ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީންގެ ކެންޑިޑެސީ އިލެކްޝަންސް ކޮމިޝަން (އީސީ) އިން ބަލައިނުގެންފި ނަމަ ސުޕްރީމް ކޯޓަށް ގޮސްގެން އެ މަނިކުފާނަށް ކެންޑިޑެސީ ކަށަވަރު ވާނެ ކަމަށް ޕީޕީއެމް އިން މިއަދު ބުނެފި އެވެ.
ޔާމީންގެ ކެންޑިޑެސީ ފޯމް ބަލައިނުގަންނާނެ ކަމަށް އީސީގެ ރައީސް ފުއާދު ތައުފީގް ވިދާޅުވި ކަމަށް ބުނާ މީޑިއާ ރިޕޯޓަކާ ގުޅިގެން ޕީޕީއެމުން އީސީއަށް ދިޔަ ނަމަވެސް ފުއާދު "މިހާރު" އަށް ވިދާޅުވި ގޮތުގައި ޔާމީންގެ ކެންޑިޑެސީ ފޯމް ބަލައިގަންނާނެ އެވެ. އެއާ މެދު ގޮތެއް ނިންމާނީ ގާނޫނީ ގޮތުން ބަލަން ޖެހޭ ކަންކަން ބެލުމަށް ފަހުގައި ކަމަށް ފުއާދު ވިދާޅުވި އެވެ.
ޕީޕީއެމް/ޕީއެންސީން އިން އީސީގެ މެންބަރުންނާ މިއަދު ބައްދަލު ކުރުމަށް ފަހު ނޫސްވެރިންނާ ވާހަކަ ދައްކަވަމުން ޕްރޮގްރެސިވް ކޯލިޝަންގައި މިވަގުތު އެންމެ އިސްކޮށް ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވީ ޔާމީންގެ ކެންޑިޑެސީ ހުށަހެޅުމަށް އެއްވެސް ހުރަހެއް ނެތް ކަމަށެވެ. އަދުރޭ ވިދާޅުވީ އެ ފޯމްގެ ކަންކަން ގާނޫނާ އެއްގޮތަށް ކުރިޔަށް ގެންދަވާނެ ކަމަށް އީސީގެ މެންބަރުން ވެސް ވިދާޅުވި ކަމަށެވެ.
ނަމަވެސް ޔާމީންގެ ކެންޑިޑެސީ އީސީން ބަލައިނުގެންފި ހާލަތެއްގައި ސުޕްރީމް ކޯޓަށް ވަޑައިގަންނަވާނެ ކަމަށް އަދުރޭ ވިދާޅުވި އެވެ. އަދި މީގެ ކުރިން ވެސް އެފަދަ މައްސަލަތަކުގައި އެ ކޯޓުން ނިންމާފައިވާ ނިންމުންތަކަށް އެ ކޯޓުން ރިއާޔަތް ކުރައްވާނެ ކަމަށާއި އެހެންވެ ޔާމީނަށް ރިޔާސީ އިންތިހާބުގައި ވާދަކުރެއްވޭނެ ކަމުގެ ޔަގީންކަން އެބައޮތް ކަމަށް އަދުރޭ ވިދާޅުވި އެވެ.
"[ސުޕްރީމް ކޯޓަށް ހުށަހަޅައިފި ނަމަ] އަޅުގަނޑުމެންގެ ޔަގީން ކަން އެބައޮތް ރައީސް ޔާމީންގެ މައްސަލަ އަށް ވެސް. ކުރުކޮށް ދަންނަވަންޏާ އެ މަނިކުފާނުގެ ނަންފުޅު މި އަހަރުގެ ރިޔާސީ އިންތިހާބުގެ ވޯޓު ކަރުދާހުގައި އޮންނާނެ،" އަދުރޭ ވިދާޅުވި އެވެ.
ރައިސުލްޖުމްހޫރިއްޔާ ކަމަށް ކުރިމަތިލުމުގެ ޝަރުތުތަކުގެ ތެރޭގައި ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް ކުރެވިފައިވާ މީހަކު ނަމަ އެ ހުކުމް ތަންފީޒު ކޮށް ނިމުނުތާ ނުވަތަ ހުކުމް ކަނޑައެޅުނު އަދަބު މާފު ކުރެވުނުތާ ތިން އަހަރުވެފައިވުން ހިމެނެ އެވެ.
މީގެ އިތުރުން ޔާމީންގެ ވެރިކަމުގައި ޖަލުތަކާއި ޕެރޯލްގެ ގާނޫނަށް 2015 ވަނަ އަހަރު ގެނައި އިސްލާހެއްގައި ސިޔާސީ ޕާޓީ އާއި ޖަމިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލު ފަރާތެއްގެ ގޮތުގައި ހުރުމާއި އެ ތަންތަނުން ހިންގާ އެހެން ހަރަކާތްތަކުގައި ބައިވެރިވުމުގެ ހައްގު، ހުކުމެއް ތަންފީޒުކުރުމަށްޓަކައި ޖަލުގައި ބަންދުކުރެވިފައި ހުންނަ މުއްދަތުގައި ނޯންނާނެ ކަމަށް އޮވެ އެވެ. އެހެންވެ ޔާމީނަށް ރިޔާސީ ކެންޑިޑޭޓެއްގެ ހައިސިއްޔަތު ގާނޫނީ ގޮތުން އޮންނާނެ ކަމާ މެދު ވެސް އޮތީ ސުވާލު އުފެދިފަ އެވެ.