ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމްގެ ބައްދަލުވުމެއް ފައްޓަވައިފި އެވެ.
ރައީސް އޮފީހުގެ ކޮމިއުނިކޭޝަންސް ސެކްރެޓަރީ ހިސާން އަލީ ފަހުމީ (ހިސްކޮ) އެކަން "މިހާރު" އަށް ކަށަވަރު ކޮށްދެއްވި ނަމަވެސް ތަފުސީލެއް ނުދެއްވަ އެވެ.
މި ސަރުކާރުގެ ކޯލިޝަން ޕާޓްނަރު ޖޭޕީގެ ލީޑަރު ގާސިމާއި ރައީސް އިބްރާހިމް މުހައްމަދު ސޯލިހު ރައީސް އޮފީހުގައި ބައްދަލުކުރައްވާއިރު، މި އަހަރުގެ ރިޔާސީ އިންތިހާބަށް ގާސިމާއި ކުރީގެ ރައީސް މުހައްމަދު ނަޝީދު އެކުގައި ނުކުމެވަޑައިގަންނަވާ ވާހަކަތައް ވަނީ ފެތުރިފަ އެވެ. އިވޭ އަޑުތަކަށް ބަލާއިރު ނަޝީދު ބޭނުންފުޅުވަނީ ގާސިމްގެ ރަނިންމޭޓަކަށް ވެވަޑައިގަތުމަށެވެ. އެކަމަކު، އެ ކަމާ ބެހޭ ގޮތުން ދެ ބޭފުޅުން ވެސް އަދި ވާހަކައެއް ނުދައްކަވަ އެވެ.
ރައްޔިތުންގެ މަޖިލިހުގެ އިއްޔެގެ ޖަލްސާގައި ނަޝީދުގެ ފެކްޝަންގެ އިސް މެމްބަރު ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވެސް އެފަދަ އިޝާރާތެއް ދެއްވައި އާންމުންނަށް ސުވާލެއް ދޫކޮށްލައްވައިފަ އެވެ.
އޭނާގެ ސުވާލަކީ ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް އެމްޑީޕީ ފިޔަވައި އެހެން ޕާޓީއެއްގެ ކެންޑިޑޭޓަކާއި އެމްޑީޕީގެ ރަނިންމޭޓެއް އިންތިހާބު ކުރުން ކިހިނެތް ވާނެތޯ އެވެ.
ނަމެއްގައި ރައިސުލްޖުމްހޫރިއްޔާގެ މަގާމުގައި އެމްޑީޕީގެ މެންބަރަކު ހުރުމަށް ވުރެ 40 ޕަސެންޓަށް ވުރެ ބޮޑު ހިއްސާއަކާ އެކީގައި އެމްޑީޕީ އަށް ސަރުކާރަށް އާދެވިފައި އެމްޑީޕީގެ ސިޔާސަތުތަކާއި އަސާސްތަކާއި އުސޫލުތައް ހިފެހެއްޓޭނެ ސަރުކާރެއް އުފެއްދުން މާ މުހިންމު ކަމަށް ހަސަން ވިދާޅުވި އެވެ.
"މިއީ ވަރަށް ރަނގަޅު ނުކުތާއެއް އެމްޑީޕީގެ މެންބަރުން ވިސްނާލަން. ކިހިނެތްތޯ ވާނީ އެހެން ޕާޓީއެއްގެ މެންބަރަކު ރައީސުލްޖުމްހޫރިއްޔާގެ މަގާމަށް ކުރިމަތިލައްވާ ބޭފުޅެއް ގޮތުގައި ހުންނަވާފައި އެމްޑީޕީގެ ރަނިން މޭޓަކާއި އަދި އެމްޑީޕީ ހިއްސާވާ ސަރުކާރެއް އުފައްދައި އަޅުގަނޑުމެންގެ ބަސް ބުނެވޭނެ އަދި މަޝްވަރާ އާއި ލަފާ ދެވޭނެ ސަރުކާރެއް އޮވެ ރައްޔިތުންނަށް ހިދުމަތް ކުރަން ތިބުން،" އޭނާ ވިދާޅުވި އެވެ.
މިދިޔަ ހަފުތާ ބަންދުގައި ބޭއްވި ޖޭޕީގެ ކޮންގްރެސް ހުޅުވުމާއި ނިމުމުގެ ރަސްމިއްޔާތުގައި ވެސް ނަޝީދު ބައިވެރިވެވަޑައިގެންނެވި އެވެ. އެ ދެ ރަސްމިއްޔާތުގައި ވެސް ގާސިމް ވަނީ ނަޝީދުގެ ރަނގަޅު ކަންކަން ވަރަށް ބޮޑަށް ފާހަގަކުރައްވައި ތައުރީފު ކުރައްވައިފަ އެވެ. އެކަމަކު، ރައީސް އިބްރާހިމް މުހައްމަދު ސޯލިހަށް ތައުރީފު ނުކުރައްވާތީ ކުރިމަތިވި ފާޑުކިޔުންތަކާ ގުޅިގެން ވިދާޅުވީ، އެ މަނިކުފާނު ގޯހެކޭ ވިދާޅުނުވާ ކަމަށެވެ.
މި އަހަރުގެ ރިޔާސީ އިންތިހާބަށް އެމްޑީޕީގެ ކެންޑިޑޭޓްގެ ހައިސިއްޔަތުން ކޯލިޝަނަކާއެކު ނުކުމެވަޑައިގެން އެއްބުރުން އެ އިންތިހާބު ކާމިޔާބު ކުރެއްވުމަކީ ރައީސް އިބްރާހިމް މުހައްމަދު ސޯލިހު ވަރަށް ބޮޑަށް ބޭނުންފުޅުވާ ކަމެކެވެ. އެކަމަކު، މިހާރުގެ ކޯލިޝަން ޕާޓްނަރުންގެ ތެރެއިން ރައީސާއެކު ތިބޭނެކަން މިހާތަަނަށް ހާމަކުރީ އަދާލަތު ޕާޓީން އެކަންޏެވެ. ޖޭޕީ އާއި އެމްއާރުއެމުން އަދި ގޮތެއް ނުނިންމަ އެވެ.
އަދާލަތު ޕާޓީގެ އިތުރުން ސަން ޓްރެވެލް އަހުމަދު ސިޔާމްގެ އެމްޑީއޭ އިން ވަނީ އެމްޑީޕީއާއެކު ރިޔާސީ އިންތިހާބަށް ކޯލިޝަން ހަދަން ނިންމައިފަ އެވެ.
ގާސިމްގެ ތާއީދު ހޯދުމަށް ރައީސް އިބްރާހިމް މުހައްމަދު ސޯލިހާއި ނަޝީދު ވެސް ގެންދަވަނީ ވަރަށް ބޮޑަށް މަސައްކަތްޕުޅު ކުރައްވަމުންނެެވެ.