ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީން ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ ޖެނުއަރީ މަހުގެ 20 ވަނަ ދުވަހު ބާއްވަން ނިންމައިފި އެވެ.
ޕީޕީއެމުން މިރޭ ނެރުނު ބަޔާނެއްގައި ބުނީ ރައްޔިތުންގެ މަޖިލީހުގެ އިންތިހާބުގައި ދެ ޕާޓީން ވާދަކުރަން ނިންމައި ކެންޑިޑޭޓުން ނެރޭނީ އެއް ކޯލިޝަނަކުން ކަމަށެވެ.
ޕްރައިމަރީގައި ވާދަކުރަން ބޭނުންވާ މެންބަރުން ޑިސެންބަރު މަހުގެ 20-31 ގެ ނިޔަލަށް އެ ފުރުސަތު ހުޅުވާލާނެ ކަމަށް އެ ޕާޓީން ބުންޏެވެ.
ޕީޕީއެމް/ޕީއެންސީގެ ރިޔާސީ ޓިކެޓުގައި ދާއިރާތަކަށް ކުރިމަތިލުމުގެ ޝައުގުވެރިކަން ގިނަ ބަޔަކު ވަނީ ފާޅުކޮށްފަ އެވެ. ޕްރައިމަރީގައި ވާދަކުރާނެކަން އިއުލާނުކޮށް ބައެއް ކެންޑިޑޭޓުން މިހާރު ވެސް ގެންދަނީ ކެމްޕެއިނު ވެސް ކުރަމުންނެވެ.
ކުރިއަށް އޮތް ހުރިހާ އިންތިހާބެއްގައި މޯލްޑިވްސް ނެޝަނަލް ޕާޓީ (އެމްއެންޕީ) ގުޅިގެން ވާދަކުރަން ޕީޕީއެމް/ޕީއެންސީން ރިޔާސީ އިންތިހާބުގައި ހެދި އެއްބަސްވުމުގައިވާ ކަމަށް އެމްއެންޕީން ވަނީ ބުނެފަ އެވެ. ނަމަވެސް، އެމްއެންޕީއާ ގުޅިގެން ވާދަކުރުމާ ގުޅޭގޮތުން ވާހަކަދައްކަވަން އެ ޕާޓީގެ ލީޑާޝިޕުން ވަނީ ދެކޮޅު ހަދައިފަ އެވެ. މިރޭގެ ބަޔާނުގައި ވެސް އެފަދަ ވާހަކައެއް ނެތެވެ.