މާލާއަށް ދެއްކި އެއްވެސް މީހަކު ރަނގަޅެއް ނުވޭ!

ބީރު މީހުން ރަނގަޅުކޮށްދޭ ކަމަށް މަޝްހޫރު ޑރ. މާލާ އަލީ "ފަރުވާ" ދިން މީހުންގެ ހާލަތަށް އެއްވެސް ބަދަލެއް ނާންނަ ކަމަށް ފަރުވާ ހޯދި މީހުން މިއަދު ބުނެފި އެވެ.

އުފެދުމުގައި، އަދި އޭގެ ފަހުން ދިމާވި އެކި މައްސަލަތަކުގައި ވެސް ބީރުވެފައި ތިބި މީހުންނާއި މަންމަނު މީހުން ރަނގަޅު ކުރާ ކަމަށް މަޝްހޫރު އިރާގުގެ "ޑޮކްޓަރަކު" ރާއްޖެ އައީ މިދިޔަ މަހުގެ ފަހުކޮޅު އެވެ.

ނަމަވެސް، ހުއްދަ ނެތި ފަރުވާ ދިން ކަމަށް ބުނެ، ހެލްތު މިނިސްޓްރީން ވަނީ އެ މައްސަލަ ބަލަން ފަށައިފަ އެވެ. އެކަމަކު އޭރު ވަނީ އޭނާ ރާއްޖޭން ފުރައިގެން ގޮސްފަ އެވެ.

މާލާ އެކަން ކުރަނީ އާޔަތްތަކެއް ކިޔުމަށް ފަހު ކަރާއި ކަންފަތުގައި އަތުން ހިފަހައްޓައި އަނގަޔަށް އިނގިލި ކޮއްޕައި ހަށިގަނޑުގެ އެކި ތަންތަނުގައި އަތުނަ ތަޅަ އެވެ. އެއާ އެކު، ދެ ކަންފަތަށް ވެސް އަޑު އިވޭ ކަމަށް އެ ކުއްޖާ ބުނެ އެވެ.

ސޯޝަލް މީޑިއާގައި ކުރި ޕޯސްޓެއްގައި މާލާ ބުނީ އަޑު އިވުމުން މަހުރޫމްވެފައިވާ ވަރަށް ގިނަ ކުދިން ރާއްޖެ އިން ރަނގަޅުކޮށްދީފައި ވާނެ އެވެ.

އޭނާ ކައިރިން ފަރުވާ ހޯދުމަށް އދ. މާމިގިލި އަދި އެ އަތޮޅު ދިއްދޫން ބަޔަކު މާލެ އައިސްފައިވެ އެވެ. އޭގެ ތެރޭގައި މާމިގިލީގެ މަންމަނު އެއްބަނޑު އެއްބަފާ ދެބެއިން ވެސް ހިމެނެ އެވެ.

އެ އާއިލާއިން ވާހަކަ ދެއްކި މީހަކު ބުނީ ރަށުގައި ހުރެފައި މަންމައާ އެކު އެ ދެ ކުދިން މާލެ ދިޔައީ ވެސް މާލާއަށް ދައްކަން ކަމަށެވެ. އެ ދެބެއިންނަކީ ވިހެއިރު ވެސް އަޑުނީވޭ، ވާހަކަ ނުދެއްކޭ ދެ ފިރިހެނުންނެވެ.

އެ ތަނުން ހަގު ކުއްޖާއަށް މި އަހަރު ނުވަ އަހަރުވާނެ އެވެ. ބޮޑު ފިރިހެން މީހާއަށް 28 އަހަރުވާނެ އެވެ.

އޭނާ ބުނީ ހަގު ކުއްޖާއަށް ތިން އަހަރުގައި އެއް ކަންފަތް އޮޕަރޭޝަން ކޮށް ހިއަރިން އެއިޑް ބޭނުންކުރާ ކަމަށެވެ. އެ ބޭނުންކޮށްގެން ނޫނީ އެއްވެސް ގޮތަކަށް އަޑު ނީވޭ ކަމަށް އޭނާ ބުންޏެވެ. އަދި ކޮންމެ ދެ އަހަރަކުން ޑޮކްޓަރަށް ދައްކަ އެވެ.

އޭނާ ބުނި ގޮތުގައި މާލާ އެ ކުރި ކަމެއް ކުރި ވަގުތު އަޑުއިވުނު ކަމަށް ބުނި ކަމަށާއި ފަހުން އޭގެ އެއްވެސް ބަދަލެއް ނުފެންނަ ކަމަށެވެ.

"އިޝާ ނަމާދަށް ފަހު ހުޅުމާލޭގައި އުޅޭ އާއިލާއެއްގެ ގެއަށް އޭނާ ގެންދިޔައީ. ފަރުވާ ދީފައި ބުނީ ކަންފަތް ކައިރީގައި ގިނަގިނައިން ގުރުއާން ޖަހާށޭ. އޭރަށް ރަނގަޅުވާނެއޭ އަދި ހަ މަސް ފަހުން އަންނާނަމޭ." އާއިލާއިން ވާހަކަ ދެއްކި މީހާ ބުންޏެވެ.

މިކަމަށް މާލާ އެއްވެސް އަގެއް ނުކިޔާ ކަމަށާއި މިއީ، ހިލޭ ކޮށްދޭ ކަމެއް ކަމަށް މާލާ ބުނި ކަމަށް އޭނާ ބުންޏެވެ. އެކަމަކު އޭނާ ފައިސާ ނަގާ ކަމަށް ވެސް ބައެއް މީހުން ބުންޏެވެ.

އދ. ދިއްދޫގެ ތިން ކުއްޖަކު ވެސް އޭނާ ކައިރިއަށް ގެންދިޔަ އެވެ. އެ ތަނުން ހަ އަހަރުގެ ކުއްޖެއްގެ މަންމަ "މިހާރު" އަށް ބުނީ މާލާ ރާއްޖޭގައި އުޅޭކަން އެނގުނީ ވެސް ދުރުތާ ތިމާގެ މީހެއްގެ ފަރާތުން ކަމަށެވެ. އޭގެ ކުރިން ވެސް އޭނާގެ ވީޑިއޯތައް ފެނިފައި ހުރުމުން ދަރިފުޅު ރަނގަޅުވޭތޯ ދައްކަން ބޭނުންވީ ކަމަށް އޭނާ ބުންޏެވެ.

އޭނާ ބުނީ ފިރިހެން ދަރިފުޅަށް އަޑު އިވެނީ އޮޕަރޭޝަން ކޮށްގެން ހިއަރިން އެއިޑްގެ އެހީގައި ކަމަށެވެ. އެ ދުވަހު ހިއަރިންއާ ނުލައި ގާތްގަނޑަކަށް 10-15 މިނެޓުގެ "ފަރުވާ" ގެ ފަހުން އަޑުއިވުނު ކަމަށް ބުންޏެވެ. ނަމަވެސް، އެ ދުވަހު އިރުއޮއްސުނު ފަހުން ހަމަ ކުރީގެ ހާލަތަށް ބަދަލުވީ އެވެ.

"އާޔަތްތަކެއް" ކިޔެވި ފަހުން ކުއްޖާއަށް އަޑުއިވުމުން ކުއްޖާ ސިއްސައިގެން ދިޔަ ކަމަށާއި އެ ކުއްޖާ އެހާ ބޮޑަށް ސިއްސައިގެން ދިޔަ ތަން އަދި ނުފެންނަ ކަމަށް ވެސް މަންމަ ބުންޏެވެ.

"އެ ގަޑީގައި ކައިރީގައި އަތް ޖެހީމަ އަޑުއިވުނު ހިއަރިން ނުލާ ވެސް. އެ ދުވަހު ދަރިފުޅު ކަންފަތް ކައިރީގައި ހުރެގެން ވެސް އަޅުގަނޑު މާ ގިނައިން ވާހަކަ ދައްކާތީ ދަރިފުޅު ބުނި އުނދަގޫވެއޭ. އެހެންވެ، ފަހުން ހުއްޓާލީ. އޭގެ ފަހުން ހަމަ ކުރީގެ ގޮތަށް މި ބަދަލުވީ." އޭނާ ބުންޏެވެ.

ވިހެއިރު ދަރިފުޅަށް އަޑުނީވޭކަން އެނގޭތީ ދެ ފަހަރަށް އިންޑިއާއަށް ދިޔަ އެވެ. އޭރު ވެސް ކަންފަތުގެ މައްސަލައެއް ނެތް ކަމަށް ޑޮކްޓަރުން ބުނި ކަމަށާއި އެ ކުއްޖާގެ ކަންފަތުގެ މައްސަލައެއް ނެތް ކަމަށް މާލާ ވެސް ބުނި ކަމަށް އޭނާ ބުނެ އެވެ.

ފަހުން ލަންކާއަށް ގޮސް ޑޮކްޓަރަށް ދެއްކުމުން އެނގުނީ ސިގްނަލް ނަގައި ނުދެވޭތީ އަޑުއިވުމުގެ މައްސަލަ ދިމާވަނީ ކަމެވެ.

"އިންޑިއާއިން ބުނީ ކަންފަތުގެ މައްސަލައެއް ނެތޭ އެކަމަކު މައްސަލައެއް ބުނެދޭކަށް ނޭނގެއޭ. މާލާއަށް ކިޔައިނުދެން މިއިން އެއްވެސް ވާހަކައެއް. އެކަމަކު އޭނާ ވެސް ބުނި ކަންފަތުގެ މައްސަލައެއް ނެތޭ." ކުއްޖާގެ މަންމަ ބުންޏެވެ.

އޭނާ ބުނި ގޮތުގައި މާލާ ފަރުވާ ދިނުމަށް ފަހު، ކުއްޖާއަށް މަހާއި ކިރާއި ބިސް ނުދޭން ބުންޏެވެ. އަދި ހިއަރިން އެއިޑް ނުލައި ކޮންމެ ދުވަހަކު ކަންފަތް ކައިރީގައި މަދުވެގެން އެއް ގަޑިއިރު ގުރުއާން ޖަހާފައި ބެހެއްޓުމަށް އެދުނެވެ.

"އޭރަށް މަޑުމަޑުން ރަނގަޅުވާނެ ކަމަށް ބުނީ." އޭނާ ބުންޏެވެ.

މާލާ އަކީ މިގޮތަށް މީހުންނަށް ފަރުވާ ދޭ ކަމަށް ބުނެ އޮޅުވާލައިގެން އެކި ކަންކަން ކުރާ ކަމުގެ ތުހުމަތު އެކި ގައުމުތަކުން ކޮށްފައިވާ މީހެކެވެ. އޭނާ ވަނީ މީގެ ކުރިން ސައޫދީ އަރަބިއްޔާގައި ހައްޔަރު ވެސް ކޮށްފަ އެވެ.