ރިޔާސީ އިންތިހާބުގެ ދެ ވަނަ ބުރާ ގުޅޭ މަސައްކަތުގައި އުޅުއްވަނިކޮށް ރައްޔިތުންގެ މަޖިލީހުގެ އެމްޑީޕީގެ ދެ މެމްބަރެއް ކަމަށްވާ މަރަދޫ ދާއިރާގެ އިބްރާހިމް ޝަރީފް (މަވޯޓާ) އާއި ފޭދޫ ދާއިރާގެ މުހައްމަދު ނިހާދަށް ހަމާލާ ދީފި އެވެ.
ޝަރީފަށް ހަމަލާ ދިނީ މާލޭގައި ހުންނަ މެންހަޓަން ހޮޓަލުގައި އިންތިހާބާ ގުޅޭގޮތުން މަރަދޫ ދާއިރާގެ ބޭފުޅުންތަކެއް މަސައްކަތުގައި ތިއްބަވަނިކޮށް، ގޭންގަކުން ވަދެ ކަމަށް އޭނާ ވިދާޅުވި އެވެ.
"މި ދާއިރާގެ އިންތިހާބުގެ މަސައްކަތުގައި ހަތަރު އަންހެން ކުދިންތަކެއް މި ތަނުގައި ތިއްބާ ގޭންގު ބަޔަކު ވަދެގަނެގެން އަޅުގަނޑަށް ގުޅީމަ އައީ. އައި ތަނުން މޫނުމަތީގައި ވަރަށް ބާރަށް ޖަހައި އައިނު ވެސް ބިންދާލީ،" ޝަރީފް ވިދާޅުވި އެވެ.
އޭނާ ވިދާޅުވި ގޮތުގައި، އެ ހަމަލާ ދިނީ މި ތަނުން ވޯޓު ގަތުމުގެ ކަންކަން ކުރާ ކަމަށް ތުހުމަތުކޮށެވެ. އަދި އެކަން ކުރީ ޕީޕީއެމަށް ނިސްބަތްވާ ގޭންގަކުން ކަމަށް އޭނާ ތުހުމަތު ކުރެއްވި އެވެ.
އެ މައްސަލަ ފުލުހުންނަށް ހުށަހަޅާފައިވާ ކަމަށް ވިދާޅުވި އެވެ.
ޝަރީފްގެ އިތުރުން މި ވަގުތު އައްޑޫގައި ހުންނެވި ނިހާދު ގައިގައި ޖަހާފައިވާ މައްސަލައެއް ބަލަމުންދާ ކަމަށް ފުލުހުން ބުންޏެވެ.
އެކަން ހިނގި ގޮތުގެ ތަފްސީލެއް އަދި ނެތް ނަމަވެސް، ނިހާދަށް ފޭދޫ ސިއްހީ މަރުކަޒުގައި ފަރުވާދެމުން އަންނަ ކަން އެނގިފައި ވެ އެވެ.