ޓެލެގްރާމް ޓާސްކް ސްކޭމް ރާއްޖެއާ ހަމައަށް، ސަމާލުވޭ!

މިހާރު ހިންގާ އެންމެ ނުރައްކާތެރި ސްކޭމްގެ ގޮތުގައި ގިނަ ގައުމުތަކުން ކަނޑައަޅާފައިވާ ޓެލެގްރާމް ޓާސްކް ސްކޭމް ރާއްޖެއާ ހަމައަށް އައިސް، ދިވެހިން އަތުން އޮޅުވާލައިގެން ފައިސާ ހޯދުމަށް މަސައްކަތް ކުރަމުންދާ ކަން އެނގިއްޖެ އެވެ.

ގޭގައި ތިބެގެން އޮންލައިންކޮށް ކުދިކުދި މަސައްކަތްތައް ކޮށްގެން އާމްދަނީ ދޭނެ ކަމަށް ބުނެ ހިންގާ މި ސްކޭމުން އިންޑިއާގައި ވެސް ގިނަ ބައެއްގެ އަތުން އެތައް މިލިއަން ރުފިޔާއެއް ވަނީ އޮޅުވާލައިގެން ހޯދާފަ އެވެ.

މި ސްކޭމްގައި ފުރަތަމަ މެސެޖު ކުރަނީ ބޭރުގެ މަޝްހޫރު ކުންފުންޏެއްގެ ވެރިއެއްގެ ނަމުގައި އާންމުކޮށް ވަޓްސްއެޕުންނެވެ.

"ބޭރު ކުންފުންޏެއްގެ މާކެޓިން އިސް ވެރިއެކޭ ކިޔާފައި މެސެޖު ކުރީ. ގޭގައި ހުރެގެން ފަސޭހައިން ލާރި ހޯދަން ބޭނުންހޭ. ދެން އަޅުގަނޑު ލިންކްޑްއިން ޗެކުކޮށްލިއިރު، އެ ބުނާ މީހެއްގެ ޕްރޮފައިލް ވެސް އިން،" އެ ސްކޭމްގެ މެސެޖު ލިބުނު ދިވެއްސަކު ނަން ނުޖަހަން އެދި ބުންޏެވެ.

އަޖުމަ ބަލައިލުމުގެ ގޮތުން ފުރަތަމަ ހަވާލުކުރި ފަސް ވަރަކަށް ޓާސްކު އޭނާ ފުރިހަމަކުރި އެވެ.

"ދިނީ ޔޫޓިއުބް އެކައުންޓެއް ސަބްސްކްރައިބް ކޮށްލުމާއި ޕޯސްޓަކަށް ލައިކު ކޮށްލުން ކަހަލަ ވަރަށް ފަސޭހަ ޓާސްކުތަކެއް. ކޮންމެ ޓާސްކަކަށް ފަސް ޑޮލަރު ލިބޭ ގޮތަށް. އެކަމަކު 20 ޑޮލަރު ހަމަވުމުން ޖަމާކޮށްދޭނަ ބުނީ،" އޭނާ ކިޔައިދިނެވެ.

މިއީ އާންމުކޮށް މި ސްކޭމް ހިންގާ ގޮތެވެ. ފުރަތަމަ ހަވާލުކުރާ ޓާސްކުތަކަށް ފައިސާ ފޮނުވަނީ އިތުބާރު ހޯދާށެވެ. އަސްލު ސްކޭމް ފަށަނީ އޭގެ ފަހުންނެވެ.

"ދެން ބުނީ ޓެލެގްރާމް ގުރޫޕަކަށް ޖޮއިން ކުރާށޭ. އެ ގުރޫޕުގަ ތިބި 500 އެއްހާ މެމްބަރުން."

އެ ގުރޫޕުގައި ވެސް އިތުރު ޓާސްކުތަކެއް ހަވާލުކޮށް، އެ ކަމަށް ވެސް ފައިސާ ލިބުނު ކަމަށް އޭނާ ބުންޏެވެ.

އޭގެ ފަހުން، އޭނާއަށް ދެން ފޮނުވީ 50 ޑޮލަރު އިންވެސްޓުކޮށްގެން 20 މިނިޓްގެ ތެރޭގައި 65 ޑޮލަރު ލިބޭ ސްކީމެކެވެ.

"އަޅުގަނޑު ފައިސާ ފޮނުވަން ބުނި ހިސާބުން އެނގިއްޖެ ގޯހެއް އުޅޭ ކަން. އަޅުގަނޑު ބުނެފިން އެ ވަރުގެ ބެލެންސެއް ނެތޭ. ދެން ވަރަށް މަސައްކަތް ކުރި އަޅުގަނޑު އަތުން އެ ފައިސާ ހޯދަން،" އޭނާ ބުންޏެވެ.

މި ސްކޭމްގައި އޭނާ ނުޖެހި ސަލާމަތްވިޔަސް، ދިވެހި ފުލުހުންގެ ބަހެއް އަދި ނުލިބޭތީ އިތުރު ބަޔަކު މި ސްކޭމްގެ ޝިކާރައަކަށް ވި ކަމެއް އަދި ނޭނގެ އެވެ.

މި ސްކޭމްގައި ގިނަ ބަޔަކު ޖެހެނީ، އިންވެސްޓުކޮށްގެން ފައިދާ ލިބޭ ކަމަށް ބުނެ ހޯދައި ފައިސާ، އެ ބުނާ ވަރުގެ ފައިދާއާ އެކު އަނބުރާ ދޭތީ އެވެ. އެކަމަކު ދެން ފޮނުވަނީ އެލީޓު ގުރޫޕަކަށް ކޮލިފައި ވެއްޖެ ކަމަށް ބުނެ އިތުރު ގުރޫޕަކަށް ޖޮއިން ވުމުގެ ދައުވަތެވެ.

އެ ގުރޫޕުގައި ކަނޑައަޅާފައި ވަނީ އެތައް ހާސް ޑޮލަރުގެ ޕެކޭޖުތަކެކެވެ. އެ ޕެކޭޖުގެ ދަށުން ލިބޭ ފައިދާ ވެސް އެތައް ގުނައެއް ބޮޑުވާނެ ކަމުގެ ވައުދާ އެކު އެވެ.

ކުރިން ފައިސާ ލިބި އިތުބާރު ހޯދާފައިވާތީ، ގިނަ ބަޔަކު އެ މަޅީގައި ޖެހި، އިންވެސްޓުކުރަނީ އެވެ. އެކަމަކު ބޮޑު އަދަދުތަކުން ދޭ ފައިސާ ހިފައިގެން ފިލަނީ އެވެ.

އިންޑިއާގައި ވެސް އެތައް ބަޔަކަށް ލަނޑު ލިބިފައިވާ ކަމަށް އެ ގައުމުގެ ފުލުހުން ވެސް ވަނީ ބުނެފަ އެވެ. ވަޓްސްއެޕް ނޫނީ ޓެލެގްރާމް މެދުވެރިކޮށް މެސެޖުކުރަނީ ގޫގުލް އާއި ގޯއައިބީބޯ ފަދަ ކުންފުނިތަކުގެ ނަމުގަ އެވެ.