އަލް މަޝްއަރު ހައްޖު އެންޑް އުމްރާ ގުރޫޕްގެ ހަވާލުގައި 138 މީހަކު މި ރޯދަމަހުގެ އުމްރާ އަށް ސައޫދީ އަށް ގެންދަން ފްލައިޓް ޗާޓަރު ކުރި ކުންފުންޏަށް ދޫކުރި ދެ ޗެކް ބައުންސް ވެފައި ވަނިކޮށް، އެ ގުރޫޕުން ސައޫދީ އެއާލައިންސްގައި ގެންދިޔަ ބައެއްގެ ޓިކެޓަށް ވެސް ފައިސާ ނުދައްކާ މައްސަލައެއް ފެންމަތިވެއްޖެ ކަމަށް އިސްލާމިކް މިނިސްޓްރީން މިއަދު ބުނެފި އެވެ.
އަލް މަޝްއަރު ގުރޫޕުގެ ހަވާލުގައި އެހެން އެއާލައިނެއް މެދުވެރިކޮށް ދެ ބުރެއްގެ މަތިން 138 މީހަކު އުމްރާ އަށް ގެންދިޔަ އެވެ. އެކަމަކު، ފްލައިޓް ޗާޓަރު ކުރުމާއި ޓިކެޓްގެ ފައިސާގެ އަދަދަށް ވާ ދެ ޗެކް ބައުންސް ވުމުން، ފްލައިޓް ޗާޓަރު ކޮށްދިން ދިވެހި ކުންފުނިން ވަނީ އެ މައްސަލަ އިސްލާމިކް މިނިސްޓްރީ އަށް ހުށަހަޅައިފަ އެވެ.
"ޓްރެވެލް 2 މޯލްޑިވްސް" ކިޔާ ކުންފުންޏެއް މެދުވެރިކޮށް ފްލައިޓް ޗާޓަރު ކުރުމާއި ޓިކެޓް ނެގުމުގެ ހަރަދަށް 141،450 ޑޮލަރު އަރާފައި ވެ އެވެ. އެކަމަކު، ފައިސާ ފަހުން ދައްކާނެ ކަމަށް ބުނެ އަލް މަޝްއަރު އުމްރާ ގުރޫޕުުން ދޫކުރީ ދެ ޗެކެކެވެ. އެ ދެ ޗެކް ވެސް ބައުންސްވީ ކަމަށް "ޓްރެވެލް 2 މޯލްޑިވްސް"ގެ އިސްބޭފުޅަކު ކުރިން ވިދާޅުވެފައި ވެ އެވެ.
"ޓްރެވެލް 2 މޯލްޑިވްސް" އަށް އަލް މަޝްއަރު އުމްރާ ގުރޫޕުން ދޫކުރި ދެ ޗެކް ބައުންސްވި މައްސަލަ "މިހާރު" އިން ފެންމަތި ކޮށްފައި ވަނިކޮށް، އިސްލާމިކް މިނިސްޓަރު ޑރ. އަހުމަދު ޒާހިރު އަލީ މިއަދު ވިދާޅުވީ ސައޫދީ އެއާލައިންސްގެ ފްލައިޓެއްގައި އެ ގުރޫޕުން ގެންދިޔަ 70 ވަރަކަށް މީހުންގެ ރިޓާން ޓިކެޓްގެ ފައިސާ ނުދައްކާ ކަން މިހާރު އެނގިވަޑައިގެންފައިވާ ކަމަށެވެ. އެހެންވެ، އެ ފައިސާ ދައްކަން ވެސް އަލް މަޝްއަރު އުމްރާ ގުރޫޕަށް ބާރު އަޅަމުން އަންނަ ކަމަށް މިނިސްޓަރު ވިދާޅުވި އެވެ.
އެނގިފައިވާ ގޮތުގައި ސައޫދީ އެއާލައިންސަށް މަޝްރައު އުމްރާ ގުރޫޕުން 90،000 ޑޮލަރު ދައްކަން ޖެހެ އެވެ.
"ޓްރެވެލް 2 މޯލްޑިވްސް" އިން ޗާޓަރު ކޮށްދިން ފްލައިޓްގައި އުމްރާ އަށް ގެންދިޔަ 138 މީހުން މި މަހުގެ 27 ގައި ރާއްޖެ ގެންނަން ތާވަލު ކޮށްފައިވާއިރު، ބައުންސްވި ދެ ޗެކަށް އަދިވެސް އަލް މަޝްއަރު ގުރޫޕުން ފައިސާ ނުދައްކާ ކަމަށް ޑރ. ޒާހިރު ވިދާޅުވި އެވެ.
"އެ މައްސަލާގައި ވެސް މިދަނީ އެ މީހުންނާ ވާހަކަ ދައްކަމުން. ކޮންމެ ދުވަހަކު ވެސް ބުނަނީ މާދަމައޭ. މާދަމައޭ. ދުވަހަކު ފައިސާއެއް ނުދައްކާ. ޗެކް ބައުންސްވި މައްސަލަ ބަލަމުން ދަނިކޮށް އަނެއްކާ މި އެނގުނީ ސައޫދީ އެއާލައިނުން އެކޮޅަށް [ސައޫދީ އަށް] ގެންދިޔަ އެހެން ބައެއްގެ ޓިކެޓްގެ 50 ޕަސެންޓް ފައިސާ އެކަނިކަން ދައްކާފައި އޮތީ. އެ މީހުން އެނބުރި އަންނަން ފައިސާ ދައްކާފައެއް ނެތް،" މިނިސްޓަރު ވިދާޅުވި އެވެ.
އޭނާ ވިދާޅުވީ، އަލް މަޝްއަރު ގުރޫޕްގެ ހަވާލުގައި ގެންދިޔަ 200 އަށް ވުރެ ގިނަ އުމްރާވެރިން ރާއްޖެ ގެނައުމުގައި ތާށިތަކެއް އުޅެފާނެތީ އެކަމާ އިންތިހާ އަށް ކަންބޮޑުވެޑައިގަންނަވާ ކަމަށެވެ.
"މިއީ ވަރަށް ދެރަ ކަމެއް. ވަރަށް ބޮޑު މައްސަލައެއް. އަޅުގަނޑުމެން ފުރަތަމަ ބަލާނީ އެ އުމްރާ ގުރޫޕަށް ލާޒިމް ކުރަން އެ މީހުން [އުމްރާވެރިން] ރާއްޖެ ގެންނަން. ދެ ދުވަހަށް އަދި ބަލާފައި ވަކި ގޮތެއް ނިންމާނީ،" މިނިސްޓަރު ވިދާޅުވި އެވެ.
އަލް މަޝްއަރު އުމްރާ ގުރޫޕްގެ އިސް އޮފިޝަލަކު "މިހާރު" އަށް ކުރިން ވިދާޅުވީ، "ޓްރެވެލް 2 މޯލްޑިވްސް" އަށް ދޫކުރީ "ކޭޝް ޓްރާންސްފާ" ކުރާނެ ކަމުގެ ގެރެންޓީ ޗެކެއް ކަމަށެވެ.
"އަޅުގަނޑުމެން ދެންނެވި ޗެކް ޖަމާކުރުމުގެ ކުރިން އަޅުގަނޑުމެންނަށް ނޮޓިފައި ކޮށްލަން. އެއީ ހަމައެކަނި ގެރެންޓީ ޗެކެއް،" މިހާރު މައްކާގައި ހުންނެވި، އަލް މަޝްއަރު އުމްރާ ގުރޫޕްގެ އޮފިޝަލް ވިދާޅުވި އެވެ.
އެކަމަކު، ފްލައިޓް ޗާޓަރު ކުރުމުގައި މެދުވެރިވި ޓްރެވެލް 2 މޯލްޑިވްސްގެ އިސް އޮފިޝަލް ވިދާޅުވީ، މައްސަލަ ހޫނުވީ ބައުންސްވި ދެ ޗެކްގައިވާ އަދަދު ހޯދަން އުޅެއުޅެ ކާމިޔާބު ނުވުމުން ކަމަށެވެ.
"ޓީޓީ ނުލިބެއޭ ބުނެ ދިގު ދަންމަމުން އަންނަނީ. މިއަދާ ހަމައަށް ވެސް އަޅުގަނޑުމެން މަސައްކަތް ކުރީ އެ ފައިސާ ލިބޭތޯ. އެކަމަކު އެ ކަން ނުވި،" ފްލައިޓް ޗާޓަރު ކޮށްދިން ކުންފުނީގެ އިސް އޮފިޝަލް ވިދާޅުވި އެވެ.
އަލް މަޝްއަރު އުމްރާ ގުރޫޕުން މި ރޯދަމަހުގެ އުމްރާ ޕެކޭޖުގެ އަގަކީ 36،500ރ. އެވެ. އެއީ 30 ދުވަހުގެ އުމްރާގެ އަގެވެ. އޭގެ ތެރޭގައި ހިމެނެނީ މައްކާ އާއި މަދީނާގައި ތިބުމުގެ ހަރަދާއި ދެކޮޅު ޓިކެޓާއި ވިސާ އާއި ދަތުރުފަތުރު އަދި ތިން އިރުގެ ކެއުމުގެ ހަރަދެވެ.