އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހްގެ މައްޗަށް ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ކުރި ހޯއްދެވުމަކީ އުއްމީދުކުރި ނަތީޖާއެއް ނޫން ކަމަށާއި އޭގެ ފަހަތުގައި ވަރަށް ގިނަ ބަޔަކު ވޯޓުލާން ނުނިކުތުމުން އެމްޑީޕީއަށް ވޯޓުތަކެއް ގެއްލުނު ކަމަށް އެމްޑީޕީގެ ޗެއާޕާސަން، އިކޮނޮމިކް މިނިސްޓަރު ފައްޔާޒް އިސްމާއިލް މިރޭ ވިދާޅުވެއްޖެ އެވެ.
ރިޔާސީ އިންތިހާބުގެ ނަތީޖާ އިން ދައްކާ ގޮތުގައި ދެވަނަ ދައުރަކަށް ވާދަކުރެއްވި ރައީސް އިބްރާހިމް މުހައްމަދު ސޯލިހްގެ މައްޗަށް މުއިއްޒު ކުރި ހޯއްދެވީ މުއިއްޒެވެ.
ވޯޓާސް ނުނުކުތީ ކީއްވެތޯ ބަލަން ޖެހޭނީ. ސަރުކާރާ އިދިކޮޅުވެގެން ނަމަ ސަރުކާރާ ދެކޮޅަށް ވޯޓުލާން ގިނަ ބަޔަކު ނުކުންނާނެ. އެތަނެއް ނޫން މިފެނުނީ. ވޯޓުނުލާތަން މި ފެނުނީ. މިއީ އަޅުގަނޑުމެން ޕާޓީގެ ބައިބައިވުމުގެ އަސަރު ކަމަށް ވެސް ވެދާނެ.
މި ނަތީޖާއާ ގުޅޭ ގޮތުން ސުވާލުކުރުމުން، ފައްޔާޒް "މިހާރު"އަށް ވިދާޅުވީ ޕްރިޑިކްޝަން ދިމާނުވި ކަމަށާއި އެއީ ހީކުރި ގޮތެއް ނޫން ކަމަށެވެ. އެމްޑީޕީން އަމާޒުހިފީ ފުރަތަމަ ބުރުގައި 57 ޕަސެންޓާ އެކު އެއްބުރުން ކާމިޔާބު ކުރުމަށެވެ.
އެކަމަކު ސަރުކާރުގެ މައްޗަށް އިދިކޮޅަށް ކާމިޔާބީ ހޯދުނު އެންމެ ބޮޑު ސަބަބަކީ ފައްޔާޒް ދެކެވަޑައިގަންނަވާ ގޮތުގައި އިންތިހާބުގައި ވޯޓުލާން ބޮޑު ޕަސެންޓެއް ނުނުކުތުމެވެ. އެއާއެކު ޕާޓީގެ ވޯޓު ބައިބައިވެފައި އޮތުމާއި ސަރުކާރު ބަދަލުކުރަން ޖެހޭ ފަދަ ރޫހެއް ނުވަތަ ސަރުކާރަށް މި އިންތިހާބު ކާމިޔާބުވެދާނެ ކަމަށް ދެކިގެން ގިނަ ބަޔަކު ވޯޓުލާން ނުނިކުމެ ތިބުމެވެ.
"އެލިޖިބަލް ވޯޓާސްގެ ތިންބައިކުޅަ އެއްބަޔަށް ވުރެން ވެސް ގިނަކޮށް މިއޮތީ ވޯޓު ނުލައި. އެއީ އަޅުގަނޑުމެން އެއްގޮތަކަށް ވެސް އެކްސްޕެކްޓްކުރި ގޮތެއް ނޫން. އެއީ އެ ނަތީޖާ އެހެންވުމުގެ ސަބަބެއް ކަމަަށް އަޅުގަނޑުމެންނަށް ގަބޫލުކުރެވޭ،" ފައްޔާޒް ވިދާޅުވި އެވެ.
މިއަދު ބޭއްވި އިންތިހާބުގައި 282،395 މީހުންނަށް ވޯޓުލުމުގެ ހައްގު ލިބޭއިރު، ވޯޓުލާން ނުކުތީ 75 ޕަސެންޓެވެ. އެއީ ގާތްގަނޑަކަށް 211،796 މީހުންނެވެ.
އެއާއެކު ނަތީޖާއިން ފެންނަން އޮތީ، ފައްޔާޒް ވިދާޅުވި ގޮތުގައި، ރާއްޖޭގައި އޮތް ސިޔާސީ ބޮޑު ދެފިކުރު، އެމްޑީޕީ އާއި ޕީޕީއެމަށް ބަދަލެއް ނައިސް އޮތް ތަނެވެ. ނަތީޖާއިން ފެންނަން އޮތީ ދެ ފިކުރުގެ ތެރެއިން ޕީޕީއެމްގެ ވޯޓު މުއިއްޒަށް ލިބިވަޑައިގަތް ތަން ކަމަށް ވިދާޅުވި އެވެ.
އެކަމަކު އެމްޑީޕީގެ ވޯޓު އޮތީ ބައިބައިވެފައި ކަން ފައްޔާޒް ފާހަގަކުރެއްވި އެވެ.
އެމްޑީޕީގެ ކުރީގެ ރައީސް މުހައްމަދު ނަޝީދު އެ ޕާޓީން ވަކިވެވަޑައިގެން ޑިމޮކްރެޓްސް އުފައްދަވައި ކެންޑިޑޭޓެއްގެ ގޮތުގައި އިލްޔާސް ލަބީބް މި އިންތިހާބުގައި ވާދަކުރެއްވި އެވެ. ވަގުތީ ނަތީޖާ ދައްކާ ގޮތުގައި ތިންވަނާގައި އޮތީ ޑިމޮކްރެޓްސް އެވެ.
"އަޅުގަނޑުމެންގެ ބައިވަރު ވޯޓާސް ވޯޓުނުލާ އޮތުން، އޭގެ އިތުރުން ޕީޕީއެމް ހަމަ އެ އޮތް ގޮތަށް އޮތް ތަން މި ފެނުނީ،" ފައްޔާޒް ވިދާޅުވި އެވެ.
އެއްބުރުން ސަރުކާރަށް އިންތިހާބު ކާމިޔާބުވެދާނެ ކަމަށް ދެކިގެން ވޯޓުލާން ނުނުކުމެ ތިބުމަކީ ވެސް ވެދާނެ ކަމެއްގެ ގޮތުގައި އޭނާ ދެކެވަޑައިގަންނަވަ އެވެ.
އެމްޑީޕީގެ ވޯޓާއި ޑިމޮކްރެޓްސްގެ ވޯޓު އެއްކޮށްލިޔަސް ޕީޕީއެމް ކުރީގައި އޮތީ ސަރުކާރާ މެދު ރައްޔިތުން ހިތްހަމަނުޖެހޭތީތޯ ސުވާލުކުރުމުން ފައްޔާޒް ވިދާޅުވި ގޮތުގައި އެހެން ވެސް ބަލަން ޖެހޭ ކަމަށާއި އަސްލު މައްސަލަ ކޮބައިތޯ ބަލާނެ އެވެ.
"ވަރަށް ގިނަ ދޮގުވާހަކަތައް ވެސް މިއޮއްހާ ދުވަހު ދެއްކި. ނޫސްވެރިކަމުގެ މިނިވަންކަމާއި ބަސްބުނުމުގެ މިނިވަންކަމާ އެކު ޑިކްޓޭޓަޝިޕަކާ ތަފާތުކޮށް މިނިވަންކަން އޮތީމާ. ހަގީގަތާ ހިލާފު އެ ވާހަކަތަކަށް ޑިކްޓޭޓާޝިޕެއްގައި އަމަލުކުރާ ގޮތަށް ނުކުރާތީ އެ ދޮގު ވާހަކަ ދެއްކީމަ ރައްޔިތުންނަށް އޭގެ އަސަރު ވެސް ކުރާނެ ކަމަށް އަޅުގަނޑުމެން މިބަލަނީ،" ފައްޔާޒް ވިދާޅުވި އެވެ.
ގައުމުގައި ހަމަޖެހުން ގާއިމްކުރެވިފައި އޮތުމަކީ ވޯޓުލުމަށް ތަރުހީބު ކުޑަވާނެ ކަމެއް ކަން ފާހަގަކުރައްވައި އެއީ ވެސް ވެދާނެ ކަމެއްގެ ގޮތަށް ފައްޔާޒް ލަފާކުރައްވަ އެވެ. އަނިޔާވެރިކަމާ ދެކޮޅަށް އިންތިހާބުތަކުގައި ނުކުންނައިރު މި އިންތިހާބުގައި ފެނުނީ އެގޮތަށް ނުކުންނަން ޖެހޭ ސަބަބެއް އޮތް ތަން ނޫން ކަމަށް ވިދާޅުވި އެވެ.
"މިދެންނެވިހެން ސްޓެބިލިޓީގެ ސަބަބުން އާއްމުކޮށް ވަރަށް ގިނަ ގައުމުތަކުގައި ވެސް ދިމާވާކަމެއް އެއީ ޓާންއައުޓް ދަށްވުމަކީ،" ފައްޔާޒް ވިދާޅުވި އެވެ.
އޭނާ ވިދާޅުވި ގޮތުގައި މި ނަތީޖާ ނުކުތީ ސަރުކާރުގެ މައްސަލަތަކަކުންތޯ ނުވަތަ އެމްޑީޕީގެ އިންތިހާބުތަކުގައި މީހުން ނެރޭ ވަރަށް މި އިންތިހާބުތަކުގައި ނުނެރެވުނު ސަބަބު ވެސް ބަލާނެ އެވެ. އެއީ ކެމްޕޭން މައްސަލައެއްތޯ ވެސް ބަލައި ރަނގަޅު ކުރަން ޖެހޭ ކަންކަން ދެވަނަ ބުރުގައި ރަނގަޅުކުރާނެ ކަމަށް ވިދާޅުވި އެވެ.
މާލެ އާއި އައްޑުއަށް ބެލި ނަމަވެސް އެމްޑީޕީގެ ގިނަ ބަޔަކު ވޯޓުލާން ނުނިކުމެ އެވެ.
"ވޯޓާސް ނުނުކުތީ ކީއްވެތޯ ބަލަން ޖެހޭނީ، ސަރުކާރާ އިދިކޮޅުވެގެން ނަމަ ސަރުކާރާ ދެކޮޅަށް ވޯޓުލާން ގިނަ ބަޔަކު ނުކުންނާނެ. އެތަނެއް ނޫން މިފެނުނީ. ވޯޓުނުލާތަން މި ފެނުނީ. މިއީ އަޅުގަނޑުމެން ޕާޓީގެ ބައިބައިވުމުގެ އަސަރު ކަމަށް ވެސް ވެދާނެ،" ފައްޔާޒް ވިދާޅުވި އެވެ.
ކޯލިޝަނަށް ދެވަނަ ބުރުގައި ވެސް މަރުހަބާ ކިޔާނަން
ފައްޔާޒް ވިދާޅުވީ ފުރަތަމަ ބުރުގައި ވެސް އެމްޑީޕީއާ ކޯލިޝަން ހަދަން ތިބި އެންމެންނަށް އޮތީ ފުރުސަތު ހުޅުވިފައި ކަމަށެވެ. އޭގެތެރޭގައި އެމްޑީޕީގެ ކުރީގެ ރައީސް މުހައްމަދު ނަޝީދާއި އެމަނިކުފާނާ އެކު ޕާޓީއާ ދުރަށް ޖެހިވަޑައިގަތް މަޖިލިސް މެމްބަރުންނާއި އާއްމު މެމްބަރުން ވެސް ހިމެނޭ ކަމަށް ވިދާޅުވި އެވެ.
ފުރަތަމަ ބުރުގައި ނުކުތީ އެމްޑީޕީއާ އެކު ކޯލިޝަން ހެދި އެންމެން ގޮވައިގެން ކަމަށާއި ދެވަނަ ބުރުގައި ވެސް ހަމަ އެ ދައުވަތު އޮންނާނެ ކަމަށް ވިދާޅުވި އެވެ.
"[އިންތިހާބުގެ] ފުރަތަމަ ބުރަށް ދިޔައިރު ވެސް ޑިމޮކްރެޓްސްއަށް ވެސް އެދިގެން، ޖޭޕީ އަށް ވެސް އެދިގެން ތިބީ."
ފައްޔާޒް ވިދާޅުވި ގޮތުގައި ދެވަނަބުރުގައި ރައީސް އިބްރާހިމް މުހައްމަދު ސޯލިހަށް ކާމިޔާބު ކުރެއްވޭނެ ކަމުގެ އުއްމީދު ބޮޑެވެ. އެއްބުރުން ސަރުކާރަށް އިންތިހާބު ކާމިޔާބުވެދާނެ ކަމަށް ދެކިގެން ވޯޓުލާން ނުނުކުމެ ތިބި މީހުން އަނިޔާވެރިކަން އިޔާދަވެދާނެ ކަމަށް ދެކިގެން ދެވަނަ ބުރުގައި ނުކުމެ ސަރުކާރާ އެއްކޮޅަށް ވޯޓުދޭނެ ކަމަށް ވިދާޅުވި އެވެ.