ފަޅުވެދާނެއޭ ހީވި ހެނބަދުއަށް އާ ދިރުމެއް، އުފާވެރިކަން

"މި ސަރުކާރު އައިއިރު ތިބީ މި ފަސްގަނޑުން ފައިބައިގެން ދާން ޖެހިދާނެ ކަމުގެ ބިރު ހީވެފައި. ރަށް ފަޅުވެދާނެ ކަމުގެ ބިރު ހީވެފައި. އެކަމަކު އެއީ އަޅުގަނޑުމެން އެދޭ ގޮތެއް ނޫން. މިއަދު އެ މަންޒަރު ބަދަލުވެއްޖެ،" މި ރަށަށް އުފަން އަހުމަދު ޝިޔާމް ބުންޏެވެ.

ނ. އަތޮޅުގައި އޮތް ގާމަތީ ރަށް, ހެނބަދުއަކީ ވަރަށް ބޮޑަށް އެއް ފަރާތްވެފައި އޮތް ރަށެެކެވެ. މާ ބޮޑު ތަރައްގީގެ މަޝްރޫއުތަކެއް ނެތްއިރު ޗަމްޕާ ކުންފުނިން އަޅައިދިން ނަރުދަމާގެ ނޫނީ އަސާސީ ހިދުމަތެއް ނެތެވެ. ބަނދަރެއް، ފެނުގެ ނިޒާމެއް، ރަނގަޅު ގޮތުގައި ކަރަންޓެއް ނުލިބެ އެވެ.

އެކަމަކު، ލަފާފުރުމުގައި އެތައް ދަތިތަކާ އެކު އުޅެމުންދިޔަ ހެނބަދުއަށް މިއަދު އެރީ ރަނގަޅު ފެންވަރަކަށް ހަދާފައިވާ ބަނދަރަކުންނެވެ. ރަށަށް ފެނުގެ ނިޒާމް ގުޅައި، ކޮންމެ ގެއަކަށް ފިލްޓާ ބެހުމުގެ މަސައްކަތް ކައުންސިލުން އަންނަނީ ކުރަމުންނެވެ. ދެ ދަންފަޅި އަށް ބަހައިގެން ކިޔަވައިދެމުން ދިޔަ ސްކޫލްގައި މިހާރު ވަނީ ހަތަރު ބުރިއަށް ނަގާފައިވާ އާ އިމާރާތެއް ބިނާކޮށްފަ އެވެ. ގިރާ ސަރަހައްދު ހިމާޔަތްކޮށް އިންޖީނުގެ ވަނީ ރަށުގެ އެއް ފަރާތަށް ބަދަލުކޮށްފަ އެވެ.

ފުޓްސަލް ދަނޑާއި އޭޓީއެމް އާއި އައުޓްޑޯ ޖިމްގެ މަސައްކަތް ދަނީ ކުރިއަށެވެ. ހެނބަދޫގައި ޖުމްލަ 11 މަޝްރޫއެއް ހިންގާފައިވާއިރު މި އަހަރުގެ ބަޖެޓްގައި ރަށަށް ހަ މިލިއަން ރުފިޔާ ހިމަނާފައިވެ އެވެ.

އެހެން ސިޔާސީ ކުލައެއް ފެންނަން ނެތް މި ރަށަށް އިއްޔެ އެންމެ މެންދުރު ގަޑީގައި ރައީސް އިބްރާހިމް މުހަންމަދު ސޯލިހު ވަޑައިގެންނެވިއިރު، އެ ރަށުގެ ކުދި ބޮޑު އެތައް ބަޔަކު ރައީސާ ސަލާމް ކުރަން ބަނދަރު މައްޗަށް ޖަމާވެ ތިއްބެވެ. ރައީސް މި ރަށަށް ވަޑައިގެންނެވި މިއީ ތިން ވަނަ ފަހަރު ކަމަށްވާއިރު، އެހެން ރައީސަކު މިވަރަށް މި ރަށަށް ވަޑައިގެންފައެއް ވެސް ނުވެ އެވެ.

ރަށުގެ ރައްޔިތުންނާ ބައްދަލުކުރައްވައި ރައީސް ދެއްކެވި ވާހަކަފުޅުގައި އެމަނިކުފާނު ވިދާޅުވި ގޮތުގައި، ރިޔާސީ ކެމްޕެއިންގައި އެންމެ ފުރަތަަމަ މި ރަށަށް ވަޑައިގެންނެވިއިރު، މިއީ މީހުން އުޅޭ ރަށެއްކަން ސަރުކާރުތަކަށް އެނގޭބާވައޭ ހިތްޕުޅަށް އެރި ކަމަށެވެ.

"އަސާސީ އެއްވެސް ހިދުމަތެއް އޭރު މި ރަށަކު ނެތް، ލަފާފުރުން އެހާ ދަތި ރަށެއް، ނަރުދަމާއެއް ނެތް، ފެނެއް ނެތް، ކަރަންޓެއް ނެތް، މި ހުރިހާ ކަމެއް ކޮށްދޭނެ ކަމުގެ ވައުދާ އެކު އަޅުގަނޑުމެން އައީ. އެންމެ އަސާސީ ކަންކަން މި ދައުރު ނިންމާފައި މި އޮތީ،" ރައީސް ވިދާޅުވި އެވެ.

އެކަމަކު އެ ދުވަހު މި ރަށުގެ ބޮޑު ބަޔަކަށް އެ ވާހަކަ ގަބޫލު ނުކުރެވުންކަން ރައީސް ފާހަގަކުރެއްވީ 2018 ގެ އިންތިހާބުގައި އެމަނިކުފާނަށް ހެނބަދޫން 48 ޕަސެންޓް ވޯޓު ލިބުމުންނެވެ. ރައީސް މިހާރު ޖައްސަވާ ހިސާބު ވަރަށް މައްޗަށެވެ.

"ހެނބަދޫ މިއޮތީ ބަދަލުވެފައި. މި ފަހަރު 70 އިން މައްޗަށް ތާއިދު އަޅުގަނޑަށް މި ރަށުން ލިބޭނެ. ޓެސްޓް ކުރެވި ވައުދުވެ ވައުދު ފުއްދާ ސަރުކާރެއް މިއީ. އެއީ އަޅުގަނޑުމެން." ރައީސް ވިދާޅުވި އެވެ.

ރައީސް ވިދާޅުވާ ގޮތުގައި، އެންމެ އަސާސީ ހިދުމަތްތައް ލިބުމަކީ ކޮންމެ ދިވެއްސަކަށް ވީތީ ލިބެންޖެހޭނެ ހިދުމަތްތަކެވެ. ވަކި ރަށެއް، ވަކި ސިޔާސީ ފިކުރެއް އެއީ ކަންކަން ކުރުމުގައި ބަލާނެ ކަމެއް ނޫން ކަމަށެވެ. ކުޑަ ރަށެއް ބޮޑު ރަށެއް، އާބާދީ ގިނަ ރަށެއް ބޮޑު ރަށެއް އެއީ އަސާސީ ހިދުމަތް ދިނުމުގައި ބަލާނެ ކަމެއް ވެސް ނޫން ކަމަށެވެ.

- ބިން ހިއްކައި ބޯހިޔާވަހިކަން ހައްލުކުރުން.

- ހުކުރު މިސްކިތެއް ބިނާކުރުން

- މަގުތައް ތާރު އަޅާ ތަރައްގީކުރުން

- ކައުންސިލް އިދާރާ އާއި ކޯޓު ހިމެނޭ އޮފީސް ކޮމްޕްލެކްސް އިމާރާތެއް.

- ސިއްހީ މަރުކަޒު 24 ގަޑިއިރަށް

- ފުޓްބޯޅަ ދަނޑެއް

ކުރިއަށް ހުރި މަޝްރޫއުތަކަށް ބަލާއިރު ވެސް، މި ސަރުކާރަށް ނޫން އެހެން ބަޔަކަށް ހެނބަދޫން ވޯޓު ދޭން ޖެހޭ ސަބަބެއް ނެތް ކަމަށް ކައުންސިލްގެ ރައީސް ހުސެއިން އަބޫބަކުރު ވިދާޅުވި އެވެ. އޭނާ ގަބޫލު ކުރައްވާ ގޮތުގައި ރަށަށް އެންމެ ބޭނުންވާ ބިން ހިއްކުމުގެ މަޝްރޫއު ވެސް އެހެން ސަރުކާރެއް އައިސްފިނަަމަ، ހުއްޓާލާނެ ކަމުގެ ބިރު އެބަ އޮތެވެ.

އޭނާ އެހެން ވިދާޅުވަނީ މާޒީގައި ކަން ހިނގާފައިވާ ގޮތުންނެވެ.

"އެހެންވެ މި ދަންނަވަނީ ރައީސް އިބްރާހިމް މުހައްމަދު ސޯލިހު ފިޔަވައި އެހެން ބޭފުޅަކަށް ވޯޓު ލާންވީ ސަބަބެއް ހެނބަދޫ ރައްޔިތުންނަށް ނެތް،" ކައުންސިލްގެ ރައީސް ވިދާޅުވި އެވެ.

ބަނދަރުމަތީ ރައީސަށް މަރުހަބާ ދަންނަވަން ނުކުމެ ހުރި 56 އަހަރުގެ އިސްމާއިލް އަބްދުﷲ އަށް ވެސް ވެރިކަންތަކެއް ތަޖުރިބާ ކުރެވިއްޖެ އެވެ. އެކަމަކު، އޭނާ ބުނާ ގޮތުން ހެނބަދުއަށް ހެވެއް އެދެނު ވެރިއެއް ރައީސް ނޫނީ ނެތެވެ.

"އަޅުގަނޑަށް ފަސް ވެރިކަން ފެނިއްޖެ، މިފަދަ ހިދުމަތެއް އަޅުގަނޑުމެންނަށް ދިން ވެރިއަކު ނެތް އިބްރާހިމް މުހައްމަދު ސޯލިހު ނޫނިއްޔާ. އެހެންވެ ތާއިދު ކުރަނީ. އެހެންވެ މި ތަނުގައި މި ހުރީ،" ރީނދޫ ޓީޝާޓެއް ލައިގެން ބަނދަރު މަތީ ރައީސްގެ އިސްތިގުބާލުގައި ހުރެ، އިސްމާއިލް ބުންޏެވެ.

ކުރިން ވާހަކަ ދެއްކި އަހުމަދު ޝިޔާމް ބުނީ ހެނބަދޫއަށް ރައީސަަށް ތަފާތު ބޮޑު ނަތީޖާއެއް ނެރެދޭނެ ކަމަށެވެ. އެކަން ކުރަނީ އޭނާ ބުނި ގޮތުގައި، ދިރިއުޅެން އެންމެ ފަހި ކަމަށް އެމީހުން ގަބޫލުކުރާ ހެނބަދޫ ފަޅުވެ ދިޔަ ނުދިނުމަށްޓަކަ އެވެ. ތަރައްގީގެ ސަފުގައި ހެނބަދޫ ވެސް ހިމަނާފައި ބޭއްވުމަށްޓަކަ އެވެ.