ވިނަރެސް ފްލެޓުތަކަށް ދިގު މުއްދަތަކަށް ބަހާލައިގެން ފައިސާ ދައްކާ މީހުންގެ އިންޓްރެސްޓް ރޭޓް ނުވަ ޕަސެންޓުން ހަ ޕަސެންޓަށް މިއަދު ކުޑަކޮށްފި އެވެ. މި ބަދަލާ އެކު، 25 އަހަރުގެ ތެރޭގައި ފައިސާ ދައްކާ ހަލާސް ކުރާ ގޮތަށް ފްލެޓް ގަންނަ މީހުންނަށް ގާތްގަނޑަކަށް 1.2 މިލިއަން ރުފިޔާ ވަރު ކުޑަވެގެން ދާނެ އެވެ.
އާބަންކޯއިން ބުނީ ހުޅުމާލެ 2 ގައި ހަދާފައިވާ ފްލެޓުތަކަށް ދިގު މުއްދަތަކަށް ބަހާލައިގެން މީގެ ކުރިން ދައްކަން ހަމަޖެއްސީ ނުވަ ޕަސެންޓް އިންޓްރެސްޓް ރޭޓުގައި ކަމަށެވެ. ނަމަވެސް، އެ އަދަދު ހަ ޕަސެންޓަށް ކުޑަ ކުރުމުން ދިގު މުއްދަތުން ފައިސާ ދައްކާ މީހުންނަށް ލުއި ލިބޭނެ ކަމަށް ބުންޏެވެ.
ވިނަރެސް އަކީ 13 ބުރީގެ 10 ޓަވަރު ހިމެނޭ ގޮތަށް ތިން ކޮޓަރީގެ 1،344 ފްލެޓް ހިމެނޭ ހައުސިން މަޝްރޫއެކެވެ. އެ ފްލެޓްތައް ވިއްކަނީ 2.5 މިލިއަން ރުފިޔާ އާއި 2.7 މިލިއަން ރުފިޔާއާ ދެމެދުގެ އަގުތަކެއްގަ އެވެ.
ވިނަރެސް ދޫކުރީ ދެ ގޮތަކަށް ފައިސާ ދައްކާ ގޮތަށެވެ. އެއީ އެޑްވާންސްގެ ގޮތުގައި 15 ނުވަތަ 20 ޕަސެންޓް ދައްކާފައި، 20 ނުވަތަ 25 އަހަރު ދުވަހަށް ބަހާލައިގެން ފައިސާ ދައްކާ އުސޫލުންނެވެ. ކުރިން އޮތް ގޮތުން 2.5 މިލިއަން ރުފިޔާގެ އެޕާޓްމެންޓެއް، 20 ޕަސެންޓްގެ އެޑްވާންސަށް 500،000ރ. ދައްކައިފި ނަމަ، 25 އަހަރުން ފައިސާ ދައްކާ ނިމޭއިރު އެޕާޓްމެންޓްގެ އަގު 5.3 ވަރަަކަށް މިލިއަނަށް ޖެހެ އެވެ. އެކަމަކު މިހާރު އެޕާޓްމެންޓްގެ އަގަކީ، އެގޮތަށް ފައިސާ ދެއްކިޔަސް 4.2 މިލިއަނެވެ.
ވިނަރެސް ލިބުނު ފަރާތްތަކަށް އާބަންކޯ އިން މިހާރު އަންނަނީ އޮފާ ލެޓާތައް ފޮނުވަމުންނެވެ. އެ ސިޓީތަކުގައި ބުނެފައިވާ ގޮތުން އެޑްވާންސް ފައިސާ ތިން މަސް ތެރޭގައި ތިން ޕޭމަންޓަކަށް ބަހާލައިގެން ދެއްކިދާނެ އެވެ.
ވިނަރެސް ފްލެޓަށް ހޮވުނީ މާލޭގައި ރަޖިސްޓްރީނުވެ، ދިރިއުޅޭތާ 15 އަހަރުވެފައިވާ މީހުންގެ ކެޓަގަރީން 1094 މީހުންނާއި މާލޭގައި ރަޖިސްޓްރީ ވެފައިވާތާ 15 އަހަރުވެފައިވާ މީހުންގެ ކެޓަގަރީން 267 މީހުންނެވެ. އެހެން ނަމަވެސް، އެ ފަރާތްތަކަށް ދޫކުރާ ފްލެޓްގެ ޖުމްލަ އަދަދު ޔަގީން ވާނީ، ސީލައިފާއި ގުޅީފަޅު އަދި ހިޔާއިން ފްލެޓް ބަދަލު ކުރި ފަރާތްތަކަށް ވިނަރެސް އިން ފްލެޓް ދިނުމަށް ފަހު ބާކީވާ އަދަދެއް އެނގުމުންނެވެ.