އައްޑޫގެ ވަކިން އޮންނަ ދެ ރަށް ކަމަށް ހުޅުދޫ އަދި މީދޫ އަށް ލާމަރުކަޒީ ނިޒާމުގެ ތެރެއިން އިތުރު ބާރުތަކާއި ފުރުސަތުތައް ހޯދައިދެއްވައި، މާ އުފާވެރި ދުވަސްތަކެއް ގެނެސް ދެއްވާނެ ކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މީދު އަށް ވަޑައިގެން މި ރަށުގެ ކެމްޕެއިން ޓީމުތަކާ ބައްދަލު ކުރައްވައި ރައީސް ވިދާޅުވީ މި ސަރުކާރުގެ ސިޔާސަތަކީ ލާމަރުކަޒީ ނިޒާމްގެ ތެރެއިން ބާރުތައް ވީ އެންމެ ބޮޑަކަށް ރަށްތަކަށް ދޫކޮށްލުން ކަމަށެވެ. ރަށު ކައުންސިލްތަކާއި ސިޓީ ކައުންސިލްތަކަށް ބޮޑެތި ބާރުތައް މިހާރު ވެސް ދޫކޮށްލާފައިވާކަން ރައީސް ފާހަގަކުރެއްވި އެވެ.
ހަމަ އެގޮތަށް ސިޓީ ކައުންސިލުން ވެސް ބައެއް މަރުކަޒީ ބާރުތައް ރަށްތަކަށް ދޫކޮށްކަން ޖެހޭ ކަމަށް ރައީސް ވިދާޅުވި އެވެ. އިދާރީ ކަންކަމާއި ސިއްހީ އަދި ތައުލީމީ ހިދުމަތްތައް ރަށްރަށް ދޫކޮށްލަން ޖެހޭ ކަމަށް ވިދާޅުވި އެވެ. ރައީސް ވިދާޅުވީ މީދު އާއި ހުޅުދުއަކީ ވަކިން އޮންނަ ދެ ރަށް ކަމަށް ވާއިރު އިދާރީ ހިދުމަތްތައް ދެ ރަށުން ލިބެންޖެހޭނެ ކަމަށާއި އެކަން ސިޓީ ކައުންސިލުން ދޫކޮށްލަން ޖެހޭ ކަމަށެވެ.
ގިނަ ރަށްތައް އެކުވެގެން އުފައްދާފައިވާ ސިޓީތަކުން މިކަން ކުރުމަށް ގާނޫނަށް ގެންނަން ޖެހޭ ބަދަލުތައް ގެންނަވާނެ ކަަމަށް ރައީސް ވިދާޅުވި އެވެ. ވިދާޅުވީ ލާމަރުކަޒީ ނިޒާމް އިތުރަށް ފުރިހަމަކޮށް މީދު އާއި ހުޅުދު އަށް މާ އުފާވެރި، މާ ފައްކާ ދުވަސްތަކެއް ގެނެސްދެއްވާނެ ކަމަށެވެ.
ރައީސް ވަނީ މީދޫން އެ އެ މަނިކުފާނަށް ދޭ ތާއިދަށް ވަރަށް ބޮޑަށް ޝުކުރު އަދާކުރައްވާފަ އެވެ. މީދުއަކީ އެންމެ ރަނގަޅު ނަތީޖާއެއް އަބަދުވެސް ނެރެދޭ، ރަށް ކަން ފާހަގަކުރައްވަމުން ރައީސް އެދިވަޑައިގަތީ ހޮނިހިރު ދުވަހު ބާއްވާ އިންތިހާބުގައި ވެސް އެކަން ތަކުރާރު ކުރެއްވުމަށެވެ.
އިންތިހާބަށް ދެ ދުވަހަށް ވެފައިވާއިރު ކެމްޕެއިން ބާރަށް ކުރިއަށް ގެންގޮސް، މީދޫ ހިމެނޭ ގޮތުން މުޅި އައްޑޫ އިން ބޮޑު ތާއިދެއް ހޯދައިދެއްވުމަށް ކެމްޕެއިން ޓީމުތަކުން މަސައްކަތް ކުރުމަށް ވެސް ރައީސް އެދިވަޑައިގެންނެވި އެވެ. ވިދާޅުވީ، އައްޑޫ އޮތް ގޮތް ވަރަށް ސާފުކޮށް ފެންނަ ކަމަށާއި އިންތިހާބާ މެދު އެއްވެސް ޝައްކެއް ނެތް ކަމަށެވެ.
މިރޭ ހިތަދޫގައި ބޮޑު ޖަލްސާއެއް ބޭއްވުމަށް އަންނަނީ ތައްޔާރުވަމުންނެވެ. މި ޖަލްސާގައި އައްޑޫގެ ތަސައްވުރާ ގުޅޭ ގޮތުން ރައީސް ވާހަކަ ދައްކަވާނެ ކަމަށް ވިދާޅުވި އެވެ.
