އެމްޑީޕީގެ ރައީސް މުހައްމަދު ނަޝީދު އެ ޕާޓީގެ ތެރެއިން އިއުލާންކުރެއްވި "ފިކުރެއްގެ ދިރުން" ހަރަކާތުގައި އުޅުއްވާ ރައްޔިތުންގެ މަޖިލީހުގެ ފަސް މެމްބަރަކަށް ފިޔަވަޅު އަޅައިދޭން ޕާލަމަންޓްރީ ގްރޫޕް (ޕީޖީ)ން އެދުމުން މިއަދު ފިޔަވަޅު އަޅާ ކޮމިޓީގެ ބައްދަލުވުމެއް ބާއްވައިފި އެވެ.
އެކަމަކު އެއްވެސް މެމްބަރަކާ މެދު މިއަދުގެ ބައްދަލުވުމުގައި ގޮތެއް ނުނިންމާކަން "މިހާރު"އަށް ވަނީ ކަށަވަރުވެފަ އެވެ.
ޕީޖީން ފިޔަވަޅު އަޅައިދޭން މިފަހަރު އެދުނީ ދެ މައްސަލައެއްގަ އެވެ. އެއީ ތަކުރާރުކޮށް ވިޕްލައިނާ ޚިލާފުވުމާއި ކެބިނެޓު ވަޒީރުންގެ އިތުބާރު ނެތް ކަމަށް އިދިކޮޅުން ކުރިއަށް ގެންދާ މައްސަލަތަކުގައި އެއްބާރުލުން ދީ ގަވާއިދާ ޚިލާފަށް އަމަލުކުރެއްވުމެވެ.
އިދިކޮޅު ޕާޓީތަކުން ކުރިއަށް ގެންދަން ބޭނުންވާ، ރައީސް އިބްރާހިމް މުހައްމަދު ސޯލިހާއި އެމަނިކުފާނުގެ ވަޒީރުންގެ އިތުބާރު ނެތް ކަމުގެ މައްސަލައާ ގުޅުވައި ޕީޖީން ފިޔަވަޅު އަޅައިދޭން އެދުނީ މެދު ހެންވޭރު ދާއިރާގެ މެމްބަރު އަލީ އާޒިމަށެވެ. އިތުބާރު ނެތް މައްސަލަތަކާއި ސަރުކާރާ ދެކޮޅަށް އިދިކޮޅުން ރާވާ މުޒާހަރާގެ ޕްރެސް ކޮންފަރެންސްތަކުގައި އެމްޑީޕީ މެމްބަރެއްގެ ގޮތުގައި މިހާތަނަށް ބައިވެރިވެވަޑައިގަތީ އޭނާ އެކަންޏެވެ.
މިއީ ޕާޓީގެ އަސާސީ ގަވައިދާ ޚިލާފު، ޕާލަމެންޓްރީ ގްރޫޕްގެ މަސްލަހަތު ގެއްލޭ އަމަލެއް ކަމަށް އެމްޑީޕީން ބުންޏެވެ.
ޕީޖީ ގްރޫޕުން ދެން ހުށަހެޅީ ތަކުރާރުކޮށް ވިޕްލައިނާ ޚިލާފުވި ހަތަރު މެމްބަރަކާ މެދު ފިޔަވަޅު އަޅައިދިނުމަށެވެ.
މީގެ ކުރިން މެދު ހެންވޭރު ދާއިރާގެ މެމްބަރު އަލީ އާޒިމް ފިޔަވައި ދެން ތިއްބެވި މެމްބަރުންނަށް ފިޔަވަޅު އަޅައިދޭން އެދި ފޮނުވި އެވެ. މަޖިލީހުގައި އެ މެމްބަރުން ތިއްބެވި ކޮމިޓީތަކުގެ މުގައްރިރު ކަމުން ވަކިކޮށްދޭން އެފަހަރު އެދިފައި ވިޔަސް ފިޔަވަޅު އަޅާ ކޮމިޓީއެއް ނުބާއްވަ އެވެ.
އެކަމަކު، މި މެމްބަރުންނާ މެދު އެކި ފަހަރު މަތިން އަޅަން ނިންމި ފިޔަވަޅުތައް ޕާލަމެންޓްރީ ގްރޫޕުން ހޯދަން ވެސް ފިޔަވަޅު އަޅާ ކޮމިޓީން މިއަދު ނިންމި އެވެ.
ފިޔަވަޅު އަޅައިދޭން އެދުނު މެމްބަރުން
އަލީ އާޒިމް (މެދު ހެންވޭރު ދާއިރާ)
ހަސަން ލަތީފް (ހެންވޭރު ހުޅަނގު ދާއިރާ)
އިލްޔާސް ލަބީބް (ހުޅުދޫ ދާއިރާ)
ޔާސިރު އަބްދުއްލަތީފް (ކުޅުދުއްފުށި އުތުރު)
އިމްތިޔާޒް ފަހުމީ (މާފަންނު އުތުރު ދާއިރާ)
ދެ ސިޓީއަކުން މި ފަސް މެމްބަރުންނަށް ފިޔަވަޅު އަޅައިދޭން ޕީޖީން ފޮނުވިއިރު، އެމްޑީޕީގެ އަސާސީ ގަވައިދާއި ޕާލަމަންޓްރީ ގްރޫޕްގެ ގަވައިދާ ޚިލާފުވާ މެމްބަރުންނާ މެދު ފިޔަވަޅު އަޅާނެ ކަަމަށް އެމްޑީޕީން ވަނީ ބުނެފަ އެވެ.
ފިކުރެއްގެ ދިރުމުގެ މެމްބަރުންތަކެއް ވިޕްލައިނާ ޚިލާފުވަމުންދާތީ، މީގެ ކުރިން ވަނީ ނަސޭހަތްދީ ސިޓީ ފޮނުވައިފަ އެވެ. އޭގެތެރޭގައި އެ ފެކްޝަނުގައި ސަރުކާރަށް ފާޑުވިދާޅުވާ 13 މެމްބަރުންގެ ތެރެއިން ގިނަ ބޭފުޅުންތަކެއް ހިމެނިވަޑައިގަންނަވަ އެވެ.
އެ ބޭފުޅުން ކުރިން ވިދާޅުވެފައި ވަނީ، ސަރުކާރަށް ފާޑުވިދާޅުވިޔަސް ފިޔަވަޅު އަޅަން އެމްޑީޕީއަށް ނުކުރޭނެ ކަމަށެވެ.
ވިޕާ ހިލާފުވުމުން އެމްޑީޕީން އަޅާ ފިޔަވަޅުތައް
- ފުރަތަމަ ނަސޭހަތް ދިނުން.
- ދެ ވަނަ ފަހަރަށް ނަސޭހަތްދީ، މާފަށް އެދެން އެންގުން.
- ތިން ވަނަ ފަހަރަށް ނަމަ ޕާޓީން ދޭ އިނާޔަތްތައް ކަނޑާލުން. އޭގެތެރޭގައި ދަތުރުތައް ފަދަ ކަންކަން ހިމެނޭ.
- ހަތަރު ވަނަ ފަހަރު ނަމަ ޕާޓީގެ މަގާމެއްގައި ހުރި މީހެއް ނަމަ ވަކިކުރުން. އަދި އިންތިހާބެއްގައި ކުރިމަތިލުން އަހަރަކަށް މަނާކުރުން.
- ފަސް ވަނަ ފަހަރު ނަމަ ޕާޓީން ވަކިކުރުން.
އެމްޑީޕީގެ އެތެރޭގައި އުފެދުނު ހިޔާލު ތަފާތުވުންތަކުގައި މީގެ ކުރިން ޕާލަމަންޓްރީ ގްރޫޕްގެ ގަވާއިދާ ޚިލާފުވެގެން ފިޔަވަޅު ނޭޅިޔަސް އިތުބާރު ނެތް ކަމުގެ މައްސަލަތަކުގައި ސޮއިކުރާ މެމްބަރުންގެ މައްސަލާގައި ހަރުކަށި ފިޔަވަޅު އަޅާނެ ކަން ޕީޖީ ގްރޫޕުން ވެސް އޮތީ ބުނެފަ އެވެ.
އެމްޑީޕީން ނެރުނު ނޫސް ބަޔާނެއްގައި ބުނެފައިވާ ގޮތުގައި، އިދިކޮޅު ފަރާތްތަކުން ސަރުކާރާ ދެކޮޅަށް ޗާގޮސް މައްސަލާގައި އިތުބާރު ނެތް ކަމުގެ މައްސަލަ ވައްދައި މުޒާހަރާކުރަން ނިންމީ، އަމިއްލަ ސިޔާސީ މަންފާއަށެވެ. އެ މައްސަލާގައި ސަރުކާރުން ދައުލަތުގެ އެންމެ މަތީ މަސްލަހަތު އިސްކޮށް ވަކާލާތުކޮށް ރާއްޖެއަށް ބޮޑު ބައި ހޯދާފައިވާ ކަމަށާއި އިދިކޮޅުން ޕާޓީތަކާ އެކު މަސައްކަތް ފެށީ ސަރުކާރާ ދެކޮޅަށް ކުރި މުޒާހަރާތަކާއި ހިންގި ހަރަކާތްތައް ފޭލްވުމުން ކަމަށެވެ.