ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ރަނިން މޭޓަކަށް އެ ޕާޓީގެ ޑެޕިއުޓީ ލީޑަރު ޑރ. އަމީން އިބްރާހިމް ހަމަޖައްސައިފި އެވެ.
ކުރީގެ ޓްރާންސްޕޯޓް މިނިސްޓަރު އަމީންއަކީ ގާސިމްގެ ކެމްޕޭންގައި ވެސް އެންމެ އިސްކޮށް އުޅުއްވާ އެއް ބޭފުޅާ އެވެ. އޭނާ އެ މަގާމަށް ހަމަޖެއްސިކަން އިއުލާންކުރަން މިއަދު ދޭއްޖަހާއިރު ޖުމްހޫރީ ޕާޓީގައި ޕްރެސް ކޮންފަރެންސެއް ބާއްވަން ވަނީ ނިންމައިފަ އެވެ.
މި ސަރުކާރު އުފެއްދިއިރު ސިޔާސީ ގޮތުން އިސްކޮށް ޖޭޕީގައި އުޅުއްވި އަމީނަށް އޭރުގެ ސަރުކާރުން ކުރިމަތިވި ކަންކަމާ ގުޅިގެން އަމިއްލައަށް އަރުވާލެއްވިގެން ރާއްޖެއިން ބޭރުގައި ހުންނެވުމަށް މަޖުބޫރުވެވަޑައިގަތެވެ. އެ ދުވަސްވަރު، އިނގިރޭސިވިލާތަށް ވަޑައިގަތުމަށް ފަހު ބިޒްނަސް އެޑްމިނިސްޓްރޭޝަންގެ ދާއިރާއިން ވަނީ ޕީއެޗްޑީ ހާސިލްކުރައްވައިފަ އެވެ.
އަމީން އިބްރާހިމަކީ ދިވެހި އަދަބިއްޔާތަށް ޚިދުމަތް ކުރެއްވުމުގެ ދާއިރާއިން 2007 ވަނަ އަހަރު އާއްމު ހިދުމަތުގެ އިނާމު ވެސް ލިބިވަޑައިގެން ހުންނެވި ބޭފުޅެކެވެ.
ރައީސް އިބްރާހިމް މުހައްމަދު ސޯލިހްގެ މި ސަރުކާރު ހިންގާ ކޯލިޝަންގައި ދެމިއޮތް ޖުމްހޫރީ ޕާޓީގެ ނިންމުމަކީ ދެ ވަނަ ދައުރަކަށް ކޯލިޝަންގައި ދެމިނުތިބެ އިންތިހާބުގައި ވަކިން ވާދަކުރުމެވެ. އެ ނިންމުމާ އެކު ޖޭޕީ އިސްވެ އޮވެ އުފައްދާ ކޯލިޝަނަކުން އިންތިހާބު ކާމިޔާބުކުރަން އެމްޑީޕީ ފިޔަވައި ގިނަ ޕާޓީތަކާ އެކު ވަނީ މަޝްވަރާތައް ބާއްވައިފަ އެވެ.
އެއް ކެންޑިޑޭޓަކު ނެރެގެން އެމްޑީޕީ ބަލިކުރަން ވެސް ޖޭޕީން އިސް ނެގި އެވެ. އެކަމުގައި މޯލްޑިވްސް ނެޝަނަލް ޕާޓީ އާއި ޑިމޮކްރެޓްސްއާ އެކު މަޝްވަރާ ބައްދަލުވުމެއް ބޭއްވި އެވެ. އެކަމަކު ވަކި ގޮތެއް ނުނިމި ޕާޓީތައް ރިޔާސީ އިންތިހާބުގައި ވާދަކުރީ ވަކިވަކިންނެވެ.
ޖޭޕީއާ އެކު ކޯލިޝަންގެ ދައުވަތު ޕީޕީއެމަށް ވެސް ދިނެވެ. އެކަމަކު ރާއްޖޭގެ އެންމެ ބޮޑު އިދިކޮޅު ޕާޓީ ޕީޕީއެމުން ނިންމީ އެއްވެސް ބައެއްގެ ފަހަތަށް އެ ޕާޓީން ނޭރުމަށެވެ. އެކަމަކު އެ ޕާޓީން ނެރޭ ކެންޑިޑޭޓެއްގެ ފަހަތަށް އަރައި ކޯލިޝަން ހެދުމުގެ ފުރުސަތު އޮތް ކަމަށް ޕީޕީއެމުން ބުނެފައިވެ އެވެ.