ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނުގެ ދަށުން އާންމު ތަންތަނުގައި އެއްވެ އުޅުން މަނާކުރާ މާއްދާ އުވާލުމަށް މީގެ ހަތަރު އަހަރު ކުރިން ރައްޔިތުންގެ މަޖިލީހަށް ހުށަހެޅި މައްސަލައިގެ ބިލުގެ މަސައްކަތް އަލުން ފަށައި، މި މަހުގެ ނިޔަލަށް ގޮތެއް ނިންމުމަށް ގައުމީ ސަލާމަތާ ބެހޭ ކޮމިޓީއަށް ހުށަހަޅައިފި އެވެ.
އެއްވެ އުޅުމުގެ މިނިވަންކަމުގެ ގާނޫނަށް އިސްލާހު ގެނައުމުގެ މަސައްކަތް ނުނިމި ދިގުލައިގެން ދާތީ، މިހާރު ކުރިއަށް ގެންދާ ގައުމީ ސަލާމަތާ ބެހޭ ކޮމިޓީގެ ބައްދަލުވުމުގައި އެކަމުގެ ކަންބޮޑުވުމާ އެކު، މި މަހުގެ ނިޔަލަށް މި ބިލުގެ މަސައްކަތް ނިންމަން ހުށަހެޅީ ހޯރަފުށީ ދާއިރާގެ މެމްބަރު އަހްމަދު ސަލީމެވެ. އެހެން ބައެއް މެމްބަރުން ވެސް ވަނީ އެ ބިލުގެ މަސައްކަތް ލަސްވާތީ ކަންބޮޑުވުން ފާޅުކުރައްވައިފަ އެވެ.
ސަލީމް ވިދާޅުވީ އާންމު ތަންތަނުގައި އެއްވެ އުޅުން މަނާކުރާ މާއްދާ އުވާލުމަށް މި ބިލުގައި ބުނެފައި އޮތް ގޮތަށް ފާސްކުރަން ފެންނަ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އާއި ހޯމް މިނިސްޓްރީ އާއި ފުލުހުންނާ އަދި ކަމާ ބެހޭ އެހެން އިދާރާތަކުން ވެސް ކޮމެޓީއަށް ލަފާދީފައިވާ ކަން ލިޔެކިޔުންތަކުން އެނގެން އެބައޮތް ކަމަށެވެ. އެހެންވެ، އެ މަސައްކަތް އަވަހަށް ނިންމާލެވޭނެ ކަމަށް އޭނާ ވިދާޅުވި އެވެ.
އެއަށް [މި ބިލަށް] އިތުރު ބަދަލުތަކެއް ގެންނަންޏާ އަޅުގަނޑަށް ހީވަނީ އިތުރު މަސައްކަތްތަކެއްހެން ކުރެވޭނީ. އެހެންވީމަ، އަޅުގަނޑު ކޮމެޓީއަށް ހުށަހަޅަނީ ކާށިދޫ ދާއިރާގެ އިއްޒަތްތެރި މެމްބަރު ހުށަހަޅުއްވާފައި އޮތް ގޮތަށް ކޮމެޓީން ފާސްކުރުން: ސަލީމް
"އެއަށް [މި ބިލަށް] އިތުރު ބަދަލުތަކެއް ގެންނަންޏާ އަޅުގަނޑަށް ހީވަނީ އިތުރު މަސައްކަތްތަކެއްހެން ކުރެވޭނީ. އެހެންވީމަ، އަޅުގަނޑު ކޮމެޓީއަށް ހުށަހަޅަނީ ކާށިދޫ ދާއިރާގެ އިއްޒަތްތެރި މެމްބަރު ހުށަހަޅުއްވާފައި އޮތް ގޮތަށް ކޮމެޓީން ފާސްކުރުން،" ސަލީމް ވިދާޅުވި އެވެ.
ސަލީމް މި ހުށަހެޅުއްވުމަށް ކޮމެޓީގެ ބައެއް މެމްބަރުން ތައީދުކުރެއްވި އެވެ. ނަމަވެސް، ބައެއް މެމްބަރުން ނުރަސްމީކޮށް، އޮފް ދަ ރެކޯޑްގައި މަޝްވަރާކުރުމަށް އެދިވަޑައިގަތުމުން އެ ފުރުސަތު ދިނުމަށް ފަހު، ކޮމެޓީން ފަހުން ނިންމީ މި ބިލުގެ މަސައްކަތް އަންނަ ހަފުތާގެ ކޮމެޓީ ބައްދަލުވުމުގައި ކުރިއަށް ގެންދަން އެޖެންޑާ ކުރާށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި، އެއްވެ އުޅުމުގެ ގާނޫނަށް 2016 ވަނަ އަހަރު މަޖިލީހުން ގެނައި އިސްލާހުގައިވާ ގޮތުން މާލޭގައި ފުލުހުންގެ ހުއްދަ ހޯދުމެއް ނެތި އެއްވެވޭނީ ސަރުކާރުން ކަނޑައަޅާ ތަންތަނުގައި އެކަންޏެވެ. ސަރުކާރުން ކަނޑައަޅާފައި ވަނީ ހުއްދަ ހޯދުމެއް ނެތި އެއްވެވޭނީ މާލޭގެ ކާނިވާ ސަރަހައްދަށް އެކަނި ކަމަށެވެ.
އެ ގާނޫނަށް ގެނައި އިސްލާހުގެ ސަބަބުން އެއްވެ އުޅުމުގެ މިނިވަން ކަމަށް ވަރަށް ބޮޑަށް ހުރަސްއެޅޭތީ، އެ ގާނޫނު އުވާލުމަށް އޮގަސްޓް 8، 2019 ގައި މަޖިލީހަށް މައްސަލަ ހުށަހެޅީ ކާށިދޫ ދާއިރާގެ މެމްބަރު އަބްދުﷲ ޖާބިރެވެ. އެ ބިލު ދިރާސާ ކުރަން ގައުމީ ސަލާމަތާ ބެހޭ ކޮމިޓީއަށް ހަމަ އެ އަހަރު ފޮނުވި އެވެ.
އެ ބިލު ކޮމިޓީން ދިރާސާކޮށް ނިންމި ގޮތުގެ ރިޕޯޓު، 2020 ވަނަ އަހަރު ފާސްކޮށް މަޖިލީހުގެ ތަޅުމަށް ފޮނުވިޔަސް، މަޖިލީހުގެ ތަޅުމުގައި ނެގި ވޯޓުން ރިޕޯޓް ފާސްނުކޮށް އަލުން ކޮމިޓިއަށް ފޮނުވާލީ އެވެ.
މިހާރު ކުރިއަށް ގެންދާ ގައުމީ ސަލާމަތާ ބެހޭ ކޮމިޓީގެ ބައްދަލުވުމުގައި ވަނީ 25 މައްސަލައެއް އެޖެންޑާކޮށްފަ އެވެ.