އީރާނުން އެހީތެރިވާ، ޔަމަންގެ ހޫތީން ރަތްކަނޑުގައި އުޅަނދުތަކަށް ދޭ ހަމަލާތަކާ ގުޅިގެން ޔަމަނުގެ ހޫތީ ހަނގުރާމަވެރިންނަށް ދިން ވައިގެ ހަމަލާތަކަށް ފަހު އިންޑިއާގެ ޚާރިޖީ ވަޒީރު އާދީއްތަ ދުވަހުން ފެށިގެން އީރާނަށް ދެ ދުވަހުގެ ދަތުރެއް ކުރުމަށް ނިންމަވައިފި އެވެ.
އެސް ޖައިޝަންކަރުގެ މި ދަތުރަކީ އިންޑިއާގެ ކަނޑުގެ ސަރަހައްދު ކައިރީގައި އޮތް އުޅަނދަކަށް އީރާނުން ޑްރޯން ހަމަލާއެއް ދިން ކަމަށް އެމެރިކާއިން ތުހުމަތު ވެސް ކޮށްފައި ވަނިކޮށް ކުރައްވާ ދަތުރެކެވެ.
ޖައިޝަންކަރު އީރާނުގެ ޚާރިޖީ ވަޒީރު ހުސައިން އާމިރު އަބްދުﷲ އާ ބައްދަލުކުރައްވައި ދެ ގައުމުގެ ގުޅުންތަކާއި ސަރަހައްދީ އަދި ބައިނަލްއަގްވާމީ މައްސަލަތަކާ ބެހޭ ގޮތުން މަޝްވަރާ ކުރައްވާނެ ކަމަށް އިންޑިއާ ސަރުކާރުން އިއްޔެ ނެރުނު ބަޔާނެއްގައި ބުންޏެވެ.
މިދިޔަ އޮކްޓޯބަރު މަހުގެ 7 ވަނަ ދުވަހު ހަމާސް އިން އިޒްރޭލަށް ދިން ހަމަލާއާ ގުޅިގެން އިޒްރޭލުން ޣައްޒާއަށް ހަމަލާ ދޭން ފެށުމުން ހޫތީން ވަނީ ރަތްކަނޑުގައި އެކި އުޅަނދުތަކަށް ހަމަލާދީ، މިއީ އިޒްރޭލުގެ ހަމަލާތަކުގެ ބަދަލު ހިފުމެއް ކަމަށް ބުނެފަ އެވެ. މި ހަމަލާތަކާ ގުޅިގެން އުޅަނދުތައް ރަތްކަނޑާ ދުރުން ދަތުރުކުރަން ޖެހުމުން، މުދަލުގެ އަގު އުފުލޭ ސަަބަބަކަށްވެ ގައުމުތަކުގެ ކަންބޮޑުވުން ވަނީ އިތުރުވެފަ އެވެ. އެހެންވެ ރަތްކަނޑުގައި އެމެރިކާ އިސްވެ އޮވެ އެކި ގައުމުތައް ބައިވެރިވާ ސަލާމަތީ ލަޝްކަރެއް މިހާރު ވަނީ އެކުލަވާލައިފަ އެވެ. --އޭއެފްޕީ