ވިލިމާލެ އިން މިދިޔަ އަންގާރަ ދުވަހުގެ ރޭ ތެޔޮ ބޯޓެއްގައި ފުރި ދެ މީހަކު ހޯދަން މާލެ ވެސް ބަލަމުން އަންނަ ކަމަށް ފުލުހުން މިއަދު ބުނެފި އެވެ.
ފުލުހުން ބުނީ ގެއްލުނު މީހުން ހޯދުމުގެ މަސައްކަތުގައި މެރިން ޕޮލިސް އާއި ކޯސްޓް ގާޑުން ކުރަމުން އަންނަ ކަމަށެވެ. އަދި އެ މީހުން ހޯދުމުގެ މަސައްކަތުގެ ތެރެއިން މާލެ ތެރެ ބެލުމުގެ މަސައްކަތް ވެސް ކުރަމުން އަންނަ ކަމަށް ފުލުހުން ބުންޏެވެ.
އެކަމަކު އެ މީހުން ހޯދަން މާލެ ބަލަނީ ކީއްވެ ކަމެއް ފުލުހުން ނުބުނެ އެވެ.
ގެއްލިގެން އުޅެނީ ގދ. ތިނަދޫ މަނާރު، މުހަންމަދު ނިޒާމް 45، އާއި ބަންގްލަދޭޝްގެ ރައްޔިތެއް ކަމަށްވާ މުހައްމަދު ލިޓަން 35، އެވެ.
އެ މީހުންނާ ބެހޭ އެއްވެސް ހަބަރެއް ނުވެގެން ރިޕޯޓްކުރީ ޖެހިގެން އައި ބުދަ ދުވަހު ކަމަށް ވެސް ފުލުހުން ބުންޏެވެ. އެކަމަކު، ބޯޓު ފުރައިގެން ދިޔައީ ކޮންތަނަކަށް ކަމެއް އަދި ގެއްލުނީ ކިހިނެއް ކަމެއް ވެސް ފުލުހުން އަދި ނުބުނެ އެވެ. އެކަމާ ބެހޭ ތަފުސީލެއް ވެސް ނުދެ އެވެ.
ގެއްލިގެން ބަޔަކު ހޯދަމުން އަންނައިރު، މިއަދު ހެނދުނު ވ. ވެންފަރު ފަޅުގެ ހުޅަނގު އުތުރު ކަނޑުން މީހެއްގެ ހަށިގަނޑު ވަނީ ފެނިފަ އެވެ. އެ މައްސަލަ ވެސް ފުލުހުން އަންނަނީ ތަހުގީގުކުރަމުންނެވެ.