ޕީޕީއެމްގެ ސަރުކާރުގައި ކޯލިޝަނާ ދުރުނުވި އެއް ސަބަބަކީ ކޯލިޝަނުން ވަކިވާ ހިސާބުން އެމްޑީއޭގެ އިސްވެރިން ޖަލަށް ލާފާނެތީ ކަމަށް، އެމްޑީޕީއާ އެކު ކޯލިޝަން ހަދާފައިވާ އެމްޑީއޭގެ ނައިބު ރައީސް، އަލީ މައުރޫފް މިއަދު ވިދާޅުވެއްޖެ އެވެ.
ކ. ގުރައިދޫގައި މިއަދު ބޭއްވި ކެމްޕެއިން ހަރަކާތުގައި، ކެނދިކުޅުދޫ ދާއިރާގެ ކުރީގެ މެމްބަރު މައުރޫފު ވިދާޅުވީ، ކުރީ ސަރުކާރުގެ ކޯލިޝަނާ ގުޅުމުން ވަރަށް ހިތި ތަޖުރިބާތަކެއް ކުރަން ޖެހުނު ކަމަށެވެ. އޭނާ ވިދާޅުވީ، ކޯލިޝަނާ ދުރުނުވި އެއް ސަބަބަކީ ސަރުކާރެއް ވެއްޓުމުން ރައްޔިތުންނަށް ލިބިދާނެ ގެއްލުމަކަށް ވިސްނާފައި ކަމަށެވެ.
"އަނެއް ސަބަބަކީ އަޅުގަނޑުމެންގެ ޕާޓީގެ ވެރިން ހުރަގެއަށް ލާފާނެތީ. މި ދެ ސަބަބަށްޓަކައި އަޅުގަނޑުމެން ކޯލިޝަން ދެމެހެއްޓީ،" އޭނާ ވިދާޅުވި އެވެ.
މައުރޫފް ވިދާޅުވީ، މި ސަރުކާރާ ގުޅުނީ ސަރުކާރުން ކަންކަން ކުރާ ގޮތް ވަރަށް ރަނގަޅަށް ބެލުމަށް ފަހު ކަމަށެވެ. އޭނާ ވިދާޅުވީ، ރައީސް އިބްރާހިމް މުހައްމަދު ސޯލިހްގެ ސަރުކާރުގެ ކަންކަން ކުރަމުން ގެންދިޔައީ އިގްތިސާދު ބިނާކޮށް ސިޔާސީ މީހުން ޖަލަށް ނުލައި ކަމަށެވެ.
މައުރޫފް ވިދާޅުވީ، ކުރީ ސަރުކާރުން އެމްޑީއޭގެ ފިކުރާ ނުގުޅޭ ގިނަ ކަންތައްތަކެއް ކުރި ކަމަށެވެ. އޭނާ ވިދާޅުވީ، އދ. އާއި ޔޫރަޕިއަން ޔޫނިއަން ގުޅުން ކަނޑާލުމަކީ ބޭނުންވި ކަމެއް ނޫން ކަމަށެވެ.
މި އަހަރުގެ ރިޔާސީ އިންތިހާބަށް އެމްޑީޕީ އަދި އެ ޕާޓީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހާ އެކު ކުރިއަށް ދާން ނިންމިކަން އެމްޑީއޭ އިން އިއުލާން ކުރީ މިދިޔަ ފެބްރުއަރީ މަހު އެވެ. އެމްޑީޕީގެ ކެންޑިޑޭޓަށް ތާއީދުކުރި އިރު އަންނަ ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް އެމްޑީއޭއާ އެކު ކޯލިޝަން ހަދަން ބޭނުންވާތީ ޕީޕީއެމުން ވެސް މަޝްވަރާ ކޮށްފައިވެ އެވެ.