މި ސަރުކާރުން އައްޑުއަށް ކަމެއް ނުކޮށްދޭ ކަމަށް، އެމްޑީޕީގެ ޗެއާޕާސަން ކަމަށް ވާދަކުރައްވާ އިމްތިޔާޒް ފަހުމީ (އިންތި)ގެ ފެކްޝަނުން ބުނީ އެޖެންޑާއެއް އޮވެގެން ކަމަށާއި އެ ފެކްޝަނުން މަސައްކަތް ކުރަނީ 2023 އާ ދުރަށް ކަމަށް އައްޑޫގެ މޭޔަރު އަލީ ނިޒާރު ވިދާޅުވެއްޖެ އެވެ.
އެމްޑީޕީ ދެ ފެކްޝަނަކަށް ޗެއާޕާސަންގެ ކެމްޕޭންކުރާ އިރު އިންތި ވާދަކުރައްވަނީ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ފަޅިންނެވެ. އިކޮނޮމިކް މިނިސްޓަރު ފައްޔާޒް ވާދަކުރައްވަނީ ރައީސް އިބްރާހިމް މުހައްމަދު ސޯލިހްގެ ފަޅިންނެވެ.
ނިޒާރު ރައްދު ދެއްވީ އައްޑޫގެ ތަރައްގީއަށް "ހިންގާލެވުނީ" ކޯއްޗެއްތޯ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ސުވާލު އުފެއްދެވުމުންނެވެ. އެ ވާހަކަތަކުގެ ފަހަތުގައި އޮތީ ނިޒާރު ވިދާޅުވި ގޮތުގައި އެ ފެކްޝަނުގެ މުޅިން އެހެން ބޭނުމެކެވެ.
އެމްޑީޕީ ދެބައިކުރަމުންދާ ވާހަކަ ބައެއް މީހުންނަށް ދައްކަން ނުކެރެނީ ނުވަތަ ޖެހިލުންވަނީ ކަމަށް ވިދާޅުވެ ނިޒާރު ވަނީ ސަރުކާރާ ދެކޮޅަށް މަސައްކަތްކުރަމުންދާ ކަމަށް ވިދާޅުވެފަ އެވެ.
"އެ ފަޅިން [އިންތި ވާދަކުރައްވާ ފަޅިން] މަސައްކަތް ކުރަނީ 2023އާ ދުރަށް. އެޖެންޑާއަކީ ކޮބައިކަމެއް ނޭނގެ. އެޖެންޑާ އޮތީ ކޮން ކަމަކަށް ކަމެއް އަޅުގަނޑުމެންނަކަށް ނޭނގޭ. އަޅުގަނޑުމެން ޝައްކެއް ނުކުރަން ހަމަ 2023 އާ ދެކޮޅަށް އެ ފަޅިން މަސައްކަތް ކުރަނީ،" ނިޒާރު ވިދާޅުވި އެވެ.
އެގޮތަށް މަސައްކަތް ކުރާ ނަމަ އެމްޑީޕީގެ ކުލަ އާއި ލޯގޯ އާއި މެނިފެސްޓޯ ހިފައިގެން އުޅުމުގެ ބޭނުމެއް ކޮބައިތޯ އޭނާ އެއްސެވި އެވެ. އެމްޑީޕީގެ މިވެރިކަމުގައި ކަމެއް ނުކޮށްދެވޭ ކަމަށް ސަރުކާރަށް ފާޑުކިއުމަށް ފަހު 2023 އަށް ވޯޓު ހޯދަން ރައްޔިތުންގެ ގާތަށް ދިއުން ވަރަށް ހުތުރު ކަމަށް ވެސް ނިޒާރު ވިދާޅުވި އެވެ.
އޭނާ ވިދާޅުވީ ރައްޔިތުންގެ މަޖިލީހުގެ އައްޑޫގެ މެމްބަރުން ނުކުމެވަޑައިގެން މި ސަރުކާރުން އައްޑުއަށް ކުރަނީ ކޮން ކަމެއްތޯ ސުވާލު އުފެއްދުމަކީ ފިތުނަވެރި ވިސްނުމެއް އުފެއްދުން ކަމަށެވެ. ޕާޓީ ދެ ބައިކުރުމާއި މެމްބަރުން ކުދިކުދިކޮށްލުން ނޫން ކޮން ވިސްނުމެއްތޯ އެކަމުގައި އޮތީ އޭނާ ސުވާލު ކުރެއްވި އެވެ.
"މިއީ ވިސްނަން ޖެހޭ ކަމެއް، ޕާޓީ އެކަތިގަނޑަކަށް ކުރާ މަސައްކަތަކީ ޕާޓީގެ ޗެއާޕާސަންގެ ޒިންމާއެއް. ޕާޓީގެ ރައީސްގެ ޒިންމާއެއް. އަދި ޕާޓީގައި ދެން ވެސް ސީނިއާ މަގާމްތަކުގައި ތިބި މީހުންގެ ޒިންމާއެއް،" އޭނާ ވިދާޅުވި އެވެ.
"އެކަމަކު 2023 ނުލިބޭނެއޭ، ސަރުކާރުން ކަމެއް ނުކުރެއޭ، އެއްވެސް ކަމެއް ނުކުރެއޭ ގޯހޭ އަމިއްލައަށް ބުނެފައި ޕާޓީގެ ނަމުގައި ވޯޓު ހޯދަން ދިއުމުން ކަމަކު ނުދޭ. ކަޑަ ކަމެއް މިއީ. އަޅުގަނޑުމެންނަށް ތާއީދުކުރެވޭނެ ކަމެއް ނޫން އެއީ."
ނިޒާރު ވަނީ އައްޑޫގައި ތިބި އެމްޑީޕީގެ މެމްބަރުން މަސްލަހަތު އިސްކުރުމަށް ގޮވާލައްވައިފަ އެވެ. ސަރުކާރުން އައްޑުއަށް ގެންނަން ތަރައްގީގެ އެންމެ އިސް މޭސްތިރިޔަކީ، އޭނާ ވިދާޅުވި ގޮތުގައި، މިނިސްޓަރު ފައްޔާޒެވެ.
އެ ބައްދަލުވުމުގައި އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ވަނީ މި ސަރުކާރުން އައްޑޫގެ ތަރައްގީއަށް ބިޔަ މަޝްރޫއުތަކެއް ފަށާފައިވާ ކަމަށް ވިދާޅުވެފަ އެވެ. ރައްޔިތުންނަށް ތަކުލީފަކަށް ވީ މަގުތައް ހަދަން ހަވާލުކޮށްފައިވާ ކަމަށާއި އައްޑޫގެ ބިން ހިއްކުން ވެސް ކުރިއަށް އެބަގެންދާ ކަމަށް ވިދާޅުވި އެވެ.
ހެރެތެރަ އާއި ޝަންގްރިއްލާ ނުހިނގަނީ ސަރުކާރާ ހެދި ކަމަށް ތުހުމަތުކުރިއަސް އެތަން ހިންގުމަކީ ސަރުކާރުން ކުރަން ޖެހޭ ކަމެއް ނޫން ކަމަށް އަސްލަމް ވިދާޅުވި އެވެ. ސަރުކާރުން ކުރަން ޖެހޭ ކަމަކީ އެ ވިޔަފާރި ހިންގަން މަގުފަހިކޮށްދިނުން ކަމަށާއި އެކަން ވެސް ހިންގަމުން އަންނަ ކަމަށް ވިދާޅުވި އެވެ.
