ގަވައިދާ ހިލާފަށް ޕާކުކޮށްގެން ކޮށްފައިވާ ހުރިހާ ޕާކިން ޖޫރިމަނާތަކެއް މާފުކޮށްދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
އަންނަ މަހުގެ 9 ވަނަ ދުވަހު އޮންނަ ރިޔާސީ އިންތިހާބުގެ ކެމްޕެއިނަށް ށ. އަތޮޅަށް ކުރައްވަމުންގެންދަވާ ދަތުރުފުޅުގައި ފުނަދޫގައި ބޭއްވި ރެލީގައި ވާހަކަ ދައްކަވަމުން މުއިއްޒު ވިދާޅުވީ މި ސަރުކާރުން ވެރިކަމަށް އައީ ޕާކުކުރާނެ ތަނެއް ނުދައްކާ ޖޫރިމަނާ ނުކުރާނެ ކަމަށް ވައުދުވެގެން ކަމަށެވެ.
ނަމަވެސް، ފެނިގެންދަނީ ޕާކިން ސްޓިކާ ޖޫރިމަނާ އަކީ އާމްދަނީ ހޯދާ ވަސީލަތަކަށް މި ސަރުކާރުން ހަދާފައިވާ ތަން ކަމަށް މުއިއްޒު ވިދާޅުވި އެވެ.
"ސްޓިކާ ޖަހާ ޖަހާ ގޮސް އެބަ އޮތް އެތައް ހާސް ރުފިޔާއެއް އަރާފައި، ޖޫރިމަނާވެފައި. އެއީ އެއްވެސް އިންސާފެއް ނޫން. އެކަމަށް ހައްލެއް ލިބެން އޮއްވާ ނުގެނެސް ޖޫރިމަނާ ކުރަނީ. މި ސަރުކާރަށް އާމްދަނީ ލިބޭ އެންމެ ބޮޑު އެއް ކަމަކީ އެއީ ޖޫރިމަނާ ފައިސާ،" މުއިއްޒު ވިދާޅުވި އެވެ.
މުއިއްޒު ވިދާޅުވީ އޭނާ އަށް ވެރިކަން ލިބިއްޖެ ނަމަ އަދުލުވެރި އިންސާފުވެރި ވެރިކަމެއް ކުރާނެ ކަމަށާއި މި ސަރުކާރުގައި ކޮށްފައިވާ ޕާކިން ޖޫރިމަނާތަކަކީ އެއްވެސް އިންސާފެއް ނޫން ކަމަށެވެ.
"ޕާކިން ޖޫރިމަނާ އެއްކޮށް އިރާދަކުރެއްވިއްޔާ ހުރިހާ ރައްޔިތުންނަށް މާފުކޮށްދޭނަން،" މުއިއްޒު ވިދާޅުވި އެވެ.
މުއިއްޒު ވިދާޅުވީ މާލެ އާއި ހުޅުމާލޭގައި ޕާކިން ބިލްޑިންތައް ހަދަން ސިޓީ ކައުންސިލުން ރޭވި ނަމަވެސް ސަރުކާރުން އެކަން ހުއްޓުވާފައިވާ ކަމަށެވެ. އަދި ވެރިކަމަށް އައިސް ޕާކިން ބިލްޑިންތައް ގާއިމްކޮށް، ޕާކިން މައްސަލަ އެއްކޮށް ހައްލުކޮށް، ގަރާޖު ސިޓީއަށް ސަލާން ޖެހުން ހުއްޓުވާނެ ކަމަށް މުއިއްޒު ވިދާޅުވި އެވެ.