ކުރީގައި އޮތް އަނިޔާވެރިކަމުގެ ސަގާފަތް އިޔާދަވިޔަ ނުދޭން ރައީސް އިބްރާހިމް މުހައްމަދު ސޯލިހަށް ދެވަނަ ދައުރެއް ދިނުމުގެ މުހިންމުކަން ރައްޔިތުންނަށް ވިސްނައިދިނުމަށް، އައްޑޫ އަށް ނިސްބަތްވާ މަޖިލިސް މެންބަރުން، އެމްޑީޕީގެ ކެމްޕެއިން ޓީމްތަކުގައި އެދިވަޑައިގެންފި އެވެ.
ކެމްޕެއިން ޓީމްތަކާ އެކު މިއަދު ރައީސް ބޭއްވެވި ބައްދަލުވުމުގައި އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވީ އެންމެ މުހިންމު ކަމަކީ ކެމްޕެއިން ޓީމްތައް ވޯޓުލާން ރައްޔިތުން ނެރުން ކަމަށެވެ. އަދި، މި ސަރުކާރު ދަމަހައްޓަން މުހިންމުވާ ސަބަބުތަކާއި ކުރީގައި އޮތް އަނިޔާވެރިކަން ރައްޔިތުންނަށް ބުނެދޭން ޖެހޭ ކަމަށް އޭނާ ވިދާޅުވި އެވެ.
"ހަގީގަތުގައި ވެސް އަޅުގަނޑުމެންނަކަށް ނެތް ފަހަތަށް ޖެހެވޭކަށް. އޯގާތެރި ވެރިޔަކު މި ފަސް އަހަރު ކޮށްދިން ހިދުމަތުގެ ސަބަބުން އަޅުގަނޑުމެން ހަނދާން ނެތިފައި ތިބީ އަނިޔާވެރިކަމުގައި އުޅެން ޖެހޭ ހާލު،" ރޮޒައިނާ ވިދާޅުވި އެވެ.
"އެބަ ހަނދާންކޮށްދޭން ޖެހޭ ކުރިއަށް އޮތް ދެ ދުވަސް ތެރޭ އެކަންތައް."
ރައްޔިތުންނާ ހަމައަށް ރަނގަޅަށް މެސެޖް ފޯރުކޮށްދެވިއްޖެ ނަމަ، ރޮޒައިނާ ވިދާޅުވީ އިންތިހާބު ކާމިޔާބު ކުރެވޭނެ ކަމަށެވެ. ފުރަތަމަ ބުރުގައި ކަންނެތްވީ ނަމަވެސް، ދެވަނަ ބުރުގައި އެންމެން ވެސް ހިތްވަރާ އެކު މަސައްކަތް ކުރާނެކަން ޔަގީން ކަމަށް އޭނާ ވިދާޅުވި އެވެ.
ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވީ، މިއަދު ނުކުމެ ތިބީ ނަތީޖާ އަނބުރާލަން ކަމަށާއި އައްޑޫން ބޮޑު ތަނުން ރައީސަށް ނަތީޖާ ނެރެދޭނެ ކަމަށެވެ.
"މި އައްޑޫ ސިޓީން ނަތީޖާ ނެރެދޭނަން،" ނަޒީލް ވިދާޅުވި އެވެ.
ނަޒީލް ވިދާޅުވީ ކުރިއާ ހިލާފަށް މިހާރު ކެމްޕެއިން ކުރިއަށް ގެންދަވަނީ ވަރަށް ތަފާތުކޮށް ކަމަށާއި ސީދާ ރައްޔިތު މީހާ އަށް ހަމައަށް ގޮސްގެން ކެމްޕެއިން ކުރަމުންދާ ކަމަށެވެ.
"އަޅުގަނޑުމެންގެ ދާއިރާގައި ވޯޓުލާ ކޮންމެ މީހަކާ ވެސް ވާނީ ބައްދަލުކޮށްފައި. އިރާދަކުރެވިއްޔާ 30 ސެޕްޓެމްބަރުގައި ނުކުމެ ކާމިޔާބު ކުރާނަން،" ނަޒީލް ވިދާޅުވި އެވެ.
ފޭދޫ ދާއިރާގެ މެންބަރު މުހައްމަދު ނިހާދު ވިދާޅުވީ ކުރީ ސަރުކާރުގައި ލިބުނު އަނިޔާތަކުގެ ވޭން އަދިވެސް ތަހަންމަލު ކުރަމުންދާ ކަމަށާއި ފުލުހުންގެ މުގުރުތަކުން ލިބުނު އަނިޔާތަކުގެ ރިހުން އަދިވެސް ފިލައިގެން ނުދާ ކަމަށެވެ. އިދިކޮޅަށް ދެން ވެސް ގެންނެވޭނީ އަނިޔާވެރި ސަރުކާރެއް ކަމަށާއި ތަރައްގީ ގެނެސް ނުދެވޭނެ ކަމަށް އޭނާ ވިދާޅުވި އެވެ.
"މުޅި އައްޑޫ ނުކުމެ، ތައްޔާރުވެލައިގެން ނުކުމެ އައްޑޫން ރަނގަޅު ނަތީޖާއެއް ނެރެ ކާމިޔާބުވާނެ ކަމާ މެދު ޝައްކު ނުކުރަން،" ނިހާދު ވިދާޅުވި އެވެ.