އަންހެނުންނަކީ ތިބި ބައެއްކަން ދަނެ، އެ މީހުންނަށް ބޭނުންވާ ފުރުސަތުތައް ފަހިކޮށްދިން ހަމައެކަނި ރައީސަކީ ރައީސް އިބްރާހިމް މުހައްމަދު ސޯލިހު ކަމަށް، އެމްޑީޕީގެ އަންހެނުންގެ ރޫހުގެ ރައީސާ، އައްޑޫ މީދޫ ދާއިރާގެ މެންބަރު ރޮޒައިނާ އާދަމް މިއަދު ވިދާޅުވެއްޖެ އެވެ. އެމްޑީޕީގެ އަންހެނުންގެ ރޫހުގެ ގޮފިން އިންތިޒާމުކޮށްގެން މިއަދު ހަވީރު ބޭއްވި "އުފާވެރި އަންހެނުން" އިވެންޓުގައި ވާހަކަ ދައްކަވަމުން ރޮޒައިނާ ވިދާޅުވީ ދިވެހި އަންހެނުންގެ ހިތްތަކުން ޖާގަ ހޯއްދަވާފައިވާ ހަމައެކަނި ރައީސަކީ "ރައީސް އިބޫ" ކަމަށެވެ.
"އަޅުގަނޑުމެން ދަތިތަކެއް އެބަ ތަހައްމަލު ކުރާކަން، އަޅުގަނޑުމެންނަށް ފުރުސަތުތަކެއް ހޯދައިދޭން ޖެހޭކަން އެނގިވަޑައިގެންނެވި ހަމައެކަނި ރައީސް އިބޫ،" ރޮޒައިނާ ވިދާޅުވި އެވެ.
އެހެން ވިދާޅުވާން ޖެހޭ އެތައް ސަބަބެއް ހުރިކަން ފާހަގަކުރައްވައި ރޮޒައިނާ ވަނީ ބައެއް އަންހެނުންގެ ދިރިއުޅުމުން މިސާލު ނަންގަވައިފަ އެވެ. ރަށްރަށުގެ ފެނާއި ނަރުދަމާ ނިޒާމު ގާއިމުކުރުމާއި ވިހައިގެން ލިބުނު ޗުއްޓީ އާއި ފޯރުކޮށްދިން ވަޒީފާގެ ފުރުސަތުތަކުން ދިރިއުޅުމަށް އައި ފަސޭހަތައް އޭނާ ހިއްސާކުރެއްވި އެވެ.
"އަޅުގަނޑުމެން އަންހެނުންގެ އިހުސާސްތައް ދެނެގަނެވުނު ހަމައެކަނި ރައީސަކީ ހަމައެކަނި ރައީސް އިބޫއޭ. މި ދައްކަނީ މައުސޫމާގެ އެކަނި ވާހަކައެއް ނޫން. މިއީ އެތައް ހާސް އަންހެނުންނެއްގެ ދިރިއުޅުމުންދިޔަ ހާލަތު،" ފޯކައިދޫ އަންހެނެއްގެ ހާލަތު ކިޔައިދެއްވުމަށް ފަހު ރޮޒައިނާ ވިދާޅުވި އެވެ.
މި ފަސް އަހަރުގެ ދައުރުގައި އަންހެނުންގެ ތަރައްގީއަށް ގެނައި ބަދަލުތަކާއި ރައީސް ކޮށްދެއްވާފައިވާ ބައެއް ކަންކަން ވެސް ރޮޒައިނާ ވަނީ ހިއްސާކުރެއްވި އެވެ. ވިޔަފާރި ފަށަން ބޭނުންވާ 1000 އަށް ވުރެ ގިނަ އަންހެނުންނަށް ބީސީސީން ކޮންސަލްޓެންސީ ދީ، 4407 އަންހެނުންނަށް އެކިއެކި ޓްރެއިނިންތައް ކުރިއަށް ގެންދެވި، ސްޓޫޑެންޓު ލޯނު ދެވިފައިވާ ކުދިންގެ 58 ޕަސެންޓަކީ އަންހެނުން ކުދިން ކަމަށް ރޮޒައިނާ ވިދާޅުވި އެވެ.
ޓީޗަރުންނާއި ނަރުހުންގެ ތެރޭގައި ގިނައީ އަންހެނުންކަން ފާހަގަކޮށް ރޮޒައިނާ ވިދާޅުވީ އެ މީހުންގެ މުސާރަ ބޮޑުނުކުރެވޭނެ ކަމަށް ކުރިން ބުނަމުން އައި ނަމަވެސް މިއަދު އެކަން ވެސް "ރައީސް އިބޫ ކޮށް ދައްކަވައިފި" ކަމަށެވެ.
"ފުރަތަމަ ސުޕްރީމް ކޯޓަށް އަންހެން ފަނޑިޔާރުން ހަމަޖައްސައިދެއްވީ ރައީސް އިބޫ. ފުރަތަމަ އަންހެން ޑިފެންސް މިނިސްޓަރު އައްޔަން ކޮށްދެއްވީ ރައީސް އިބޫ. ކައުންސިލްތަކުގެ 33 ޕަސެންޓު ހަމަޖައްސައިދެއްވާ މިއަދު ކައުންސިލްތަކުގެ 39 ޕަސެންޓަކީ އަންހެނުން. އޭގެ ކުރިން ތިބީ 5 ޕަސެންޓު. ޑިޕްލޮމެޓިކް މިޝަންތަކުގެ 50 ޕަސެންޓު މީހުންނަކީ އަންހެނުން،" ރޮޒައިނާ ވިދާޅުވި އެވެ.
ގުޅިފައިވާ ޕާޓީތަކުން "ޓީ ވިތް އިބޫ"ގެ ނަމުގައި ބޭއްވި އަންހެނުންގެ އިވެންޓުގައި ރައީސަށް ތާއީދު ކުރައްވާ ގިނަ އަދަދެއްގެ އަންހެނުން ބައިވެރިވި އެވެ. މި އިވެންޓު ވަނީ މީހުން ދިރިއުޅޭ ހުރިހާ ރަށެއްގައި އެއް ވަގުތެއްގައި ކުރިއަށް ގެންގޮސްފަ އެވެ.
މި އިވެންޓުގައި ރައީސްގެ ދެ ވަނަ ދައުރެއްގައި އަންހެނުންގެ ސިޔާސަތުކާއިި އަންހެނުންނާ ގުޅޭ މެނިފެސްޓޯ ކިޔައިދިނުމަށް ހަމަޖެހިފައި އޮތެވެ. ނަމަވެސް ދިމާވި ޓެކްނިކަލް މައްސަލައަކާ ގުޅިގެން އެ ބައި ކުރިއަށް ގެންގޮސްފައެއް ނުވެ އެވެ.