އެމްއާރްއެމްގެ ރޫހު ސަރުކާރާ ދެކޮޅު ކަމަށް ބުނެ 8 މެންބަރަކު ޕާޓީން އިސްތިއުފާ ދެއްވައިފި

ކުރީގެ ރައީސް މައުމޫން އަބްދުލް ގައްޔޫމް އުފެއްދެވި މޯލްޑިވްސް ރިފޯމް މޫވްމަންޓް (އެމްއާރްއެމް)ގެ ރޫހު ސަރުކާރާ ދެކޮޅަށް އޮތް ކަމަށް ވިދާޅުވެ، އެ ޕާޓީގެ ސްލޮޓުގައި ސަރުކާރުގައި ތިއްބެވި އަށް މެންބަރަކު މިއަދު އިސްތިއުފާ ދެއްވައިފި އެވެ.

އެ މެންބަރުން ސޮއި ކުރައްވައި ޕާޓީ އަށް ފޮނުވި ލިޔުމެއްގައި ބުނެފައި ވަނީ އެމްއާރްއެމް އަކީ މައުމޫން ދެއްވި އިރުޝާދުގެ ދަށުން އުފެއްދި ޕާޓީއަކަށްވީ ނަމަވެސް އެމަނިކުފާނު ގެންގުޅުއްވި އަސާސްތަކާއި ފަލްސަފާތައް ފަނޑުވަމުން ގޮސް ވަކި ބަޔަކު ބޭނުންވާ މަގްސަދުތަކެއް ހާސިލް ކުރާ ހަތިޔާރަކަށް އެ ޕާޓީ ވެފައިވާ ކަމަށެވެ.

މި ސަރުކާރުގައި އެމްއާރްއެމް މުހިންމު ރޯލުތަކެއް އަދާ ކޮށްފައިވާ ކަމަށާއި ނަމަވެސް ފަހަކަށް އައިސް ޕާޓީގެ ބައެއް މެންބަރުން ހަރަކާތްތެރިވަނީ ރައީސް އިބްރާހިމް މުހައްމަދު ސޯލިހުގެ ސަރުކާރާ ކަނޑައެޅިގެން ދެކޮޅަށް ކަމަށް އެ ލިޔުމުގައި ބުނެފައިވެ އެވެ.

އިސްތިއުފާ ދެއްވި މެންބަރުން

މުހައްމަދު ފައިސަލް - ޔޫއޭއީގެ ޑެޕިއުޓީ އެމްބެސެޑާ

ތަޒްމީލް އަބްދުއްސަމަދު - އެމްޓީޑީސީގެ އެމްޑީ

މުހައްމަދު ރާއިދު - އެމްއައިޓީޑީސީގެ އެމްޑީ

އަބްދުލް ހަމީދު އަހުމަދު - ސީނިއާ އެގްޒެކެޓިވް ޑައިރެކްޓާ

ޝަޒާއިލް ޝިއާމް - މޯލްޑިވްސް ގޭސްގެ އެމްޑީ

އިބްރާހިމް ފަރުހަދު - ސީނިއާ ޕޮލިސީ ޑިރެކްޓާ

އިސްމާއިލް ނާއިލް ނަޝީރު - ހެރިޓޭޖް މިނިސްޓްރީގެ ޑިރެކްޓާ ކޮމިއުނިކޭޝަން

ހަސަން ހައްމާން އަހުމަދު - އެމްއާރްއެމްގެ އެކްސްކޯ މެންބަރު

ރިޔާސީ އިންތިހާބުގައި މި ޕާޓީން އަމަލު ކުރާނެ ގޮތެއް ނިންމަވާ ދެއްވުމަށް އެމްއާރްއެމްގެ ރައީސް އަހުމަދު ފާރިސް މައުމޫން އަރިހުން ތަކުރާރުކޮށް އެދިފައިވާ ކަމަށް އެ ލިޔުމުގައި ބުނެފައިވެ އެވެ.

ނަމަވެސް ފަހަކަށް އައިސް ސަރުކާރުގައި ތިއްބެވި އެމްއާރްއެމްގެ މެންބަރުންނަށް ދެކޮޅަށް އަޑު އުފުލުމާއި މަލާމާތްކޮށް ފުރައްސާރަ ކުރުން އާންމު ކަމަކަށްވެފައިވާ ކަމަށާއި އެމްއާރްއެމްގެ ސްލޮޓުގައި ތިއްބެވި ދެ މިނިސްޓަރުންނަށް "ވަގަށް" ވެސް ގޮވާފައިވާ ކަމަށް އެ ލިޔުމުގައި ބުނެފައިވެ އެވެ.

މީގެ އިތުރުން ޗާގޯސް މައްސަލާގައި އިދިކޮޅު ފަރާތްތަކާއެކު ޑރ. މުހައްމަދު މުނައްވަރު ދިން ނޫސްވެރިންގެ ބައްދަލުވުމުގައި އެމްއާރްއެމްގެ މެންބަރު އައިމިނަތު ނާދިރާ ބައިވެރިވުމަކީ ކޮރަޕްޝަނާއި އެތައް އަނިޔާތަކެއް ދީފައިވާ ބަޔަކާއެކު އަތުގުޅާލައިގެން ނުކުތުން ކަމަށް ވެސް އެ ލިޔުމުގައި ބުނެފައިވެ އެވެ.

އެ މައްސަލަތަކާ ހެދި އެ މެންބަރުން ޕާޓީން މިއަދުން ފެށިގެން އިސްތިއުފާ ދޭން ނިންމާފައިވާ ކަމަށާއި ހަމައެއާއެކު ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއީދު ކުރަން ނިންމާފައިވާ ކަމަށް ވެސް އެ ލިޔުމުގައި ބުނެފައިވެ އެވެ.