގުތު ކޮޅެއް ހޭދަ ކުރަން އަލްފާރޯ ކުރާ ދެ ކަމަކީ ގޮލްފް ކުޅުމާއި ތާރީހީ ފޮތްތައް ކިޔުމެވެ. އެހެންވެ ދުނިޔޭގެ މަޝްހޫރު ޝަހުސިއްޔަތުތަކުގެ ވާހަކަތައް އޭނާ އަށް ފަރިތަ އެވެ.
"އަހަރެން އެ ކުޅުންތެރިންނަށް ކިޔައި ދެން [ވިސްޓަން] ޗާޗިލް ވިދާޅުވެފައިވާ ބައެއް އިބާރާތްތައް. އަހަރެން ބުނަން ކަލޭމެން ދެކޭ ގޮތް ބަދަލު ނުކުރާހާ ހިނދެއްގައި އެއް ވެސް ކަމެއް ބަދަލެއް ނުކުރެވޭނެޔޭ. އެހެންވީމަ އަހަރެމެން އެބަޖެހޭ ބައެއް ކަންކަން ބަދަލު ކުރަން." އިނގިރޭސި ވިލާތުގެ ބޮޑު ވަޒީރުކަން 1940 ން 1950 އަށް ކުރި ވިސްޓަން ޗާޗިލްގެ އިބާރާތްތައް ކަމަށް ބުނެ އަލްފާރޯ ވާހަކަ ދެއްކި އެވެ.
"މިއަދު އަހަރެން އަތުގައި މިއޮތީ ދެކުނު އެމެރިކާގެ އެންމެ ޒުވާން ސްކޮޑް. ދިފާއީ ގޭމްގައި އެންމެ ރަނގަޅު ސްކޮޑް، ވިއްދައިގެން، ބޯޅަ ހޯދައިގްން ކުޅޭ ހަލުވި ކުޅުންތެރިން ހިމެނޭ އަދި ފިޒިކަލީ ރަނގަޅު ސްކޮޑެއް."
ކޯޗެއްގެ ގޮތުގައި އަލްފާރޯގެ ފުރަތަމަ ވޯލްޑް ކަޕް މެޗުގައި މިރޭ ނުކުންނާނީ ގަތަރާ ދެކޮޅަށެވެ. މެޗު ފަށާނީ ރާއްޖޭގަނޑިން 9 ޖަހާއިރު އެވެ.