ފިޔަވަޅު އަޅާ ކޮމިޓީން ނިންމީ އާޒިމް އެމްޑީޕީން ވަކިވެފައިވާ ކަމަށް

އެމްޑީޕީގެ ޕާލަމެންޓްރީ ގްރޫޕުން ހުށަހެޅި މައްސަލަ ބެލުމަށް ފަހު، ފިޔަވަޅު އަޅާ ކޮމިޓީން ނިންމީ މެދު ހެންވޭރު ދާއިރާގެ މެމްބަރު އަލީ އާޒިމް ޕާޓީން ވަކިވެފައިވާ ކަމަށް ކަން "މިހާރު"އަށް އެނގިއްޖެ އެވެ.

ކޮމިޓީން ނިންމީ މިކަން ތަންފީޒުކުރަން، ޕާޓީގެ ސެކްރެޓޭރިއަޓަށް އެންގުމަށެވެ.

"ހުށަހެޅި މައްސަލައަށް ބަލާއިރު ވަކިކުރާކަށް ނުޖެހޭ، އާޒިމް އަމަލުކުރެއްވި ގޮތުން އޭނާ ވަނީ މެމްބަރު ކަމުން ވަކިވެފައި، ކޮމިޓީން އަޅަން ޖެހޭ ފިޔަވަޅެއް ނެތް." އެމްޑީޕީގެ އިސް ބޭފުޅަކު ވިދާޅުވި އެވެ.

އާޒިމަށް ފިޔަވަޅެއް އަޅަން ނިންމިކަން އެމްޑީޕީން އަދި އޭނާއަށް ވެސް ނާންގަ އެވެ. ފިޔަވަޅު އަޅާ ކޮމިޓީގެ ނިންމުން އާއްމުކުރަން ހަމަޖައްސާފައި އޮތީ މާދަމާ އެވެ.

އާޒިމަށް ފިޔަވަޅު އަޅައިދޭން ޕާލަމަންޓްރީ ގްރޫޕުން އެދުނީ ޗާގޮސް މައްސަލާގައި ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތް ކަމަށް ހުށަހެޅި މައްސަލާގައި ސޮއި ކުރެއްވުމާއި ސަރުކާރާ ދެކޮޅަށް ރާވާ މުޒާހަރާތަކުގެ ޕްރެސް ކޮންފަރެންސްތަކުގައި ބައިވެރިވެވަޑައިގަތުމެވެ.

އާޒިމް އަމަލުކުރެއްވީ، އެމްޑީޕީގެ އަސާސީ ގަވާއިދުގެ 19 ވަނަ މާއްދާއާ ޚިލާފަށް ކަަމަށް ޕާލަމެންޓްރީ ގްރޫޕުން ދެކެ އެވެ. މި މާއްދާއާ ހަވާލާދީ ފޮނުވި މައްސަލައަށް ބަލާއިރު ކޮމިޓީން ނިންމީ އޭނާއަކީ މިހާރު ވެސް އެ ޕާޓީގެ މެމްބަރެއްގެ ގޮތުގައި ބެލެވެން ނެތް ކަމަށެވެ.

އަސާސީ ގަވައިދުގައި ބުނާ ގޮތުން އިދިކޮޅު ސިޔާސީ ހަރަކާތް ނުވަތަ އެހެން ޕާޓީއަކުން އެމްޑީޕީގެ ސަރުކާރާ ދެކޮޅަށް ރާވައި ހިންގާ ހަރަކާތްތަކުގައި ބައިވެރިވުމަކީ ނުކުރެއްވޭނެ ކަމެކެވެ. އެހެންވެ ކޮމިޓީން ނިންމީ އެކަން ތަންފީޒުކުރަން ޕާޓީގެ ސެކްރެޓޭރިއެޓަށް އެންގުމަށެވެ.

އެމްޑީޕީގެ ޕާލަމަންޓްރީ ގްރޫޕުން އެދުނީ އާޒިމްގެ އިތުރުން ހަތަރު މެމްބަރަކަށް ފިޔަވަޅު އަޅައިދިނުމަށެވެ.

ފިޔަވަޅު އަޅައިދޭން އެދުނު މެމްބަރުން

ހަސަން ލަތީފް (ހެންވޭރު ހުޅަނގު ދާއިރާ)

އިލްޔާސް ލަބީބް (ހުޅުދޫ ދާއިރާ)

ޔާސިރު އަބްދުއްލަތީފް (ކުޅުދުއްފުށި އުތުރު)

އިމްތިޔާޒް ފަހުމީ (މާފަންނު އުތުރު ދާއިރާ)

މި މެމްބަރުންނަށް ފިޔަވަޅު އަޅައިދޭން ޕާލަމަންޓްރީ ގްރޫޕުން އެދުނީ ތަކުރާރުކޮށް، ވިޕްލައިނާ ޚިލާފުވެފައިވާތީ އެވެ. އެކަމަކު މި ހަތަރު މެމްބަރުންގެ މައްސަލާގައި އަދި ގޮތެއް ނުނިންމަ އެވެ.

އެމްޑީޕީގެ އެތެރޭގައި އުފެދުނު ހިޔާލު ތަފާތުވުންތަކުގައި މީގެ ކުރިން ޕާލަމަންޓްރީ ގްރޫޕްގެ ގަވާއިދާ ޚިލާފުވެގެން ފިޔަވަޅު ނޭޅިޔަސް އިތުބާރު ނެތް ކަމުގެ މައްސަލަތަކުގައި ސޮއިކުރާ މެމްބަރުންގެ މައްސަލާގައި ހަރުކަށި ފިޔަވަޅު އަޅާނެ ކަން ޕީޖީ ގްރޫޕުން ވެސް އޮތީ ބުނެފަ އެވެ.