އަންނަ ސެޕްޓެމްބަރު މަހު ބާއްވާ އިންތިހާބު، ކުރީ އިންތިހާބަށް ވުރެ ގިނަ ވޯޓާއެކު އެއްބުރުން ކާމިޔާބު ކުރާނެ ކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސް އިބްރާހިމް މުހައްމަދު މިއަދު ވިދާޅުވެއްޖެ އެވެ.
އަންނަ މަހުގެ ނުވެއްގައި ބާއްވާ ރިޔާސީ އިންތިހާބުގެ ކެމްޕެއިނަށް ށ. އަތޮޅަށް ފަށާފައިވާ ދަތުރުފުޅުގައި، މި އަތޮޅު ނަރުދޫގައި ބޭއްވި ބައްދަލުވުމުގައި އެ މަނިކުފާނު ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި މި ރަށުގައި ގެންދިޔައީ ދެ މަޝްރޫއެއް ކަމަށެވެ.
އެހެންވެ، މި ފަސް އަހަރުގެ ތެރޭގައި ގިނަ މަޝްރޫއުތަކެއް ހިންގަން ޖެހުނު ކަމަށާއި ރާއްޖެ އަށް ބަދަލެއް ގެނެވޭނީ އެއްވެސް ރަށެއް ބާކީނުކޮށް، މުޅި ރާއްޖެ އަށް އިންގިލާބީ ބަދަލެއް ގެނެސްގެން ކަމަށް ވެސް ރައީސް ވިދާޅުވި އެވެ.
އެ މަނިކުފާނު ވިދާޅުވީ ކުރިއަށް އޮތް 3-4 އަހަރުގެ ތެރޭގައި މުޅި ރާއްޖެއިން އެ ބަދަލު ފެންނާނެ ކަމަށެވެ.
މިހާރު ވެސް 52 ރަށެއްގެ ބަނދަރު ނިންމައި، އިތުރު 42 ރަށެއްގައި ލަފާ ފުރުމުގެ މައްސަލަ ހައްލުކުރުމުގެ މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ. އެއާއެކު، ޖުމްލަ، 125 ރަށެއްގައި ލަފާފުރުމުގެ ދަތިކަމަށް ހައްލެއް ގެނެވިގެންދާނެ ކަމަށް އެ މަނިކުފާނު ފާހަގަކުރެއްވި އެވެ.
"ދަންނަވަން މި އުޅޭ ވާހަކައަކީ ކުރިއަށް މި އޮތް ރިޔާސީ އިންތިހާބުގެ ވޯޓަކީ މި ފެށިފައިވާ މަސައްކަތައިގެން ކުރިއަށްދާނީތޯ ނޫނީ އަނެއްކާ ވެސް އެނބުރި އަޅުގަނޑުމެން އެ ދުވަހު، 2014-2018 ގެ ތާރީހުގެ ތެރެއަށް އަޅުގަނޑުމެން އެނބުރި ދާނީތޯ. އަޅުގަނޑުމެންގެ ވާދަވެރިންގެ ގޮތުގައި އަދިވެސް ނުކުންނަން އޮތީ ޕީޕީއެމް. އެއީ ހަގީގަތް."
"ވިސްނުންތެރިކަމާއެކު މިކަން ނުކޮށްފިނަމަ އަޅުގަނޑުމެން އެނބުރި އަނެއްކާ ވެސް އެނބުރި ދާން ޖެހޭނީ އެ އަނިޔާވެރިކަމާއި އެ ބިރުވެރިކަމުގެ ތެރެއަށް."
އެ މަނިކުފާނު ވިދާޅުވީ 278،000 މީހުންނަށް ވޯޓު ދިނުމުގެ ހައްގު ލިބިގެންވާއިރު، އާއްމުކޮށް އިންތިހާބުގައި 90 ޕަސެންޓް މީހުން ވޯޓުލާ ކަމަށެވެ. އެންމެ ފަހުން ބޭއްވި އިންތިހާބުގައި ވެސް ކޯލިޝަނަށް 135،000 އަށްވުރެ ގިނަ ވޯޓު ލިބުނުކަން ފާހަގަކުރައްވައި ރައީސް ވިދާޅުވީ މި ފަހަރުގެ ޓާގެޓަކީ އެއަށްވުރެ ގިނަ ވޯޓު ހޯދުން ކަމަށެވެ.
"އިރާދަކުރެއްވިއްޔާ އަޅުގަނޑުމެން މި އޮތް ބޮޑު ކޯލިޝަނާއެކު ނުކުމެ، މި އިންތިހާބު އެއްބުރުން އަޅުގަނޑުމެން ކާމިޔާބުކުރާނަން."
