ސިޔާސީ ގޮތުން ހިޔާލު ތަފާތުވާ މީހުންނަށް ވެސް އިހްތިރާމު ކުރަން ޖެހޭނެ ކަމަށާއި ވާދަވެރިންނަށް ރައްދު ދިނުމުގެ ގޮތުން ދަށު ދަރަޖަ އަށް ނުވެއްޓެން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިރޭ އިލްތިމާސް ކުރައްވައިފި އެވެ.
ށ. ފުނަދޫގައި ބޭއްވި ކެމްޕެއިން ޖަލްސާގައި އޭނާ ވިދާޅުވީ ސިޔާސީ ކަންކަމުގައި އުޅޭއިރު ހިތްހަމަނުޖެހޭ ކަންކަން ދިމާވާނެ ކަމަށާއި އެފަދަ ކަމެއް ދިމާވިޔަސް، ދަށު ދަރަޖަ އަށް ވެއްޓި ރައްދު ދީގެން ނުވާނެ ކަމަށެވެ.
"އަޅުގަނޑުމެން ވާން ވާނީ ދަށު ދަރަޖައަކަށް، އެ މީހުން އެ ވެއްޓޭ ދަރަޖަ އަށް ނުވެއްޓި ތިބޭ ބަޔަކަށް. ވާން ޖެހޭނެ އަމަލާއި ބަހުން ރީތި މިސާލު ދައްކާ ބަޔަކަށް. ސިޔާސީ ވާދަވެރިޔާ އަށް ރައްދު ދިނުމުގެ ގޮތުން އެ ފަރާތުން ވެއްޓުނު ދަރަޖަ އަށް ވެއްޓިގެން ނުވާނެ،" މުއިއްޒު ވިދާޅުވި އެވެ.
އޭނާ އެހެން ވިދާޅުވިއިރު، ރައީސް އިބްރާހިމް މުހައްމަދު ސޯލިހުގެ އަނބިކަނބަލުން ފަޒްނާ އަހުމަދު މިއަދު ހަވީރު ހިޔާ ފްލެޓް ސަރަހައްދަށް ކެމްޕެއިނަށް ވަޑައިގަތުމުން، އެކަމަނާއާ ދެކޮޅަށް އިދިކޮޅު ބަޔަކު ހުތުރު ބަހުން ގޮވައި، ފުރައްސާރަ ކުރި މައްސަލަ ވަނީ ހޫނުވެފަ އެވެ.
ފަޒްނާ މިރޭ ވިދާޅުވީ، އޭނާގެ އަރިހުގައި އެ ވަގުތު ހުންނެވި ހުޅުމާލެ ދާއިރާގެ މެމްބަރު އަލީ ނިޔާޒް، މުއިއްޒަށް ގުޅުއްވައި މެސެޖު ކުރެއްވި ނަމަވެސް މިހާތަނަށް ޖަވާބު ނުދެއްވާ ކަމަށެވެ.
ސިޔާސީ ވާދަވެރިޔާ އަށް ރައްދު ދިނުމުގެ ގޮތުން އެ ފަރާތުން ވެއްޓުނު ދަރަޖަ އަށް ވެއްޓިގެން ނުވާނެ،"--- މުއިއްޒު
ފުނަދޫގައި ވާހަކަ ދައްކަވަމުން މުއިއްޒު ވިދާޅުވީ، ދިވެހިންގެ ތެރޭގައި އޮތް އެކަކު އަނެއްކަކަށް އިހްތިރާމް ކުރުމުގެ އާދަ މިހާރު ނެތިގެން ގޮސްފައިވާ ކަމަށާއި އެއީ އަނބުރާ ގެންނަން ޖެހޭ އާދައެއް ކަމަށެވެ. އެހެން ނޫނީ މުޖުތަމައަށް ހަމަނޭވާއެއް ނުލެވޭނެ ކަމަށް ވިދާޅުވި އެވެ.
އޭނާގެ ސަރުކާރެއްގައި އެ ކަމަށް ހާއްސަ ސަމާލުކަމެއް ދީގެން ތައުލީމީ ނިޒާމުގެ ތެރެއިން ކުދިންނަށް އެ އާދަތައް ދަސްކޮށްދެއްވާނެ ކަމަށް މުއިއްޒު ވިދާޅުވި އެވެ. ގައުމިއްޔަތާއި އަހުލާގު ވަކި މާއްދާއެއްގެ ގޮތުގައި ކިޔަވައިދޭނެ ކަމަށް ވިދާޅުވި އެވެ.
"އަޅުގަނޑުމެން ވާން ވާނީ ރީތި ހަމަތަކުގެ މަތިން އުޅޭ ބަޔަކަށް. މިކަންކަން އަނބުރާ ގެންނަން އެބަޖެހޭ. ބޭނުން ވަނީ އަނބުރާ ގެންނަން. އެކަންކަން ނުކޮށް މުޖުތަމައުގެ ބޭނުމެއް ނެތް. ތައުލީމީ ނިޒާމުގެ ތެރެއިން އެ އާދަތައް އަނބުރާ ގެނެސްދޭން ހާއްސަ ސަމާލުކަމެއް ދޭނަން،" މާލޭގެ މޭޔަރުކަން ވެސް ކުރައްވާ މުއިއްޒު ވިދާޅުވި އެވެ.