މި ސަރުކާރަކީ "ފެތޭ އޮޑިއެއް" ކަމަށް ވިދާޅުވެ އެމްޑީޕީގެ މެމްބަރުން ސަރުކާރާ ފެއަށް ޖެހުމަށް ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގޮވާލެއްވީ އެމްޑީޕީއަށް 2023 ގެ ރިޔާސީ އިންތިހާބު ގެއްލުވާލައި، 2028 އަށް އެ މަނިކުފާނު ގެންގުޅުއްވާ ޕްލޭން ބީއާ ހެދި ކަމަށް ރައްޔިތުންގެ މަޖިލީހުގެ އެމްޑީޕީގެ ބައެއް މެމްބަރުން ތުހުމަތު ކުރައްވައިފި އެވެ.
ރައީސް އިބްރާހިމް މުހައްމަދު ސޯލިހްގެ ސަރުކާރުގެ އެކި ސިޔާސަތުތަކަށް ފާޑުވިދާޅުވަމުން ގެންދެވުމަށް ފަހު، ނަޝީދު ރޭ ވަނީ ސަރުކާރާ ދެކޮޅަށް ފާޅުގައި ނުކުންނަވައިފަ އެވެ. އެމްޑީޕީގެ ވަޓްސްއެޕް ގްރޫޕަށް ފޮނުއްވި މެސެޖުގައި އޮތީ އެ މަނިކުފާނު ހުންނެވީ މި ވެރިކަމާ ރުހިގެން ނޫން ކަން ހާމަކުރައްވައިފަ އެވެ.
ނަޝީދު ސަރުކާރާ ދެކޮޅު ކަމަށް މި ވިދާޅުވީ އެމްޑީޕީގެ ޗެއާޕާސަން ހޮވުމުގެ އިންތިހާބުގެ ފޯރި އެ މަނިކުފާނުގެ ފެކްޝަނާއި ރައީސް އިބްރާހިމް މުހައްމަދު ސޯލިހްގެ ފެކްޝަނުގައި ގަދަވެފައި އޮއްވަ އެވެ.
ނަޝީދު ވިދާޅުވި ގޮތުގައި އެމްޑީޕީ އަށް އެންމެ ރަނގަޅު ގޮތަކީ ސަރުކާރާ އެކުގައި ނުފެތުމެވެ. އެމްޑީޕީ އެދޭ ގޮތަށް ވައުދު ނުފުއްދޭ ކަމަށް ވިދާޅުވެ ކޯލިޝަން ދެމި އޮތުމުގެ ހިތްހަމަނުޖެހުން ވެސް ފާޅުކުރެއްވި އެވެ.
ނަޝީދުގެ މި މެސެޖަށް ރައްޔިތުންގެ މަޖިލީހުގައި ސަރުކާރަށް ތާއީދު ކުރައްވާ އެމްޑީޕީގެ ބައެއް މެމްބަރުން ގެންދަވަނީ ފާޑުވިދާޅުވަމުންނެވެ. އެ މަނިކުފާނު ވިދާޅުވާ ވާހަކަފުޅުތަކަށް މީގެ ކުރިން އެއްޗެއް ވިދާޅުނުވެ ތިއްބަސް މެމްބަރުންގެ ނުރުހުން އޮތް ކަން ވެސް ގެންދަވަނީ ހާމަކުރައްވަމުންނެވެ.
ނަޝީދަށް ރައްދު ދެއްވައި ވާހަކަ ދެއްކެވި ބައެއް މެމްބަރުން ވިދާޅުވީ، ނަޝީދުގެ ހިތްހަމަނުޖެހުމަކީ އެ މަނިކުފާނު ނޫން ބޭފުޅަކު އެމްޑީޕީން ވެރިކަމުގައި ހުންނެވުން ކަމަށެވެ. ސަރުކާރަށް ފިއްތުން ކުރިމަތިކޮށް، ބަލިކަށިކޮށްލަން މަސައްކަތް ކުރައްވަނީ، ބަރުލަމާނީ ނިޒާމަކުން ބޮޑުވަޒީރަކަށް ވެވަޑައިގަތުމަށް ކުރެއްވި މަސައްކަތް ކާމިޔާބު ނުވުމުން ކަމަށް ވެސް އެ މެމްބަރުން ތުހުމަތު ކުރައްވަ އެވެ.
ނަޝީދަށް ފާޅުގައި ފާޑުވިދާޅުވި އެއް މެމްބަރަކީ މި ފަހުން ކޮމަންޑޫ ދާއިރާއަށް އެމްޑީޕީގެ ޓިކެޓުގައި ވާދަކުރެއްވި މުހައްމަދު ރާޝިދެވެ.
އޭނާ ވިދާޅުވި ގޮތުގައި އެމްޑީޕީގެ ރައީސް ނަޝީދު ފާޑުވިދާޅުވާން ޖެހިވަޑައިގަންނަވާ ވަރަށް ވުރެ މި ސަރުކާރު ކާމިޔާބެވެ.
"މި ފެންނަނީ 2023 ގައި އެމްޑީޕީ ބަލިކުރުމަށް އިދިކޮޅުން އުކާނެ ދުނި ދަނޑިތަކާއި ކުޅޭނެ ކާޑުތައް ތައްޔާރުކޮށް ލިޔެދީ ހިންގާ ބޮޑު ޖަރީމާއެއް. މި ފަދަ އަމަލުތައް ވަގުތުން ހުއްޓާލާ،" އޭނާ ވިދާޅުވި އެވެ.
ބާރަށު ދާއިރާގެ މެމްބަރު އަދި އެމްޑީޕީގެ ޑެޕިއުޓީ ޗެއާޕާސަން (މާލީ) އަހްމަދު އަބްދުﷲ ވިދާޅުވީ މިހާރު ފެންނަނީ ސަރުކާރު ފެތެނީ ކަމަށް ހީފުޅުވާ ބޭފުޅުން ޕާޓީގައި ފެތޭ މަންޒަރު ކަމަށެވެ. ރައްޔިތުންގެ މަޖިލީހުގެ މެޖޯރިޓީ މެމްބަރުން ތިއްބެވީ ސަރުކާރާ އެކުގައި ކަން ފާހަގަކުރައްވައި ވިދާޅުވީ ނަޝީދު ހާމަކުރެއްވީ އެ މަނިކުފާނަށް ވިސްނިވަޑައިގަންނަވާ ގޮތް ކަމަށެވެ.
އެމްޑީޕީ، ސަރުކާރާ އެކީގައި ނުތިބުން އެއީ އެ މަނިކުފާނަށް ނިންމެވޭނެ ކަމެއް ނޫން ކަމަށް އަހްމަދު ވިދާޅުވި އެވެ.
"ޕާޓީގެ ރިޔާސީ ކެންޑިޑޭޓު ރައީސް ކަމުގައި ހުންނަވަނިކޮށް މި ވެރިކަން ފެތެނީ ކަމަށް އެ ގޮތަށް ވިދާޅެއް ވެސް ނުވެވޭނެ،" އަހްމަދު ވިދާޅުވި އެވެ.
"ސަރުކާރު ފެތެނީ ކަމަށް ހީފުޅުވާ ބޭފުޅުން ފެތޭ މަންޒަރު މިހާރު ފެންނަނީ."
އަހުމަދު ވިދާޅުވި ގޮތުގައި މަޖިލީހުގައި ވެސް ސަރުކާރަށް ދަތިކޮށް، ނަޝީދު އިސްކުރައްވަނީ އަމިއްލަ މަސްލަހަތެވެ. ތާއަބަދަށް އެކަކު ބާރުވެރިކަމުގައި ނުވަތަ ހުރިހާ ކަމެއް ކޮންޓްރޯލް ކުރެއްވުމާ ދެކޮޅަށް އެމްޑީޕީގެ ތެރޭގައި ވިސްނުންތަކެއް ގަދަވެއްޖެ ކަމަށް އަހްމަދު ދެކެވަޑައިގަންނަވަ އެވެ.
އޭނާ ވިދާޅުވީ ބާރު ދޫކޮށްލައްވައިގެން ހުންނަވަން ބޭނުންފުޅު ނުވާތީ، 2028 އަށް ނަޝީދު ވިސްނުންފުޅު ގެންގުޅުއްވަނީ ކަަމަށް ބެލެވޭނެ ޖާގަ އަމަލުކުރައްވާ ގޮތުން އެބައޮތެވެ. މި ފަހުން މަޖިލީހުގައި ނެގި ވޯޓުތަކުގައި ނަޝީދުގެ ފަޅިން ވަނީ އިދިކޮޅު ޕީޕީއެމުން ބޭނުންވާ ގޮތަށް ވޯޓު ދެއްވައިފަ އެވެ.
މިއީ، ރައީސް އިބްރާހިމް މުހައްމަދު ސޯލިހާ އެކު ތިއްބެވި މެމްބަރުންގެ ވަރަށް ބޮޑު ހިތްހަމަނުޖެހުމެއް އޮތް މައްސަލައެކެވެ.
އަހްމަދު ނޫނަސް އެމްޑީޕީގެ ބައެއް މެމްބަރުން ވިދާޅުވާ ގޮތުގައި ނަޝީދު އަމަލު ކުރައްވަނީ ކުރިއަށް އޮތް 2023ގެ ރިޔާސީ އިންތިހާބު އެމްޑީޕީއަށް ގެއްލޭ ގޮތަށެވެ.
މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) ވިދާޅުވި ގޮތުގައި 2028 އަކީ ނަޝީދުގެ ޕްލޭން ބީ އެވެ. ސަރުކާރާ ދެކޮޅަށް ނަޝީދުގެ ބަސްފުޅުތަކާއި އަމަލުކުރައްވާ ގޮތަކީ މަސްލަހަތު ގެއްލިދާނެ ވަރަށް ނުރައްކާތެރި އަމަލެއް ކަމަށް ވިދާޅުވި އެވެ.
"ސަރުކާރު ވާކޮށްލުން ނަޝީދުގެ ބޭނުމަކީ. އެއީ ވަރަށް ނުރައްކާތެރި ކަމެއް،" ޝަރީފް ވިދާޅުވި އެވެ.
އޭނާ ވިދާޅުވި ގޮތުގައި ކޮވިޑުގެ ދަތި ހާލަތާ އެކު އިގްތިސާދީ ވަޅުގަނޑު އަރައިގަތުމުގައި ސަރުކާރުން ކުރި ހޯދަމުން އަންނަ އިރު، އެމްޑީޕީގެ ތެރެއިން ބަޔަކު ސަރުކާރާ ދެކޮޅަށް ހަރަކާތްތަކެއް ހިންގުމަކީ އަވަށްޓެރި ސްރީ ލަންކާއަށް ދިމާވި ހާލަތު ކުރިމަތިވުން ގާތް ކަމެކެވެ.
ނަޝީދު އެގޮތަށް މަސައްކަތް ކުރައްވާ ނަމަ، ޝަރީފް ވިދާޅުވި ގޮތުގައި، އެމްޑީޕީ ބައިބައިވުމުގެ އިތުރުން ގައުމު ވެސް ހަލަބޮލިވެގެން ގެންދާނެ އެވެ.
"އިދިކޮޅު ޕާޓީން ވެސް ނުކުރާ މިންވަރު މިކުރަނީ. މި ކަންކަމަކީ ގައުމުގެ ސަލާމަތާއި ރައްކާތެރިކަމާއި ރައްޔިތުންގެ ފުދުންތެރިކަމަށް ވެސް ގެއްލުންވާނެ ކަމެއް."
ޝަރީފް ވިދާޅުވީ ނަޝީދުގެ ނުރުހުން އޮތީ ބޮޑުވަޒީރަކަށް ވެވަޑައިގަތުމުގެ ފުރުސަތު ނުލިބުމެވެ. ރައީސް އިބްރާހިމް މުހައްމަދު ސޯލިހް މި ސަރުކާރުގެ ރަމްޒީ ބޭފުޅެއްގެ ގޮތުގައި ހުންނަވައި ނަޝީދު ވެރިކަން ކުރައްވަން ބޭނުންފުޅުވިޔަސް އެއީ އެ ދެ ބޭފުޅުންނަށް ގޮތް ނިންމެވެން އޮތް ކަމެއް ނޫން ކަމަށް ވިދާޅުވި އެވެ.
"ރައްޔިތުންގެ މަޖިލީހުގެ މެމްބަރުންނަށް ވެސް އެނގިވަޑައިގަންނަވާ، ބަރުލަމާނީ ނިޒާމެއްގައި ގައުމާއި ރައްޔިތުންނަށް މޮޅެއް ނެތް ކަން. އެހެންވެ މަޖިލީހުގެ ތިންބައިކުޅަ ދެބައި އަޣުލަބިއްޔަތު އެކަމަށް ނުލިބުނީ. ދެން ބޭނުންފުޅުވީ ސަރުކާރު ބަލިކަށިކޮށް ވައްޓާލެވޭނެ މަގެއް ކޮށޭތޯ،" ޝަރީފް ވިދާޅުވި އެވެ.
އޭނާ ވެސް ވިދާޅުވި ގޮތުގައި ނަޝީދުގެ ފެކްޝަނުން މަސައްކަތް ކުރަނީ 2023 އެމްޑީޕީއަށް ކާމިޔާބު ނުވިޔަސް ވަރިހަމަ ކަމަށް ބަލައިގެންނެވެ.
"އިދިކޮޅު ލީޑަރުގެ ހުވަފެނެއް އެ މަނިކުފާނުގެ ޕްލޭން ބީ އަކީ. އެއީ، 2023 ނުލިބުނަސް ވަރިހަމަކޮށް އިދިކޮޅު ލީޑަރެއްގެ ގޮތުގައި 2028 ކާމިޔާބުކުރުން،" ޝަރީފް ވިދާޅުވި އެވެ.
އޭނާ ވިދާޅުވި ގޮތުގައި އެ ޕްލޭނުގައި އެމްޑީޕީގެ ސަރުކާރަށް ދަތިކޮށް ފިއްތުން ކުރިމަތިކޮށްގެން 2028 އެ ޕާޓީއަށް ރައްޔިތުން ދޭން ޖެހޭނެ ސަބަބެއް އޮތް ކަމަކަށް ގަބޫލެއް ނުކުރެއްވެ އެވެ.
ޝަރީފް ވިދާޅުވި ގޮތުގައި ރާއްޖެއަށް ކުރިއެރުމާއި ތަރައްގީ އޮތީ އެމްޑީޕީގެ ވެރިކަމަކުންނެވެ. އެ ހަގީގަތާ އެއްކޮށް މަސައްކަތް ކުރުން ފިޔަވައި އެމްޑީޕީ މެމްބަރުންް ބައިބައިވާން ޖެހޭ ކަމެއް ނެތް ކަމަށް ވިދާޅުވި އެވެ.
ސަރުކާރު ފެތެނީ ކަމަށް ނަޝީދު ފާޑުވިދާޅުވި ނަމަވެސް އާއްމު އުސޫލުން ސަރުކާރުން ރަސްމީކޮށް އެއްޗެއް ނުބުނެވެ.
ސަރުކާރުގެ އެކި ކަންކަމަށް އެމްޑީޕީގެ ތެރެއިން މި ފަހުން ވަރަށް ފާޅުގައި ފާޑުކިޔަމުންދާއިރު، މީގެ ކުރިން ނަޝީދު ވަނީ ރައީސް އިބްރާހިމް މުހައްމަދު ސޯލިހާ އެކު ސިޔާސީ މަސައްކަތް ނުކުރެއްވޭނެ ކަމަށް ވިދާޅުވެފަ އެވެ. އެއާއެކު ދެން އޮތް ގޮތަކީ އިދިކޮޅު ޕީޕީއެމާ އެކު ސިޔާސީ މަސައްކަތް ކުރުން ކަމަށް މިދިޔަ އަހަރުގެ ފަހުކޮޅު ވިދާޅުވެފައިވެ އެވެ.
ނަޝީދު އޭރު ވިދާޅުވެފައި ވަނީ އެމްޑީޕީން ބޭނުން ވަނީ އިދިކޮޅު ޕީޕީއެމާ އެކު އިއްތިހާދުވެ ސަރުކާރެއް އެކުލަވާލަން ކަަމަށެވެ. ނަޝީދު، ޕީޕީއެމަށް މި ދެއްވި ދައުވަތާ އެ ޕާޓީން އޭރު ދެކޮޅުހެދީ އެވެ.
މި މައްސަލައިގައި ރައީސް އިބްރާހިމް މުހައްމަދު ސޯލިހް އޭރު ވިދާޅުވެފައި ވަނީ އެމްޑީޕީ އާއި ޕީޕީއެމް އެކުވުމަކީ ސިޔާސީ ނިޒާމް ރޫޅިދާނެ ކަމެއް ކަމަށެވެ. އެފަދަ ކަމަކަށް އެމްޑީޕީގެ މެމްބަރުން ތާއީދު ނުކުރަން ރައީސް އެދިވަޑައިގަތެވެ.
