ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް ހުށަހަޅާފައިވާ ގަރާރުގެ މަސައްކަތް މިއަދު 11:00 އަށް އެޖެންޑާ ކޮށްފައިވީ ނަމަވެސް މަޖިލީހުގެ ނައިބު ރައީސް އީވާ އަބްދުﷲ ރިޔާސަތުން ފައިބައިވަޑައިނުގެންނެވުމުން މަސައްކަތަށް ހުރަސް އެޅިފައިވާ ކަމަށް އެމްޑީޕީގެ މެންބަރުން ބުނެފި އެވެ.
މަޖިލީހުގައި މިއަދު ހެނދުނަށް އެޖެންޑާ ކޮށްފައި އޮތީ އަންނަ އަހަރަށް ލަފާކުރާ ބަޖެޓާއި ސަޕްލިމެންޓަރީ ބަޖެޓުގެ މަސައްކަތެވެ. ނަމަވެސް އެ މަސައްކަތަށް ކުރުމަށް އެމްޑީޕީގެ މެންބަރުން ތަޅުމަށް ވަޑައެއް ނުގަންނަވަ އެވެ.
އެމްޑީޕީގެ މެންބަރުން މަޖިލީހުގެ ތަޅުމަށް ވަނީ 11:00 ގައި އޮތް ނަޝީދުގެ އިތުބާރު ނެތް މައްސަލައަށެވެ. ނަމަވެސް އޭރު ރިޔާސަތުގައި އީވާ އިންނެވުމުން މެންބަރުން ވަނީ އަޑުގަދަކޮށް އީވާ ރިޔާސަތު ދޫކުރައްވައި ވަޑައިގަތުމަށް ގޮވާލައިފަ އެވެ.
"މިހާރު" އާ ވާހަކަ ދެއްކެވި އެމްޑީޕީގެ މެންބަރަކު ވިދާޅުވީ ނަޝީދުގެ މައްސަލަ ކުރިޔަށް ގެންދަން ހުރަސްއެޅުމަށް އީވާ ރިޔާސަތުން ފައިބައިވަޑައިގަތުމަށް ދެކޮޅު ހައްދަވާ އެވެ.
މަޖިލީހުގެ އަމީންއާންމު ވެސް އީވާ ރިޔާސަތުން ފައިބައިވަޑައިގަތުމަށް ތަކުރާރުކޮށް ލަފާ ދެއްވި ކަމަށާއި ނަމަވެސް އެ ލަފާ ގަބޫލުނުކުރައްވާ ކަމަށް ވެސް މެންބަރު ވިދާޅުވި އެވެ.
"އަމީންއާންމު ވަރަށް ގިނަ އިރު ރިޔާސަތު ކައިރީ ކޮޅަށް ހުރެ އެ ލަފާ ދެއްވާ. ދެ ބޭފުޅުން ވާހަކަ އެބަ ދައްކަވާ. އެކަމަކު ރިޔާސަތުން ފައިބަން އީވާ ބޭނުމެއް ނުވޭ." އޭނާ ވިދާޅުވި އެވެ.
އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވެސް ވަނީ އީވާ އާއި އަމީންއާންމު ވާހަކަ ދައްކަވާ ވީޑިއޯއެއް "އެކްސް" ގައި ޕޯސްޓުކުރައްވައިފަ އެވެ. އަދި ވިދާޅުވީ އީވާ ރިޔާސަތު ދޫނުކުރައްވާތީ ޖަލްސާ ނުފެށިގެން އުޅޭ ކަމަށެވެ.
"ބޭބެ ގޮނޑީގައި ބައްދައިގެން ވޯޓަށް ފިލާ،" ރޮޒައިނާ ލިޔުއްވާފައިވެ އެވެ.
މަޖިލީހުގެ އާންމު ކޮމިޓީން ވަނީ އެޓާނީ ޖެނަރަލް އިބްރާހިމް ރިފްއަތު ދެއްވި ލަފައާ އެއްގޮތަށް މަޖިލިސް ކުރިޔަށް ގެންދަން އަމީންއާންމަށް ލަފާ އަރުވަން ފާސްކޮށްފަ އެވެ.
އެ ލަފާގައި ބުނާ ގޮތުން ނަޝީދުގެ ނުފޫޒު އޮންނަ މެންބަރުންނަކަށް ރިޔާސަތުގައި ނީނދެވޭނެ އެވެ. ނަމަވެސް އަމީންއާންމު އެ ލަފާ ގަބޫލުކުރެއްވި ކަމެއް އަދި ސާފެއް ނުވެ އެވެ.