އުތުރުގެ ރަށެއްގައި ގްރޫޕަކުން ކުޑަ އަންހެން ކުއްޖަކަށް ޖިންސީ ގޯނާކުރި މައްސަލައެއް ފުލުހުން ތަހުގީގު ކުރަން ފަށައިފި އެވެ.
ޖިންސީގޯނާގެ ޝިކާރައަކަށްވީ އެނގިފައިވާ ގޮތުގައި 14 އަހަރުގެ ކުއްޖެކެވެ. ގްރޭޑް 8 ގައި ކިޔަވަމުން އަންނަ އެ ކުއްޖާއަށް އެކި ދުވަސްމަތިން ގިނަ އަދަދެއްގެ ފިރިހެނުން ޖިންސީ ގޯނާކޮށްފައިވާ ކަމަށް ވެ އެވެ.
ޖެންޑާ މިނިސްޓްރީގެ މީޑިއާ އޮފިޝަލަކު ވިދާޅުވީ ފުލުހުން ބަލަމުން އަންނަ މައްސަލާގައި ހިމެނޭ ކުއްޖާއަށް ރައްކާތެރިކަމާއި އެހީތެރިކަން ފޯރުކޮށްދީފައިވާ ކަމަށެވެ. މިކަން ފަޅާއެރުމާ އެކު އެ ކުއްޖާ ވަނީ މާލެ ގެނެސްފަ އެވެ.
"މިހާރު"އަށް އެނގިފައިވާ ގޮތުގައި އެ ކުއްޖާއަށް ޖިންސީ ގޯނާކުރި ކަމަށް ތުހުމަތުވާ މީހުންގެ އަދަދު 19 އަށް އަރަ އެވެ.
ޖެންޑާ މިނިސްޓްރީން މިދިޔަ މާޗް މަހު އާއްމުކުރި ހިސާބުތަކަށް ބަލާއިރު، ކުޑަކުދިންނަށް ޖިންސީ ގޯނާކުރުމުގެ 13 މައްސަލައެއް ރިޕޯޓްކޮށްފައިވެ އެވެ.